جەتىسۋ وبلىسىندا جاڭا مەكتەپ سالۋعا 2،6 ملرد تەڭگە ءبولىندى

جەتىسۋ وبلىسى رۋدنيچنىي اۋىلىنداعى اپاتتى جاعدايدا تۇرعان مەكتەپتىڭ ورنىنا جاڭا عيمارات سالۋعا 2،6 ملرد تەڭگە ءبولىندى

مەملەكەت باسشىسىنىڭ تاپسىرماسى بويىنشا «زاڭسىز يەمدەنىلگەن اكتيۆتەردى مەملەكەتكە قايتارۋ تۋرالى» زاڭ شەڭبەرىندە ارناۋلى مەملەكەتتىك قور قاراجاتى ەسەبىنەن جەتىسۋ وبلىسى رۋدنيچنىي اۋىلىندا اپاتتى جاعدايداعى مەكتەپتىڭ ورنىنا جاڭا عيمارات سالىنادى. ۇكىمەت بۇل جوبانى جۇزەگە اسىرۋعا 2،6 ملرد تەڭگە ءبولۋ تۋرالى شەشىم قابىلدادى، دەپ حابارلايدى aqshamnews.kz

1969 جىلى سالىنعان ورتا مەكتەپتىڭ ەسكى عيماراتىندا 140-تان استام بالا ءبىلىم الۋدا. 55 جىلدان بەرى ءبىلىم وشاعى ەشقانداي كۇردەلى جوندەۋ جۇرگىزىلمەگەن. قازىرگى ۋاقىتتا مەكتەپ اپاتتى جاعدايدا: سۋ جانە كارىز قۇبىرلارى توزعان، جىلۋ جۇيەسى زاقىمدانعان. جالپى، عيماراتتىڭ فيزيكالىق توزۋ دەڭگەيى 40%-دى قۇرايدى.

جاڭا مەكتەپ 200 ورىنعا ەسەپتەلگەن، 30 ورىندىق شاعىن دايىندىق ورتالىعى بولادى. رۋدنيچنىي اۋىلىندا بارلىعى 1 مىڭنان اسا ادام تۇرادى، ونىڭ 241ء-ى مەكتەپكە دەيىنگى جانە مەكتەپ جاسىنداعى بالالار.  

ءبىلىم بەرۋ نىسانىنىڭ قۇرىلىسى ورىن تاپشىلىعى ماسەلەسىن شەشۋگە سەپتىگىن تيگىزىپ، بالالاردىڭ زاماناۋي تالاپتارعا ساي ءبىلىم الۋىنا قاجەتتى قولايلى جاعداي جاسايدى.

بۇعان دەيىن ۇكىمەت پەتروپاۆلدا بالاباقشا، اتىراۋ وبلىسىنداعى جامانسور اۋىلىندا جانە ۇلىتاۋ وبلىسىنىڭ مىڭادىر ستانساسىندا مەكتەپ، استانادا تىرەك-قيمىل اپپاراتى بۇزىلعان بالالارعا ارنالعان وڭالتۋ ورتالىعى، اقتوبە قالاسىندا ەرەكشە بالالارعا ارنالعان ارنايى بالاباقشا، اقمولا وبلىسىنىڭ زەرەندى اۋىلىندا سپورت كەشەنىن سالۋعا، ريددەر قالاسىندا كوپسالالى اۋرۋحانا كەشەنىنىڭ قۇرىلىسىن اياقتاۋعا جانە باسقا دا جوبالاردى جۇزەگە اسىرۋعا قارجى بولگەن بولاتىن.