16 جاستاعى جىبەك قۇلىمبەتوۆا دۋبايدا وتكەن AJP Tour Asia Continental Jiu-jitsu Championship 2023 - Professional جارىسىندا بىردەن ەكى التىن مەدال جەڭىپ الدى، دەپ حابارلايدى Almaty-akshamy.kz.
«كۇلگىن» بەلبەۋدىڭ يەگەرى جىبەك قۇلىمبەتوۆا اتالعان جارىستا ءبىرىنشى التىن مەدالدى ءوز جاسىندا، ياعني، 16-17 جاس ارالىعىندا، ەكىنشى التىن مەدالدى 18 جاستان جوعارى سپورتشىلار اراسىندا جەڭىپ الدى. 18 جاستان جوعارى سپورتشىلار اراسىندا ءۇش كەزدەسۋ وتكىزدى. فينالدا قارسىلاسى وزىنەن 9 جاس ۇلكەن، 25 جاستاعى ارابتىڭ سپورتشىسى مايتا شەرايمدى جەڭدى.
«دۋبايدا وتكەن وسى جارىسقا اتتانار كەزدە پرەزيدەنتىمىز قاسىم-جومارت توقايەۆپەن كەزدەسىپ، سپورتتاعى جەتىستىگىمدى ايتىپ، الداعى جوسپارلارىممەن بولىسكەن ەدىم. قاسىم-جومارت كەمەل ۇلى جارىستارىما ساتتىلىك تىلەپ، ماعان قانات ءبىتىردى. پرەزيدەنتپەن كەزدەسۋ مەن ءۇشىن ۇلكەن موتيۆاسيا بولدى جانە كەرەمەت اسەر الدىم. وسى كەزدەسۋدەن كەيىن جىگەرلەنىپ، دۋبايدا وتەتىن دجيۋ-دجيتسۋدان حالىقارالىق جارىسقا اتتاندىم»، - دەپ جازدى جىبەك Instagram پاراقشاسىندا.