سۆەتلانا جولمانوۆا جوعارى سوت كەڭەسىنە شاعىمدانۋعا قۇقىلى.
جوعارعى سوت كەڭەسى الماتى قالاسى مەدەۋ اۋداندىق سوتىنىڭ سۋدياسى سۆەتلانا جولمانوۆانى قىزمەتىنەن بوساتۋ تۋرالى شەشىم قابىلدادى، دەپ حابارلايدى Almaty-akshamy.kz.
"جوعارى سوت كەڭەسى جانىنداعى سوت ءجيۋريى الماتى قالاسى مەدەۋ اۋداندىق سوتىنىڭ سۋدياسى جولمانوۆاعا قاتىستى سۋديانىڭ سوت ىستەرى بويىنشا تاراپتاردىڭ وكىلدەرىمەن پروسەستىك ەمەس بايلانىس جاساۋىنا بايلانىستى سۋديالىق ادەپكە قايشى قىلىق جاساۋ فاكتىسى بويىنشا تارتىپتىك ءىستى قارادى. سوت ءجيۋريى سۋديا جولمانوۆاعا قاتىستى لاۋازىمىنان بوساتۋ تۇرىندە تارتىپتىك جازا قولدانۋ تۋرالى شەشىم قابىلدادى"، - دەلىنگەن كەڭەستىڭ حابارلاماسىندا.
بۇل شەشىم ءالى زاڭدى كۇشىنە ەنگەن جوق، سۆەتلانا جولمانوۆا وعان جوعارى سوت كەڭەسىنە شاعىمدانۋعا قۇقىلى.
ەسكە سالا كەتەيىك، 2021 جىلدىڭ ساۋىرىندە الەۋمەتتىك جەلىدە الماتى قالاسى مەدەۋ اۋدانىنىڭ سۋدياسى سۆەتلانا جولمانوۆانىڭ كابينەتىن ءتىنتۋ كەزىندە ميلليونداعان دوللار تابىلعانى تۋرالى اقپارات تارادى. كەيىننەن الماتى قالالىق سوتى جەلىدە تاراعان اقپاراتتى جوققا شىعاردى. ۆەدومستۆو سۋديانىڭ كابينەتىنەن 10 مىڭ دوللار تابىلعانىن، ۇيىنەن ەشتەڭە تابىلماعانىن حابارلادى. كەيىنىرەك سۋديا باسپا ءسوز ءماسليحاتىندا وزىنە تاعىلعان ايىپتىڭ نەگىزسىز ەكەنىن ايتتى. ول تاركىلەنگەن 10 000 اقش دوللارى يپوتەكاعا پاتەر الام جيناعان ءوزىنىڭ اقشاسى ەكەنىن ءتۇسىندىردى.