بيىل اۋىل شارۋاشىلىعى ءونىمىنىڭ جالپى كولەمى جارتى تريلليون تەڭگەدەن استى
جەتىسۋ وبلىسىندا جاڭبىرلاتىپ سۋارۋ قوندىرعىلارىن قۇراستىراتىن ءوندىرىس ورنى اشىلادى. ونىڭ قۇنى سىرتتان ساتىپ الىناتىن وسىنداي قۇرىلعىلارعا قاراعاندا ەكى ەسە تومەن بولادى، دەپ حابارلايدى Almaty-akshamy.kz.
قازىرگى كەزدە وسى ماقساتتا تۇركيادان كەلگەن ينۆەستورلارمەن ىسكەرلىك كەلىسسوزدەر جۇرگىزىلۋدە. كاسىپورىن تالدىقورعاندا ورنالاسادى دەپ جوسپارلانىپ وتىر. وبلىس اكىمى بەيبىت يسابايەۆ اۋىل شارۋاشىلىعى قىزمەتكەرلەرى كۇنىنە ارنالعان سالتاناتتى جيىن بارىسىندا وڭىردە سۋارمالى سۋ تاپشىلىعى پروبلەماسىن، ونى ىلعال ۇنەمدەيتىن تەحنولوگيالاردى ەنگىزۋ ەسەبىنەن شەشۋ جوسپارلارىمەن ءبولىستى. ونىڭ ايتۋىنشا، الداعى 3 جىلدا وڭىردە سۋ ۇنەمدەۋ تەحنولوگيالارىن قولدانۋ الاڭىن 12 مىڭ گەكتارعا دەيىن جەتكىزۋ جوسپارلانىپ وتىر، بۇل رەتتە جاڭبىرلاتىپ سۋارۋ ماشينالارى مەن تامشىلاتىپ سۋارۋ جۇيەلەرىن ساتىپ العان شارۋاشىلىقتاردىڭ شىعىندارىنىڭ 50%-ى ينۆەستيسيالىق سۋبسيديالاۋ باعدارلاماسى بويىنشا سۋبسيديالانادى.
بەيبىت يسابايەۆتىڭ ايتۋىنشا، وبلىستا توزعان سۋارۋ جەلىلەرى شامامەن 70%، سولاردى قايتا جاڭعىرتۋ جۇمىستارى جالعاسىپ جاتىر. سۋ شارۋاشىلىعى وبەكتىلەرىن قالپىنا كەلتىرۋ ءۇشىن رەسپۋبليكالىق جانە جەرگىلىكتى بيۋدجەتتەن، سونداي-اق يسلام دامۋ بانكىنەن 36،3 ملرد تەڭگەدەن استام قاراجات تارتىلدى، قولدانىستاعى 1400 كم سۋارۋ جەلىلەرىن جوندەۋ جانە 105 كم جاڭا سۋارۋ جەلىلەرىن (قىزىلاعاش سۋارۋ الابى) سالۋ جۇمىستارى جۇرگىزىلۋدە. بۇگىنگى تاڭدا جوندەۋ-قالپىنا كەلتىرۋ جۇمىستارى وبلىستىڭ بارلىق اۋداندارىندا، سونداي-اق تالدىقورعان قالاسىندا اتقارىلۋدا. سونىڭ ناتيجەسىندە 26،5 مىڭ گەكتار سۋارمالى جەر قالپىنا كەلتىرىپ، جاڭادان 4،5 مىڭ گا جەر اينالىمعا تارتىلادى.
- بيىلعى جىلى اۋىل شارۋاشىلىعى ءونىمىنىڭ جالپى كولەمى جارتى تريلليون تەڭگەدەن استى. ءوڭىر شارۋالارى 828 مىڭ توننا استىق، 202 مىڭ توننا مايلى داقىلدار، 182 مىڭ توننا قانت قىزىلشاسى، 523 مىڭ توننا كارتوپ پەن كوكونىس، 44 مىڭ توننا باقشا ونىمدەرى مەن جەمىس-جيدەك جينادى. مال مەن قۇس باسى 1،4%-عا، ەت پەن ءسۇت ءوندىرىسى 4،5%-عا ءوستى. ازىق-تۇلىك جانە قايتا وڭدەۋ ونەركاسىبىندە جەتىسۋ وبلىسى قانت، سارى ماي، كراحمال، اشىتقى ءوندىرۋ جاعىنان ەلىمىزدە الدىڭعى ورىندا. وسى جىلى وبلىستىڭ 150 قايتا وڭدەۋ كاسىپورنى وندىرىلگەن ازىق-تۇلىك كولەمىن 9،6%-عا ۇلعايتتى. وسى جەتىستىكتەردىڭ ءبارلىعى-وڭىردىڭ اۋىل شارۋاشىلىعى تاۋارىن وندىرۋشىلەرىنىڭ كۇندەلىكتى قاجىرلى ەڭبەگىنىڭ ناتيجەسى، - دەپ اتاپ ءوتتى ب. يسابايەۆ.
ءوڭىر باسشىسى مەملەكەتتىك قولداۋ شارالارىنا توقتالىپ، مال شارۋاشىلىعىن دامىتۋ پەرسپەكتيۆالارى، قانت ءوندىرىسى سالاسىن ىلگەرىلەتۋ، ازىق-تۇلىك قاۋىپسىزدىگىن قامتاماسىز ەتۋ جونىندەگى الداعى جوسپارلار تۋرالى دا ايتتى. ماسەلەن، الداعى 4 جىلدا وڭىردە قىزىلشا ەگىلەتىن القاپتىڭ كولەمىن 15 مىڭ گەكتارعا، ال جالپى قىزىلشا جيناۋ كولەمىن 525 مىڭ تونناعا جەتكىزۋ جوسپارلانىپ وتىر. وعان اگروتەحنولوگيالاردى ءتيىمدى قولدانۋدىڭ ارقاسىندا قول جەتكىزىلمەك.
سول سياقتى وڭىردە ۆەتەريناريالىق قاۋىپسىزدىكتى قامتاماسىز ەتۋدىڭ بارلىق شارالارى قابىلدانۋدا. وسى ماقساتتا بيىل 5 اۋداندا مودۋلدىك ۆەتەريناريالىق پۋنكتتەر اشىلدى، ۆەتەرينار مامانداردىڭ جالاقىسى 30%-عا ارتتى، ال 2023 جىلى تاعى دا وسىنداي كولەمگە ۇلعايتىلاتىن بولادى. بۇدان باسقا، قاجەتتى اۆتوكولىكپەن قامتاماسىز ەتۋ جانە قوسىمشا مودۋلدىك ۆەتپۋنكتتەردى اشۋ ءۇشىن قارجىلىق قولداۋ كولەمى 3،7 ملرد. تەڭگەگە جەتكىزىلدى، بۇل ۆەتەرينار مامانداردىڭ جاۋاپكەرشىلىگىن ارتتىرىپ، ولاردىڭ قىزمەت كورسەتۋ ساپاسىن جاقسارتۋعا ىقپال ەتۋى ءتيىس.