الماتى وبلىسىندا پوليسەيلەر جول جيەگىمەن جۇرەتىن جۇرگىزۋشىلەرمەن كۇرەسۋدە.
وبلىستىق دەپارتامەنتتىڭ باستاماسىمەن “ءقاۋىپسىز جول” جەدەل-پروفيلاكتيكالىق ءىس-شاراسى اياسىندا پوليسەيلەر ءوڭىردىڭ اۆتوبلوگەرلەرىمەن بىرلەسىپ جول جيەگىمەن جۇرەتىن جانە قارسى قوزعالىس جولاعىنا شىعىپ جۇرەتىن جۇرگىزۋشىلەردى انىقتاۋ بويىنشا ارنايى جۇمىس جۇرگىزدى، دەپ حابارلايدى Almaty-akshamy.kz Polisia.kz-كە سىلتەمە جاساپ.
الماتى وبلىسىنىڭ پوليسەيلەرى جول قوزعالىسى قاۋىپسىزدىگىن قامتاماسىز ەتۋگە باعىتتالعان كەزەكتى جۇمىستاردى جۇرگىزۋدە. اتالعان ءىس-شارا اۆتوكولىك قۇرالدارىنىڭ اعىنىنا بايلانىستى جول قوزعالىسى قيىنداعان تالعار، ىلە جانە قاراساي اۋداندارىندا جۇرگىزىلىپ جاتىر.
"دەپارتامەنتتىڭ ۆەدومستۆولىق پاراقشاسىنا جول جيەگى ارقىلى كەپتەلىستەردى اينالىپ وتەتىن جانە قاراما-قارسى قوزعالىس جولاعىنا شىعاتىن جۇرگىزۋشىلەر تۋرالى شاعىمدار ءجيى تۇسەدى. وسى سۇراقتاردى پىسىقتاۋ ماقساتىندا پاترۋلدىك پوليسيا جاساقتارى اۆتوبلوگەرلەرمەن بىرلەسىپ، وسىنداي قۇقىق بۇزۋشىلارعا قاتىستى ماقساتتى پروفيلاكتيكالىق، سونداي-اق پارمەندى شارالار جۇرگىزۋدە. سەبەبى، مۇنداي جول قوزعالىسى ەرەجەلەرىن بۇزۋدىڭ سالدارى اۋىر زارداپتارعا اكەلۋى مۇمكىن"، – دەدى الماتى وبلىسى پد پپب كومانديرى دارحان بايشوينوۆ.
جىل باسىنان بەرى كولiك قۇرالىن جولدىڭ ءجۇرۋ ءبولiگiندە ورنالاستىرۋ، قارسى ءجۇرiپ ءوتۋ نەمەسە باسىپ وزۋ قاعيدالارىن بۇزعانى ءۇشىن 518 حاتتاما تولتىرىلدى.