ەلىمىز بويىنشا وتكىزىلىپ جاتقان "ەسەپتەگى تۇلعا" جەدەل الدىن الۋ ءىس-شاراسى باستالعان ۋاقىتتان بەرى سوتتالعاندار 140 قۇقىق بۇزۋشىلىققا جول بەرگەن.
الماتى قالاسى بويىنشا قاجد-عا قاراستى پروباسيالىق باقىلاۋ قىزمەتىنىڭ تىركەۋىنەن جىل باسىنان بەرى 3 مىڭعا جۋىق سوتتالعان ءوتتى، دەپ حابارلايدى aqshamnews.kz.
- الماتى قالاسى بويىنشا 8 پروباسيالىق باقىلاۋ قىزمەتى بار. 2 ميلليوننان استام تۇرعىنى بار قالا رەسپۋبليكاداعى ەڭ ءىرى قالا بولعاندىقتان سوتتالعاندار سانى دا از ەمەس. "ەسەپتەگى تۇلعا" جەدەل الدىن الۋ ءىس-شاراسى باستالعان 12 اقپاننان باستاپ پروباسيالىق باقىلاۋعا الىنعاندار تاراپىنان پروباسيالىق باقىلاۋ تالابىن بۇزعان 100 سوتتالعان انىقتالدى. سونداي-اق اكىمشىلىك قۇقىق بۇزۋشىلىققا جول بەرگەن 40 سوتتالعان تىركەلسە، سوتقا 44 ماتەريال جىبەرىلدى. ونىڭ باسىم بولىگى باس بوستاندىعىن شەكتەۋ جازاسىن باس بوستاندىعىنان ايىرۋ جازاسىنا اۋىستىرۋ تۋرالى ماتەريالدار، - دەيدى پروباسيالىق باقىلاۋ قىزمەتىنىڭ باستىعى ەرلان ەسمۇراتوۆ.
اتالعان جەدەل الدىن الۋ ءىس-شاراسى اياسىندا قالا بويىنشا رەسيديۆتىك قىلمىستاردىڭ الدىن الۋ، قۇقىق بۇزۋشىلىققا بەيىم سوتتالعانداردى قاداعالاپ، ولاردى تۇراقتى مەكەنجايى بويىنشا تەكسەرۋ جۇمىستارى جالعاسىپ جاتىر.