الماتىدا وتكەن "تۇركى الەمىنىڭ مەديا كەڭىستىگى: جاڭا داۋىردەگى مىندەتتەر مەن مۇمكىندىكتەر" اتتى VI حالىقارالىق تۇركىتىلدەس جۋرناليستەر مەديا فورۋمىنىڭ پانەلدىك سەسسياسىندا جاساندى ينتەللەكت پەن مەديا سالاسىنىڭ دامۋ باعىتتارى جان-جاقتى تالقىلاندى.
وسى سالاداعى ساراپشى مامان مەيىرجان اۋەلحان ۇلى ءوز سوزىندە مەملەكەت باسشىسى كەشە عانا "جاساندى ينتەللەكتىنى دامىتۋ تۋرالى" زاڭعا قول قويعانىن اتاپ ءوتىپ، بۇل قۇجاتتىڭ ەلىمىزدەگى سيفرلىق ءداۋىردىڭ جاڭا كەزەڭىن باستاپ بەرگەنىن جەتكىزدى. ول تۇركىتىلدەس جۋرناليستەر قورىنىڭ وسى تاقىرىپتى قوعامدا كەڭىنەن تالقىلانباي تۇرعان كەزەڭنىڭ وزىندە بىرنەشە جىل بويى سەمينارلار مەن فورۋمدار وتكىزىپ، وسى سالاداعى العاشقى پىكىرتالاستارعا جول اشقانىن جەتكىزدى. جاساندى ينتەللەكتتىڭ بۇگىندە جۋرناليستەر ءۇشىن ونىمدىلىكتى ارتتىراتىن، مالىمەتتەردى جەدەل تالدايتىن، كونتەنت ساپاسىن كوتەرەتىن قۋاتتى قۇرالعا اينالعانىن ايتقان ول جاڭا تەحنولوگيانىڭ جاڭا سۇراقتار مەن مىندەتتەر تۋدىراتىنىن، اسىرەسە ەتيكالىق نورمالار، اقپاراتتىق قاۋىپسىزدىك، ديپفەيكتەر ماسەلەسى، جۋرناليستەردىڭ كاسىبي ءرولى سياقتى باعىتتاردا ورتاق جاۋاپكەرشىلىك قاجەت ەكەنىنە توقتالدى.
سەسسيا بارىسىندا ءسوز العان قانات ەسىركەپوۆ جاساندى ينتەللەكتتىڭ كونتەنت جاساۋ پروسەسىندەگى پراكتيكالىق تيىمدىلىگىن ناقتى مىسالدارمەن ءتۇسىندىردى. ونىڭ ايتۋىنشا، جي ءجۋرناليستىڭ جۇمىس ونىمدىلىگىن 30-40 پايىزعا دەيىن ارتتىرىپ، رەداكسيالىق وڭدەۋگە كەتەتىن ۋاقىتتى ەداۋىر قىسقارتادى. جي اسىرەسە دەرەكتەرگە نەگىزدەلگەن جاڭالىقتاردى، ماسەلەن، قارجى ەسەپتەرىن، سپورت ناتيجەلەرىن، اۋا رايى مالىمەتتەرىن بىردەن گەنەراسيالاي الادى. ول جي-اۆاتارلار ارقىلى جەكە كونتەنتتى جاپپاي ءوندىرۋ مۇمكىندىگىن، N8N مەن MAKE پلاتفورمالارى ارقىلى رەداكسيانىڭ ىشكى پروسەستەرىن تولىق اۆتوماتتاندىرۋعا بولاتىنىن كورسەتتى. سونىمەن قاتار كاسىبي مەديادا كەڭ قولدانىلىپ جاتقان DeepL، Descript، ElevenLabs سياقتى قۇرالدار مەن فاكچەكينگكە ارنالعان جاڭا تەحنولوگيالاردى تانىستىردى. سپيكەر ءجي-دىڭ ەتيكالىق تاۋەكەلدەرىن دە نازاردان تىس قالدىرماي، جالعان اقپارات پەن ديپفەيكتەردىڭ كۇرت كوبەيۋى مەدياعا دەگەن سەنىمگە ءقاۋىپ توندىرەتىنىن ءتۇسىندىردى. سونداي-اق جاساندى ينتەللەكت مامانداردى الماستىرمايتىنىن، ءبىراق جاڭا تەحنولوگيانى قولدانباعان مامانداردىڭ ەڭبەك نارىقتا باسەكەگە قابىلەتسىز قالۋى مۇمكىن ەكەنىن ايتادى.
سونىمەن بىرگە مادينا مانسۋروۆا ءوز بايانداماسىندا جي اگەنتتەرىنىڭ ارحيتەكتۋراسىنا توقتالدى. ونىڭ ايتۋىنشا، Agentic AI قاعيداتى قابىلداۋ، جوسپارلاۋ جانە ارەكەت ەتۋ سيكلدارى ارقىلى اۆتونومدى جۇمىس ىستەيتىن جۇيە اتاپ ءوتىپ، جي اگەنتتەرىنىڭ نەگىزگى كوگنيتيۆتىك يادروسى ۇلكەن تىلدىك مودەل ەكەنىن جەتكىزدى. بۇل ورايدا ول جەتەكشى حالىقارالىق تەحنوكومپانيالاردىڭ اگەنتتەر ەكوجۇيەسىن جىلدام دامىتىپ جاتقانىن مىسالعا كەلتىردى.
2024-2026 جىلدارعا ارنالعان "قازاق ءتىلىن جانە تەحنولوگيالىق پروگرەستى قولداۋ ءۇشىن ۇلكەن تىلدىك مودەل قۇرۋ" جونىندەگى نىسانالى باعدارلامانى تانىستىرعان ساراپشى بۇل جوبانىڭ قازاق تىلىندەگى زاماناۋي جي مودەلىن ازىرلەۋگە باعىتتالعانىن جەتكىزدى. KazLLM ءۇشىن 150 ميللياردتان استام توكەن جينالعانىن، دەرەكتەر بازاسىندا قازاق تىلىندەگى ساپالى كونتەنتتىڭ باسىمدىعىن، قازۇۋ كىتاپحاناسىنىڭ 8000-نان استام كىتابى سيفرلاندىرىلعان. تەحنيكالىق تۇرعىدا ReAct ارحيتەكتۋراسى، NVIDIA DGX H200 جانە NVIDIA L40 سەكىلدى قۋاتتى ينفراقۇرىلىم قولدانىلادى. ونىڭ سوزىنشە، بۇل جوبانىڭ العاشقى ناتيجەلەرى كۇردەلى تاپسىرمالاردى، مىسالى، گازەت ماتەريالدارىن قۇرىلىمدىق فورماتقا اۆتوماتتى تۇردە ءبولىپ شىعۋدى جۇزەگە اسىرۋعا مۇمكىندىك بەرىپ وتىر.
سەسسيا بارىسىندا ساراپىلار جاساندى ينتەللەكتتىڭ مەديا سالاسىنا تيگىزەر ىقپالىنىڭ زور ەكەنىن، كونتەنت وندىرۋشىلەر ءۇشىن جاڭا مۇمكىندىك اشاتىنىن كورسەتتى.