جىل سوڭىنا دەيىن 12 بلوك-مودۋلدى مەديسينالىق كەشەندەر ىسكە قوسىلماق
اۋىلدىق جەرلەردەگى مەديسينالىق قىزمەت ساپاسىن جاقسارتۋ ماقساتىندا قولعا الىنعان قۇرىلىس نىسانى الاكول اۋدانىنىڭ كوكجار اۋىلىندا تۇرعىزىلدى. بۇل - وبلىستا بيىلعا بمك-دان سالۋ جوسپارلانعان ون ەكى مەكەمەنىڭ جەتىنشىسى، دەپ حابارلايدى Almaty-akshamy.kz جەتىسۋ وبلىسى اكىمىنىڭ باسپا ءسوز قىزمەتىنە سىلتەمە جاساپ.
اۋىل تۇرعىندارىنىڭ قۋانىشىنا ورتاقتاسقان اۋدان اكىمى الماس ءابدينوۆ، جىلاندى اۋىلىنىڭ ارداگەرلەر كەڭەسىنىڭ مۇشەسى مۇراتحان مەرەيەۆ، ەڭبەك ارداگەرى ءىلياس قاسىموۆ كوپشىلىككە ىزگى تىلەكتەرىن ءبىلدىردى.
عيماراتتىڭ لەنتاسى قيىلعان سوڭ كەلۋشىلەر مەكەمەنىڭ ءىشىن ارالاپ كوردى. بۇل مەديسينالىق پۋنكت كوكجار اۋىلىنىڭ 160 تۇرعىنىنا قىزمەت كورسەتەدى.
جوبانىڭ جالپى قۇنى – 39 ملن. تەڭگە. عيماراتتىڭ اۋماعى – 108 شارشى مەتر. 12 تۇرعىنجايى بار، اتاپ ايتقاندا ۆەستيبيۋل، ءدالىز، ءدارىحاناسى بار تىركەۋ ورنى، اكۋشەرلىك قابىلداۋ بولمەسى، ەگۋ بولمەسى، پروسەدۋرالىق كابينەت، ماتەريالدار الۋ مەن زەرتتەۋ بولمەسى، ورتا مەديسينالىق قىزمەتكەرلەر بولمەسى، 2 دارەتحانا بولمەسى، سول سياقتى باسقا دا تۇرمىستىق-شارۋاشىلىق قاجەتتىلىكتەگى تۇرعىنجايلارى بار. ىستىق سۋ، جىلۋ جۇيەسى جۇرگىزىلگەن، جەلدەتكىش ورناتىلعان.
جالپى جىل سوڭىنا دەيىن وڭىردە تاعى 5 بلوك-مودۋلدى كەشەندى ىسكە قوسۋ جوسپارلانعان. اقسۋ، الاكول، ەسكەلدى، كوكسۋ، قاراتال جانە كەربۇلاق اۋداندارىندا جالپى قۇنى 900 ملن.تەڭگە بولاتىن بارلىعى 12 نىسان جوسپارلانعان. مامانداردىڭ ايتۋىنشا، بلوك-مودۋلدى كەشەندەر بەرىك، قاراپايىم ورناتىلاتىن، ۇزاق قىزمەت ەتەتىن قۇرىلىس ءتۇرى. سونىمەن بىرگە قولايسىز اۋا رايىنا توتەپ بەرە الادى، ولاردىڭ قىزمەت ەتۋ مەرزىمى 30 جىل دەپ مەجەلەنەدى.