بالالار ۇيىنەن سوڭ ارنايى ينتەرناتتا تاربيەلەنگەن
تۇركىستان وبلىسىندا تاعدىر تالكەگىمەن ارالارى اجىراپ كەتكەن باۋىرلار 25 جىلدان سوڭ قاۋىشتى. اعايىندىلار كەنجەلەرىن 4 جاسىندا جوعالتىپ العان. قۋانىش سىيلاعان ايماق پوليسەيلەرىنە ولاردىڭ العىسى شەكسىز، دەپ حابارلايدى Almaty-akshamy.kz Zakon.kz-كە سىلتەمە جاساپ.
تۇركىستان وبلىسى ساۋران اۋدانىنىڭ تۇرعىنى بوتاكوز تولىبايەۆانىڭ 25 جىل بۇرىن كوز جازىپ قالعان ءىنىسىن پوليسەيلەر تاۋىپ بەردى. اعايىندى ەكى ۇل ءبىر قىز اتا-انادان جاستاي قالىپ، بوتاگوزدىڭ توعىز جاستاعى اعاسى مەن ءتورت جاسار ءىنىسىن تۋىستارى شيرەك عاسىر بۇرىن بالالار ۇيىنە وتكىزگەن ەكەن.
«جۇرەگىم ءتىپتى تولقىپ قۋانىپ ءىنىمنىڭ تابىلعانىنا..قۋانىپ وتىرمىن ءوزىم شىنىمدى ايتسام..راقمەت. تابىلعانىنا شۇكىر... ءىنىم 4 جاستا كەتكەن. ول كەزدە ونشا سويلەي المايدى، شامالى ساقاۋلاۋ تۇعىن. سول ءتورت جاستا دەتدومعا وتكىزدى. تەمىرلانعا وتكىزگەم دەدى ،اكەمنىڭ ءىنىسى وتكىزگەن. ودان كەيىن ول جاققا ىزدەپ باردىق. ول جاقتا «بىرەۋ اسىراپ الدى دەدى، ءبىراق ونىڭ ادرەسى جوق»،-دەيدى تۇركىستان وبلىسىنىڭ تۇرعىنى بوتاگوز تولىبايەۆا.
ارحيۆتەن تاۋىپ بەرە المادى بىزگە. بوتاگوز ءىنىسىن كوپ ىزدەگەنىن ايتادى. ءبىراق پوليسيا كومەگىنە جۇگىنبەپتى. سوڭعى ەكى جىلدا پوليسياعا دا جۇگىنگەن. 29 جاستاعى ءىنىسىن تولە بي اۋدانىنداعى جەكە شارۋاشىلىقتاردان ءتارتىپ ساقشىلارى تاۋىپ بەرگەن. جەرگىلىكتى تۇرعىننىڭ ءبىرى قۇقىق قورعاۋشىلارعا، جاس جىگىتتىڭ تۇتقىندا جۇرگەنىن حابارلاپتى.
«قازىرگى تاڭدا ازاماتقا جابىرلەنۋشىگە قاتىستى ارىزى بويىنشا 126 باپپەن تەرگەپ تەكسەرۋ امالدارى جۇرگىزىلدى. سوت مەديسينالىق ساراپتامالار، تاعى دا بىرنەشە ساراپتامالار تاعايىندالدى. سونىڭ ناتيجەسىندە زاڭدى شەشىم قابىلدانادى»،-دەدى تۇركىستان وبلىستىق پد كريمينالدىق پوليسيا باسقارماسىنىڭ باستىعى سۇلتانبەك ۇسىپبەكوۆ.
پوليسيانىڭ دەرەگىنشە، باۋىرلارىنان بالا كۇنىندە اجىراپ قالعان جىگىت اتا-اناسىنىڭ قايتىس بولعانىن، ءوزىنىڭ بىرگە تۋعاندارى بار ەكەنىن بەيحابار ەكەنىن ايتقان. بالالار ۇيىنەن سوڭ ارنايى ينتەرناتتا تاربيەلەنگەن. ەس بىلگەلى اۋدان اۋىلداردا قونىس اۋدارىپ، اركىمگە جالدانىپ جۇمىس ىستەپ كەلگەن كورىنەدى. ءقازىر بۇل ءىستى قولعا العان وبلىس پوليسەيلەرى «زاڭسىز باس بوستاندىعىنان ايىرۋ» بابى بويىنشا تەرگەپ تەكسەرۋ جۇمىستارىن باستاپ كەتتى.