اۋىل تۇرعىندارى «اۋىل» پارتياسىنا سەنەدى
كەزەكتەن تىس پرەزيدەنت سايلاۋىنا قاتىسقان كانديداتتاردىڭ ءبىرى - جيگۋلي دايرابايەۆ ناۋقاننىڭ الدىن الا قورىتىندىسىندا باسىم داۋىس يەلەنگەن قاسىم-جومارت توقايەۆتى جەڭىسىمەن قۇتتىقتادى. بۇل تۋرالى Almaty-akshamy.kz «حابار 24» تەلەارناسىنا سىلتەمە جاساپ حابارلايدى.
«سايلاۋ ناۋقانى ءوز مارەسىنە جەتتى، الدىن الا قورىتىندىسى شىقتى، حالىق ءوز تاڭداۋىن جاسادى. ەڭ الدىمەن، ماعان سەنىم ءبىلدىرىپ، داۋىس بەرگەن سايلاۋشىلارىما شىن جۇرەكتەن العىسىمدى ايتامىن!» - دەدى كانديدات.
ول ساياسي ناۋقاندا ۇسىنعان باعدارلاماسى وسى سايلاۋمەن توقتاپ قالمايتىنىن اتاپ ءوتتى. سايلاۋلدى قۇجاتىندا كورسەتىلگەن باستامالارىن بۇدان كەيىن دە جالعاستىرا بەرەتىنىنە سەندىردى.
«حالىقتىڭ جاعدايىن، ءال-اۋقاتىن جاقسارتۋ ءۇشىن بۇكىل كۇش-جىگەرىمدى، ماڭداي تەرىمدى ارنايمىن. سودان سوڭ، قاسىم-جومارت توقايەۆتى جەڭىسىمەن قۇتتىقتايمىن! ەل يگىلىگى ءۇشىن ەڭبەك ەتەدى دەپ كامىل سەنەمىن! جاڭادان سايلانعان مەملەكەت باسشىسىنا ەل باسقارۋ ىسىندە تابىس تىلەيمىن!» - دەدى دايرابايەۆ.
جيگۋلي مولداحالىق ۇلى سايلاۋالدى كامپانياسىندا ەكى باستى ماقساتقا قول جەتكىزگەنىن مالىمدەدى.
«بىرىنشىدەن، اۋىل جانە اۋىل شارۋاشىلىعىنىڭ قوماقتى ماسەلەلەرىن قوعام الدىندا تاعى دا كوتەردىك. ەكىنشىدەن، «اۋىل» پارتياسىنىڭ جۇمىسىن جان-جاقتى ناسيحاتتاپ، پارتيانىڭ مۇمكىندىكتەرى مەن ەلەكتورالدىق كۇش-قۋاتىن حالىققا تانىتا بىلدىك. اۋىل تۇرعىندارى «اۋىل» پارتياسىنا سەنەدى. ءبىز مۇنىمەن توقتاپ قالمايمىز، اۋىل مەن اگرو سالانىڭ بولاشاعى ءۇشىن جۇمىسىمىزدى جالعاستىرا بەرەمىز! ەندى الداعى ەلەكتورالدىق ناۋقاندارعا دايىندالامىز!» - دەدى جيگۋلي دايرابايەۆ.