جەتىسۋ پوليسەيلەرى كۇزەتشىنى توناعان كۇدىكتىنى ۇستادى

قازىرگى ۋاقىتتا تەرگەۋ امالدارى جۇرگىزىلىپ جاتىر.

الماتى وبلىسىنىڭ پوليسەيلەرى كۇزەتشىگە شابۋىل جاساپ، توناعان ازاماتتى ۇستاعان، دەپ حابارلايدى Almaty-akshamy.kz.

ىشكى ىستەر مينيسترلىگى رەسمي سايتىنىڭ دەرەگى بويىنشا، كەزەكشىلىك كەزىندە قۇرىلىس كومپانياسىنىڭ كۇزەتشىسىنە شابۋىل جاسالعان. پوليسياعا شاقىرۋ تالدىقورعان قالاسىنداعى اۋرۋحانادان كەلىپ ءتۇستى، وندا دەنە جاراقاتتارىن العان ەر ادام جەتكىزىلگەن.

اۋرۋحاناعا كەلگەن ءتارتىپ ساقشىلارى 67 جاستاعى جەرگىلىكتى تۇرعىننان ارىز قابىلدادى. ونىڭ ايتۋىنشا، بەيتانىس ەر ادام كۇزەت كۇركەسىندە ونى ۇرىپ-سوعىپ، ۇيالى تەلەفونىن، كيىمدەرىن، اقشاسى بار ءاميانىن الىپ كەتكەن. جالپى شىعىن سوماسى 97 500 تەڭگەنى قۇرادى.

«وقيعا ورنىنا جەدەل تەرگەۋ توبى دەرەۋ شىقتى. ودان ءارى وقيعا ورنىندا 33 جاستاعى كۇدىكتى ازامات ۇستالدى. ول بۇرىن ءارتۇرلى باپتار بويىنشا جاۋاپقا تارتىلعان شقو تۋماسى بولىپ شىقتى. قازىرگى ۋاقىتتا تەرگەۋ امالدارى جۇرگىزىلۋدە»، – دەدى تالدىقورعان قالالىق پوليسيا باسقارماسىنىڭ شىعىس پوليسيا ءبولىمى باستىعىنىڭ مىندەتىن اتقارۋشى باقىتجان تولەگەن.

مامانداردىڭ ايتۋىنشا، ۇستالعان ازامات كىناسىن مويىنداعان. ءقازىر ول قاماۋدا وتىر.