الاكول اۋدانىندا پوليسەيلەر جول-كولىك وقيعالارىنان قازا تاپقانداردى ەسكە الۋ اپتالىعى اياسىندا "جارىق شام" اكسياسىن وتكىزدى.
ءىس-شارانىڭ ماقساتى – جولداردا ءومىرى ۇزىلگەن ازاماتتاردى قۇرمەتپەن ەسكە الۋ جانە قوعام نازارىن جول قوزعالىسى ەرەجەلەرىن قاتاڭ ساقتاۋعا اۋدارۋ. اكسيا بارىسىندا پوليسەيلەر جول-كولىك وقيعالارىندا قازا بولعانداردى ءبىر مينۋت ۇنسىزدىكپەن ەسكە الدى.
ءاربىر جول قوزعالىسىنا قاتىسۋشىنىڭ جەكە جاۋاپكەرشىلىگىنىڭ جوعارى بولۋى كەرەكتىگىن، ال جولداعى قاۋىپسىزدىك بارلىق ساناتتاعى جۇرگىزۋشىلەردىڭ، جاياۋ جۇرگىنشىلەردىڭ تىكەلەي جاۋاپكەرشىلىگى. سونىمەن قاتار بالالارعا جول مادەنيەتىن ۇيرەتۋ – اتا-انالاردىڭ باستى مىندەتى ەكەنىن اتاپ ءوتتى. ءىس-شارانىڭ تاعى ءبىر ماڭىزدى بولىگى – پوليسيا قىزمەتكەرلەرىنىڭ شىعارماشىلىق ورىنداۋى بولدى.
ولار جول قاۋىپسىزدىگى تاقىرىبىنا ارنالعان اۆتورلىق ءان جازىپ، ونى كوپشىلىككە ۇسىندى. اندە ماگيسترال، موپەد، ادام ءومىرىن جالماعان قاتەلىكتەر مەن قۇقىق بۇزۋشىلىقتار، زاڭ مەن ءتارتىپتىڭ قۇندىلىعى تۋرالى جۇرەككە جەتەتىن جولدار ورىندالدى. مۋزىكا ارقىلى پوليسەيلەر قاراپايىم، ءبىراق وتە ماڭىزدى ويدى جەتكىزدى.
ءاربىر ادام ءومىرى – باعا جەتپەس، ال قايعىلى جاعدايدىڭ الدىن الۋ – ءاربىرىمىزدىڭ قولىمىزدا. پوليسيا مۇنداي ءىس-شارالار قوعامدا جول ەرەجەلەرىنە جاۋاپكەرشىلىكپەن قاراۋدى قالىپتاستىرۋعا جانە تۇرعىندار مەن قۇقىق قورعاۋ ورگاندارىنىڭ ءوزارا بايلانىسىن نىعايتۋعا ىقپال ەتەتىنىن اتاپ ءوتتى. قازا تاپقانداردى ەسكە الۋ – جول قوزعالىسى ەرەجەلەرىن ساقتاۋ فورمالدى ەمەس، كۇندەلىكتى ءومىر نورماسى بولۋى ءتيىس ەكەنىن ەسكە سالادى.