جەتىسۋ وبلىسىندا جالپى قۇنى 9 ميلليون تەڭگەدەن اساتىن ەكى ءىرى مال ۇرلىعىنىڭ فاكتىسى انىقتالدى، دەپ حابارلايدى Aqshamnews.kz ءتىلشىسى.
7 ماۋسىم كۇنى كوكسۋ اۋدانىنا قاراستى مۇقانشى اۋىلدىق وكرۋگىنىڭ جايىلىمىنان بەلگىسىز ادامدار 9 باس ءىرى قارانى ۇرلاپ كەتكەن. جابىرلەنۋشىگە كەلتىرىلگەن شىعىن 2،5 ميلليون تەڭگەگە باعالانعان.
بىرنەشە كۇننەن كەيىن العاباس اۋىلدىق وكرۋگىندە تاعى ءبىر ۇرلىق تىركەلىپ، بۇل جولى 14 باس ءىرى قارا قولدى بولدى. مال يەسىنە كەلگەن شىعىن 7 ميلليون تەڭگەدەن استى.
جەدەل-ىزدەستىرۋ بارىسىندا پوليسيا قىزمەتكەرلەرى 51 جانە 37 جاستاعى ەكى كۇدىكتىنى ۇستادى. ەكەۋى دە اۋداننىڭ تۇرعىنى ەكەنى بەلگىلى بولدى.
كۇدىكتىلەر ۇرلانعان مالدى MAN ماركالى جۇك كولىگىمەن تاسىمالداماق بولعان. كولىك توقتاتىلعان كەزدە ونىڭ ىشىنەن جوعالعان 14 باس ءىرى قارا تابىلدى. سونىمەن قاتار، مالدى ساتىپ الماقشى بولعان الماتى وبلىسىنىڭ تۇرعىنى دا قولعا ءتۇستى.
اتالعان دەرەكتەر بويىنشا ق ر قىلمىستىق كودەكسىنىڭ مال ۇرلىعىنا قاتىستى بابىمەن ءىس قوزعالدى. بۇل باپقا سايكەس، 3 جىلدان 7 جىلعا دەيىن باس بوستاندىعىنان ايىرۋ جانە مۇلكىن تاركىلەۋ جازاسى قاراستىرىلعان.
قازىرگى ۋاقىتتا تەرگەۋ امالدارى جالعاسىپ جاتىر. پوليسيا ۇستالعانداردىڭ باسقا دا ۇقساس قىلمىستارعا قاتىسى بار-جوعىن انىقتاپ جاتىر.