ەرلىكتى ەل ماڭگى جادىندا ساقتايدى
قازاق حالقىندا باتىرلار از بولماعان. ولاردىڭ باتىرلىق ىس-ارەكەتى ەل باسىنا كۇن تۋعاندا كورىنەدى. ەگەر ناق قايسار جۇرەكتى ازامات بولسا، وندا ونى ەلى ارداقتايدى. ماڭگى ەستە ساقتايدى. ۇمىتپاي ارتىنداعى ۇرپاقتارىنا ۇلگى ەتىپ وتىرادى. سونداي جاننىڭ ءبىرى - نەبارى 24 جىل عۇمىر كەشىپ، كوزسىز ەرلىك تانىتقان ەر راتاي ەدى.
الماتىنىڭ س. ج. اسفەندياروۆ اتىنداعى قازاق ۇلتتىق مەديسينا ۋنيۆەرسيتەتىندە ەكى مارتە «قىزىل جۇلدىز» وردەنىنىڭ يەگەرى راتاي سۇلتانبەكتىڭ قۇرمەتىنە ەسكەرتكىش تاقتا قويىلدى.
شارانىڭ وتۋىنە الماتى اكىمدىگى مادەنيەت باسقارماسى مەن مەديسينالىق ۋنيۆەرسيتەتتىڭ ۇجىمى مۇرىندىق بولدى. مەموريالدىق تاقتانىڭ سالتاناتتى اشىلۋ راسىمىنە باتىردىڭ نەمەرە ءىنىسى كەنىشبەك سۇلتانبەكوۆ، وسى وقۋ ورنىنىڭ رەكتورى تالعات نۇرعوجين، تۋىستارى دانيار ايتبەكوۆ، سايلاۋ باكىر ۇلى، اعايىن-تۋمالارى، جاقىندارى قاتىستى. ءسوز اراسىندا ءبىرقاتار ەستەلىكتەر مەن ويلار ورتاعا سالىندى.
راتاي سۇلتانبەك - ەكىنشى دۇنيەجۇزلىك سوعىستا ايرىقشا ەرلىك كورسەتكەن تۇلعا. ول ۋكراينادا اسكەري وقۋدا وقىپ، لەيتەنانت شەنىن العان. ءسويتىپ، 21 جاسىندا باتالون باسقارعان. بەلورۋسسيانى، گەرمانيانى ازات ەتۋگە قاتىناسقان. قازاق اراسىنان شىعىپ، كوزسىز ەرلىك، باتىرلىق، قايسارلىق كورسەتتى. وزىمەن بىرگە مايدانداس بولعان، قازاقستاننىڭ حالىق جازۋشىسى ءابۋ سارسەنبايەۆ شىعارمالارىندا قايسار وعلاننىڭ باتىلدىعىن، رۋحتى جىگىت بولعاندىعىن جازىپ قالدىرعان. ول جاعى كوپكە ءمالىم.
سونداي-اق، جيىندا باتىر راتايدىڭ نەمەرە ءىنىسى كەنىشبەك پارىمبەك ۇلى جوعارىدا كەلتىرگەن ءومىر تاريحىن بايانداپ بەردى. ءىس-شارانى جۇرگىزىپ، وسى ءىستىڭ باسى-قاسىندا جۇرگەن زادا ارىنوۆا دا اتسالىسقان.
جينالعان اعايىن-جەگجاتتارى قازاقتىڭ قايسار ۇلى، گۆارديا مايورى راتاي سۇلتانبەكوۆتىڭ قۇرمەتىنە الماتىدان كوشە اتاۋى بەرىلسە دەگەن تىلەگىن ءبىلدىردى. سونىمەن قاتار، الداعى ۋاقىتتا وسىنداي يگى شارالار جالعاسىن تابۋىنا نيەتتى ەكەندىكتەرىن جەتكىزدى.