«Jibek Joly» تەمىرجول تۋرى ىسكە قوسىلعاننان بەرى 540 تۋريست وسى بىرەگەي باعىتقا بيلەت ساتىپ العان. جوبا ورتالىق ازيانىڭ كورنەكتى برەندى بولا الاتىن پەرسپەكتيۆالىق تۋريستىك ءونىم رەتىندە ءوزىن تانىتتى. بۇل تۋرالى وڭىرلىك كوممۋنيكاسيالار قىزمەتىنىڭ باسپا ءسوز ءماسليحاتىندا «جولاۋشىلار تاسىمالى» اق «وڭتۇستىك» ايماقتىق فيليالىنىڭ ديرەكتورى رۋسلان جالعاسباي ءمالىم ەتتى، دەپ حابارلايدى aqshamnews.kz
ونىڭ ايتۋىنشا، قازىرگى ۋاقىتتا پويىز ۇلى جىبەك جولى بويىنشا ساياحاتى ءساتتى جۇزەگە اسىپ، ونىڭ باعدارلاماسىنا ورتالىق ازيانىڭ ەڭ كونە قالالارىنىڭ ءبىرى تاراز قوسىلدى.
«كەلەسى ساپار ناۋرىز مەرەكەسىنە وراي جوسپارلانعان. تۋر «الماتى – تۇركىستان – تاشكەنت – سامارقاند – تاراز – الماتى» باعىتىن قامتيدى جانە بيلەتتەر تولىعىمەن ساتىلىپ كەتتى. ساپارعا 300 ادام شىعادى دەپ كۇتىلۋدە»، - دەدى رۋسلان جالعاسباي.
ءوز كەزەگىندە «Kazakh Tourism» ۇك» اق باسقارما ءتوراعاسىنىڭ ورىنباسارى دانيەل سەرجان ۇلى قازاقستان مەن وزبەكستاندى بايلانىستىراتىن جوبا وتكەن جىلدىڭ قاراشا ايىندا باستالعانىن ەسكە سالدى. ساياحاتقا قازاقستاندىقتار عانا ەمەس، تۇركيا، قىرعىزستان، ۋكراينا جانە رەسەيدەن كەلگەن تۋريستەر اراسىندا تۇراقتى سۇرانىس بار.
«بۇل جوبا وڭىرلىك ءتۋريزمدى دامىتۋدىڭ جاڭا پەرسپەكتيۆالارىن اشىپ، مادەني بايلانىستاردى نىعايتۋعا جانە تۋريستىك اعىندى كەڭەيتۋگە ىقپال ەتەدى»، - دەپ اتاپ ءوتتى دانيەل سەرجان ۇلى.
بۇل رەتتە، «قازاقستاندىق تۋريزم يندۋسترياسى» رەسپۋبليكالىق قاۋىمداستىعىنىڭ ءتوراعاسى مۋنيرام احمەتوۆانىڭ ايتۋىنشا، حالىقارالىق تۋردىڭ ۇزاقتىعى بەس كۇنگە سوزىلادى. تۋريستەر ەجەلگى قالالاردىڭ اتموسفەراسىنا ەنىپ، ۇلى جىبەك جولىنىڭ ىزىمەن ساياحاتتايدى جانە ەكى ەلدىڭ كورىكتى جەرلەرىن ارالايدى.
«بۇل تۋردىڭ باستى ارتىقشىلىقتارىنىڭ ءبىرى - جايلى تۇرۋ. تۋريستەر دەمالۋعا بارلىق جاعداي جاسالعان پويىزدا تۇنەپ، كۇندىز تاريحي ورىنداردى بەلسەندى تۇردە زەرتتەيدى»، – دەيدى مۋنيرام احمەتوۆا.
ونىڭ ايتۋىنشا، تۋر باعدارلاماسىنا گيد، تاماقتانۋ، كولىك قىزمەتى جانە ەكسكۋرسيالارعا كىرۋ بيلەتتەرى كىرەدى.
وسىلايشا، «جىبەك جولى» ترانسشەكارالىق پويىزى ەلدەر اراسىنداعى تۋريستىك بايلانىستى نىعايتىپ، ءوڭىردىڭ مادەني مۇراسىن تانىمال ەتۋدەگى ماڭىزدى باستاماعا اينالىپ وتىر.
