جيگۋلي دايرابايەۆ: اۋىل شارۋاشىلىعىنىڭ جاعدايى قيىن ەكەنى راس

مامانداردىڭ ايتۋىنشا، سالادا بار ماسەلە ءجيى ايتىلادى.

اگرووندىرىستىك كەشەن كوميتەتىنىڭ ءتوراعاسى جيگۋلي دايرابايەۆ قازاقستاننىڭ اۋىل شارۋاشىلىعى سالاسىندا بار ماسەلەلەر تۋرالى ايتتى، دەپ حابارلايدى Almaty-akshamy.kz Baq.kz سىلتەمە جاساپ. 

«اۋىل شارۋاشىلىعى كەشەنى تۇبەگەيلى ارتقا قالسا كەلىسپەيمىز ەندى. بۇل سالادا جاسالعان جاقسى باستامالار دا بار. قاراپايىم فەرمەرلەردىڭ ماقساتى حالىققا ونىمدەردىڭ قولجەتىمدىلىگىن قامتاماسىز ەتۋ. مال شارۋاشىلىعىمەن اينالىسسا، وسى سالاداعى ءوسىمدى قاداعالاۋى كەرەك. فەرمەرلەر وسى ماقساتتى جۇزەگە اسىرۋى كەرەك. ال قالعان جاعدايدى ۇكىمەت جاساۋى كەرەك»،- دەدى دايرابايەۆ.

ول كەشە مەملەكەت باسشىسى قاسىم-جومارت توقايەۆ ۇكىمەتتىڭ كەڭەيتىلگەن وتىرىسىندا دا بۇل ماسەلەنى ايتقانىن جەتكىزدى.

«ءبىز بۇل ماسەلەنى ۇنەمى ايتامىز. ازىق-تۇلىك قىمباتتاپ كەتتى. قانت تا قىمباتتادى. اۋىل شارۋاشىلىعىنىڭ جاعدايى قيىن ەكەنى راس. وعان تۇبەگەيلى بەتبۇرىس جاسامايتىن بولساق، بۇدان دا قىمباتتايدى. ءبىر قانتتىڭ ءوزىن الساق. رەسپۋبليكادا جامبىل مەن الماتى وبلىسىنداعى قانت زاۋىتتارى تولىق قۋاتىمەن جۇمىس ىستەمەي تۇر. ول قۋاتتىلىعىن ارتتىرسا، قانشا جۇمىس ورنى اشىلاتىن ەدى»،- دەدى جيگۋلي دايرابايەۆ.

ايتا كەتەيىك، 14 شىلدەدە مەملەكەت باسشىسىنىڭ توراعالىعىمەن ۇكىمەتتىڭ كەڭەيتىلگەن وتىرىسى ءوتتى. قاسىم-جومارت توقايەۆ 3 مينيسترگە سوگىس جاريالادى.