الماتى وبلىسىندا جانتۇرشىگەرلىك جول اپاتى جەتى ادامنىڭ ءومىرىن جالمادى. قازا تاپقاندار قاتارىندا ەستۋ قابىلەتى تومەن سپورتشىلار بار. ولار بىشكەكتەگى تۋرنيردەن قايتىپ كەلە جاتقان، - دەپ حابارلايدى aqshamnews.kz ءتىلشىسى "كتك" تەلەارناسىنا سىلتەمە جاساپ.
"بۇل قازاقستانداعى ەستۋ قابىلەتى تومەن سپورتشىلار قاۋىمداستىعى ءۇشىن وتە اۋىر جاعداي. ويتكەنى كولىكتە جاستار قۇراماسىنىڭ باس باپكەرى دە بولعان. ءبارى دە ۇلتتىق قۇرامانىڭ مۇشەلەرى ەدى. ولار ازيا چەمپيوناتتارىندا جۇلدەلى ورىندار العان تاجىريبەلى سپورتشىلار بولاتىن"، - دەدى ۇلتتىق سۋردليمپيادا كوميتەتىنىڭ ۆيسە-پرەزيدەنتى ارسەن شاكۋوۆ.
قايعىلى وقيعا كەشە ءتۇن ورتاسىندا بولدى. جولاۋشىعا لىق تولى مينيۆەن تىزگىندەگەن جۇرگىزۋشى جۇيتكىپ كەلە جاتىپ تەجەۋىشىن باسىپ ۇلگەرمەگەن. ءسويتىپ الدىندا كەلە جاتقان جۇك كولىگىنىڭ تىركەمەسىنە سوعىلادى. سوققىنىڭ قاتتى بولعانى سونشالىق، جەڭىل ماشينانىڭ ساۋ-تامتىعى قالماپتى. كولىك جۇرگىزۋشىسى مەن التى جولاۋشى وقيعا ورنىندا ءتىل تارتپاي كەتتى. مارقۇم بولعان سپورتشىلار بىشكەكتە وتكەن ارداگەر فۋتبولشىلار اراسىنداعى تۋرنيرگە قاتىسقان ەكەن. پوليسيا جول اپاتىنا قاتىستى قىلمىستىق ءىس قوزعاپ، تەرگەۋ جۇرگىزىپ جاتىر.
"پوليسيا قىزمەتكەرلەرى الماتى - بىشكەك اۆتوجولىنىڭ 129-شاقىرىمىندا بولعان جول-كولىك وقيعاسى دەرەگى بويىنشا قىلمىستىق ءىس قوزعادى. ءقازىر بولعان وقيعانىڭ بارلىق ءمان-جايىن انىقتاۋعا باعىتتالعان سوتالدى تەرگەۋ امالدارى جۇرگىزىلدى"، - دەدى الماتى وبلىسى پد ءبولىم باسشىسى ەرنار ءسايدىلدين.