ولار جەلتوقسان ايىنان مامىر ايىنا دەيىن ءونىم الادى.
الماتى وبلىسى كوكسۋ اۋدانىندا جيدەك ونىمدەرىمەن اۋدان حالقىن قامتاماسىز ەتۋ ءۇشىن بيىل العاش رەت 0،25 گا جەرگە جاڭا ادىسپەن قۇلپىناي وسىرىلە باستادى. جىلىجايدا عىلىم مەن تەحنيكا جەتىستىكتەرىن قولدانۋ ارقىلى وڭتۇستىك كورەيالىق «سولحيان» سۇرپى ەگىلگەن، دەپ حابارلايدى Almaty-akshamy.kz الماتى وبلىسى اكىمىنىڭ باسپا ءسوز قىزمەتىنە سىلتەمە جاساپ.
سەرىكتەستىك باسشىسى سۆەتلانا زۋبوۆيچ جىلىجايدا كوك جۋا، گۇلدىڭ سان الۋان ءتۇرىن وسىرۋمەن قاتار بيىلعى جىلى العاش رەت جاڭا ادىسپەن قۇلپىناي ەگۋدى باستاعانىن ايتادى. ماۋسىمدىق جۇمىستار كەزىندە 10-عا جۋىق ادامدى، تۇراقتى جۇمىسپەن 2 ادامدى قامتىپ وتىر. جىلىجاي ورنالاسقان بالپىق بي اۋىلى وبلىس ورتالىعىنان الىس ەمەس. سوندىقتان تۇتىنۋشى تابۋدا قيىندىق جوق. سەبىلگەن قۇلپىنايدىڭ كورەيالىق تۇقىمى قىستىق سورت. جەلتوقسان ايىنان مامىر ايىنا دەيىن ءونىم بەرەدى.
«بيىل العاشقى ءونىم بولعاندىقتان، 700 كگ قۇلپىناي الۋدى جوسپارلاپ وتىرمىز. قۇلپىناي وزگە كوكونىستەر سەكىلدى كوپ جىلۋدى قاجەت ەتپەيدى. بار بولعانى 5-6 گرادۋس جىلىلىقتا ءوسىپ شىعادى. ال قىستىڭ ايازدارىندا 10-15 گرادۋس جىلى بولسا جەتكىلىكتى. قۇلپىنايدىڭ ۇلكەنىنىڭ سالماعى 50-55 گرامعا جەتەدى. وڭىردەگى بىردەن-بىر قۇلپىناي وسىرەتىن جىلىجاي بولعاندىقتان، سۇرانىس جوعارى بولادى دەپ ويلاپ وتىرمىز. الداعى ۋاقىتتا ءونىمدى ارتتىرۋعا جۇمىس جاسايمىز. دەگەنمەن مول ءونىم الۋ ءۇشىن جىلىجايدىڭ جىلىتۋ جۇيەسىن كوگىلدىر وتىنعا اۋىستىرۋ قاجەت. قولبايلاۋ بولىپ وتىرعان جالعىز جاي وسى عانا. بۇل ماسەلەدە كوكسۋ اۋدانىنىڭ اكىمدىگى قولۇشىن بەرۋگە دايىن ەكەندىكتەرىن ايتتى، - دەدى سەرىكتەستىك باسشىسى سۆەتلانا زۋبوۆيچ.
الداعى ۋاقىتتا نىسانعا تابيعي گاز تارتىلسا، سەرىكتەستىك جىلىجاي اۋقىمىن كەڭەيتىپ، قيار مەن قىزاناق ءوسىرىپ، جاڭا جۇمىس ورىندارىن اشۋدى جوسپارلاپ وتىر.
«نەگىزىنەن اۋداندا قۇلپىناي بيزنەسى دامىماعان، نارىقتا كوبىنەسە شەتتەن اكەلىنگەن قۇلپىناي ساۋدالانادى. الداعى ۋاقىتتا جيدەك داقىلدارىنىڭ، ونىڭ ىشىندە باقشا قۇلپىنايىنىڭ اسسورتيمەنتىن كەڭەيتۋ مەن ونىمدىلىگىن ارتتىرۋدى ماقسات ەتىپ وتىرمىز. وسى جوبانى جۇزەگە اسىرۋ ارقىلى اۋدان حالقىن وتاندىق ونىممەن قامتۋ مۇمكىندىگى ارتادى. جوبا ءساتتى جۇزەگە اساتىن بولسا، جاڭا تەحنولوگيا وزگە دە ەلدى مەكەندەردەگى فەرمەرلىك شارۋاشىلىقتارعا ەنگىزىلەتىن بولادى»، - دەيدى كوكسۋ اۋدانى اكىمىنىڭ ورىنباسارى ۇلان دوسىمبەكوۆ.
