بۇل حاب 1500 ادامعا جۇمىس بەرەدى.
الماتى وبلىسىندا ا+ كلاستى اۆتوماتتاندىرىلعان، الاڭى 200 مىڭ شارشى مەتر بولاتىن قازاقستانداعى ءىرى لوگيستيكالىق حاب سالىنادى. سونىڭ ناتيجەسىندە وبلىسقا 200 ملن اقش دوللارى كولەمىندە ينۆەستيسيا تارتىلىپ، 1،5 مىڭ جۇمىس ورنى اشىلادى، دەپ حابارلايدى Almaty-akshamy.kz.
الماتى وبلىسى اكىمىنىڭ باسپا ءسوز قىزمەتىنىڭ حابارلاۋىنشا، وبلىس اكىمى قانات بوزىمبايەۆ پەن «AIRBA FF» ج ش س ديرەكتورلار كەڭەسىنىڭ ءتوراعاسى، «تەحنودوم» كومپانياسىنىڭ نەگىزىن سالۋشى ەدۋارد كيم وسىنداي مەموراندۋمعا قول قويدى.
كەزدەسۋدە قانات بوزىمبايەۆ وسى ءىرى ينۆەستيسيالىق جوبانى ىسكە اسىرۋ ءوڭىردىڭ لوگيستيكالىق الەۋەتىن دامىتىپ قانا قويماي، تۇتاستاي العاندا وبلىس ەكونوميكاسىنا مۋلتيپليكاتيۆتى ناتيجە بەرەتىنىنە اتاپ ءوتتى.
«بۇل - بۇرىن الماتى وبلىسىندا بولماعان وتە تارتىمدى ءارى ماڭىزدى جوبا. زاماناۋي سيفرلىق تەحنولوگيالاردى قولدانۋ ەرەكشەلىگىن ەسكەرسەك، ناعىز جاڭا داۋىرگە لايىق دەۋگە بولادى. بىرىنشىدەن، ءبىزدىڭ اگرارلىق سالاداعى شارۋاشىلىقتارىمىزدىڭ ءوز ءونىمىن وتكىزۋىنە جاعداي جاسايدى. ەلىمىزدىڭ اگروونەركاسىپتىك كەشەنىندەگى ءونىم كولەمىنىڭ 28-30%ء-ىن الماتى وبلىسى وندىرەتىنىن ەسكەرسەك، بۇل - ءبىز ءۇشىن ۇلكەن مۇمكىندىك. ەكىنشىدەن، شاعىن جانە ورتا بيزنەستى قارجىلاي قولداۋعا جاڭا مۇمكىندىكتەر اشادى. سونىمەن قاتار ينۆەستور كومپانيا تالدىقورعان قالاسىنداعى كوللەدجدەردىڭ ءبىرىنىڭ بازاسىندا ءىت ماماندار دايىندايتىن وقۋ ورتالىعىن اشادى. بۇل سيفرلىق ماشىقتارىن جەتىلدىرىپ، ءدۋالدى وقىتۋدى دامىتۋعا ىقپال ەتەدى. ارينە، ءوڭىر ەكونوميكاسى ءۇشىن سالىق تۇسىمدەرى دە ماڭىزدى. دەگەنمەن ءبىز ءۇشىن حالىقتىڭ مۇددەسى الدىڭعى ورىندا. كەشەن 1500 ادامعا جۇمىس بەرەدى. نىسان ورنالاساتىن ىلە اۋدانىندا 300 مىڭنان استام ادام تۇرادى، ال وبلىستاعى حالىق سانى 2 ملن 200-گە جەتتى. لوگيستيكالىق كەشەن جاڭا جۇمىس ورىندارىنىڭ اشىلۋىنا، زاماناۋي تەحنولوگيالار مەن قارجىلاي قولداۋ قۇرالدارى اياسىنىڭ كەڭەيۋىنە جاعداي جاسايدى. جوباعا بارلىق كەزەڭىندە بارىنشا قولداۋ كورسەتەتىن بولامىز»، - دەدى قاناتبوزىمبايەۆ.
قول جەتكىزىلگەن كەلىسىمگە سايكەس، ماڭىزدى ينۆەستيسيالىق جوبا الداعى 5 جىلدا بىرنەشە كەزەڭمەن ىسكە اسىرىلادى.
كەشەن ىلە اۋدانىندا ورنالاسپاق.
ءوزىنىڭ نەگىزگى فۋنكسياسىمەن قاتار نىسان كليەنتتەر تارتۋ مەن ونىمدەردى ورنالاستىرۋعا ارنالعان «Airba Marketplace» ونلاين-سورەسىن پايدالانۋعا جاعداي تۋعىزادى. سول سياقتى «Airba Fintech» ونلاين-پلاتفورماسىنىڭ مۇمكىندىكتەرىن پايدالانا وتىرىپ، اۋىل شارۋاشىلىعى تاۋار وندىرۋشىلەرى جەڭىلدىكپەن قارجىلاندىرۋ مەن اينالىم قارجىسىن تولىقتىرۋعا قول جەتكىزە الادى، ءوز تاۋارلارىن دەلدالداردىڭ قاتىسۋىنسىز ءىرى ساۋدا جەلىلەرىندە ساتۋ جونىندەگى كەلىسىمشارتتار جاساسا الادى، ال جاس ماماندار تۇرعىن ءۇي ساتىپ الۋعا نەمەسە باسپانا جاعدايىن جاقسارتۋعا قولجەتىمدى يپوتەكا الا الادى. بۇل قىزمەتتەرگە جۇگىنۋ ءۇشىن قارجى ينستيتۋتتارىنا بارۋدىڭ، مالىمەتتەردى قاعاز جۇزىندە اپارۋدىڭ قاجەتى جوق، قىزمەتتەر ونلاين-رەجيمدە كورسەتىلەدى.