جوعارى وقۋ ورىندارىنىڭ اكادەميالىق جانە باسقارۋشىلىق ەركىندىگى ودان ءارى كەڭەيتىلەدى. سالاداعى وزگەرىستەر تۋرالى ق ر بعم جوعارى جانە جوعارى وقۋ ورنىنان كەيىنگى ءبىلىم دەپارتامەنتىنىڭ ديرەكتورى ادىلەت تويبايەۆ Facebook-تەگى پاراشاسىندا مالىمدەدى، دەپ حابارلايدى اlmaty-akshamy.kz
جوعارى وقۋ ورىندارىنا قورىتىندى اتتەستاتتاۋ نىسانىن انىقتاۋدا تولىق دەربەستىك بەرىلەدى. بۇل قورىتىندى جۇمىستى تاپسىرۋدان باس تارتپايدى، ءبىلىم بەرۋ باعدارلاماسىنىڭ ەرەكشەلىگى مەن جوعارى وقۋ ورنىنىڭ اكادەميالىق ساياساتىن ەسكەرە وتىرىپ، قورىتىندى اتتەستاتتاۋ نىسانىن/فورماتىن تاڭداۋ مۇمكىندىگىن بەرەدى. مىسالى، ۋنيۆەرسيتەتتەر ناتيجەگە باعىتتالعان جوبالاردا ستۋدەنتتەردىڭ كوماندالىق جۇمىسىن، سونداي-اق ستارتاپ-جوبالار، كونكۋرستىق جۇمىستاردى جانە ت.ب. قولدانا الادى، - دەپ جازادى ول.
سونداي-اق دەپارتامەنت ديرەكتورىنىڭ مالىمەتىنشە، قولدانىستاعى ستاندارت بويىنشا بازالىق پاندەر كەمىندە 112 كرەديتتى، بەيىندەۋشى پاندەر – 60 كرەديتتى قۇرايدى. ءبىراق، ءار ۋنيۆەرسيتەتتىڭ باعدارلامالارى ءارتۇرلى، سونداي-اق كادرلاردى دايارلاۋ باعىتتارىنىڭ ەرەكشەلىگى بار، مۇنداي قاتاڭ رەتتەۋ جوعارى وقۋ ورىندارىنا كەيبىر ءبىلىم بەرۋ باعدارلامالارىنىڭ ەرەكشەلىگىن ەسكەرۋگە مۇمكىندىك بەرمەيدى. سوندىقتان جاڭا ستاندارت جوباسىندا بازالىق جانە بەيىندەۋشى سيكل پاندەرىنىڭ كرەديتتەر سانىن قاتاڭ رەتتەۋ بولمايدى. وسىلايشا، جوعارى وقۋ ورىندارى كرەديتتەردىڭ جالپى سانىن ەسكەرە وتىرىپ، بازالىق جانە بەيىندەۋشى سيكل پاندەرىنىڭ كرەديتتەر سانىن وزدەرى انىقتايتىن بولادى.
ادىلەت ءجۇنىس ۇلىنىڭ ايتۋىنشا، ۇزدىكسىز ءبىلىم بەرۋ تۇجىرىمداماسىن ىسكە اسىرۋ شەڭبەرىندە كەلەسى ۇعىمدار ەنگىزىلۋدە: «ميكروكۆاليفيكاسيالار»، «نانو-دەڭگەيلەر»، «كەڭەيتىلەتىن دارەجەلەر (Stackable degree)».
بۇل ءاربىر ادامعا كاسىبي قىزمەتى ءۇشىن قاجەتتى قۇزىرەتتەردى جيناۋعا مۇمكىندىك بەرەدى. بارلىق ازاماتتار قىسقا مەرزىمدە قاجەتتى كاسىبي داعدىلاردى مەڭگەرىپ، قوسىمشا ءبىلىم الا الادى. جوعارى وقۋ ورىندارىنا ماگيسترانتتار مەن دوكتورانتتاردىڭ جەكە وقۋ جوسپارىنىڭ قۇرىلىمىن ءوز ەركىمەن بەكىتۋ قۇقىعى بەرىلەدى. اتالعان وزگەرىس نەگىزىنەن مينيسترلىكتىڭ ۋنيۆەرسيتەتتەردىڭ ىشكى قۇجات نىساندارىن رەتتەۋ جانە ەسەپتىلىكتى قىسقارتۋ بويىنشا جۇمىسىنىڭ جالعاسى بولىپ تابىلادى. ەگەر قولدانىستاعى ستاندارتتا جەكە وقۋ جوسپارىنىڭ قۇرىلىمىنا تالاپتار كوزدەلسە، جاڭا جوبادا ولار جوق، - دەدى ول.
سونىمەن قاتار ول عىلىمي باسشىلىقتى تاعايىنداۋ جانە ديسسەرتاسيا تاقىرىبىن بەكىتۋ مەرزىمدەرىن رەتتەۋ نورمالارى قايتا قارالاتىنىن جازدى. دەپارتامەنت ديرەكتورى پەداگوگتەر جوعارىدا اتالعان وزگەرىستەرمەن تانىسىپ، پىكىرلەرىن بىلدىرە الاتىنىن اتاپ ءوتتى.
ستاندارت جوباسى اشىق نورماتيۆتىك قۇقىقتىق اكتىلەر پورتالىندا ورنالاستىرىلعان. پەداگوگيكالىق قاۋىمداستىقتى وسى جوبانى كەڭىنەن تالقىلاۋعا شاقىرامىن. سىزدەردىڭ ۇسىنىستارىڭىزدى قاراستىرۋعا دايىنبىز، - دەپ قورىتىندىلادى مينيسترلىك وكىلى.