الماتىدا اسفالتبەتون قوسپاسىن پايدالانىپ جولداردى جاماۋ مەرزىمىنەن بۇرىن باستالادى
قالا تۇرعىندارىنىڭ جول قاۋىپسىزدىگى جونىندەگى وتىنىشىنە وراي، الماتى اكىمدىگى اسفالتبەتون زاۋىتىنىڭ جۇمىسىن مەرزىمىنەن بۇرىن ىسكە قوسۋعا مۇرىندىق بولدى، دەپ حابارلايدى Almaty-akshamy.kz.
الماتى قالالىق موبيلدىلىك باسقارماسى، «اسفالتبەتون-1» زاۋىتى مەن جولداردى جوندەۋگە ماماندانعان كومپانيالار ءوزارا ءىس-قيمىل تۋرالى مەموراندۋمعا قول قويدى. قۇجاتقا سايكەس، اسفالتبەتون زاۋىتى جىل سايىن جۇرگىزىلەتىن جوسپارلى پروفيلاكتيكالىق جۇمىستان كەيىن بىردەن ىسكە كىرىستى.
اقاۋلاردىڭ انىقتالعانىنا قاراي جوندەۋ جۇمىستارى قالانىڭ بارلىق اۋدانىندا جۇرگىزىلەدى. شۇڭقىرلار (جولدارعا تولىققاندى ورتاشا جوندەۋ جۇرگىزىلگەنگە دەيىنگى ۋاقىتشا شارا) ماگيسترالداردا دا، اۋداندىق ماڭىزى بار كوشەلەردە دە جوندەۋدەن وتەدى. بيزنەستىڭ الەۋمەتتىك جاۋاپكەرشىلىگى اياسىنداعى جۇمىستارعا 5 كومپانيا كىرىسەدى.
جىل سايىنعى نەگىزگى جول-جوندەۋ جۇمىستارى قولايلى اۋا رايىندا (كوكتەمنىڭ اياعى مەن جازدىڭ باسىنان باستاپ) باستالادى.
2023 جىلى ۇزىندىعى 200 كم بولاتىن 220 كوشەگە ورتاشا جوندەۋ جۇرگىزۋ جوسپارلانعان. 180 مىڭ شارشى مەتردەن استام جول اعىمداعى جوندەۋدەن وتەدى.