جىل قورىتىندىسى: الەۋمەتتىك باعدارلامالار، جۇمىسپەن قامتۋ جانە ەڭبەك قۇقىعىن قورعاۋ سالاسىنداعى جەتىستىكتەر

2024 جىلى قازاقستان رەسپۋبليكاسى ەڭبەك جانە حالىقتى الەۋمەتتىك قورعاۋ مينيسترلىگى مەملەكەت باسشىسى قاسىم-جومارت توقايەۆ ايقىنداعان مەملەكەتتىك الەۋمەتتىك ساياساتتىڭ نەگىزگى باعىتتارىن ىسكە اسىرۋ، حالىقتىڭ ءومىر ءسۇرۋ دەڭگەيىن جاقسارتۋ جانە ەڭبەك سالاسىنداعى ادىلەتتىلىكتى قامتاماسىز ەتۋ جونىندە كەشەندى شارالار قابىلداي وتىرىپ، جۇمىستى جالعاستىردى.

سونىڭ شەڭبەرىندە الەۋمەتتىك قورعاۋ، جۇمىسپەن قامتۋ، ەڭبەك قۇقىعىن قورعاۋ جانە مۇگەدەكتىگى بار ادامدار ءۇشىن الەۋمەتتىك ينكليۋزيانى قامتاماسىز ەتۋ باعىتىندا ماڭىزدى قادامدار جاسالدى. مينيسترلىكتىڭ بيىلعى قىزمەتى سيفرلاندىرۋعا جانە بارلىق پروسەستىڭ اشىقتىعىن ارتتىرۋعا باعىتتالعانىن اتاپ وتكەن ءجون، بۇل حالىق ءۇشىن الەۋمەتتىك قىزمەتتەردىڭ قولجەتىمدىلىگى مەن تيىمدىلىگىن ارتتىرۋعا مۇمكىندىك بەردى. بۇل تۋرالى Primeminster.kz سايتى حابارلايدى.

الەۋمەتتىك تولەمدەر مەن زەينەتاقى جيناقتارىن ارتتىرۋ

2024 جىلعى ماڭىزدى قادامداردىڭ ءبىرى بازالىق جانە ورتاق زەينەتاقىلاردى، سونداي-اق مەملەكەتتىك جاردەماقىلاردى يندەكستەۋمەن بايلانىستى الەۋمەتتىك تولەمدەردى ارتتىرۋ بولدى. ينفلياسيانىڭ بولجامدى دەڭگەيىن ەسكەرە وتىرىپ، تولەم مولشەرى ۇلعايتىلدى.

مەملەكەت باسشىسىنىڭ تاپسىرماسى بويىنشا 2023 جىلدان باستاپ بەس جىل ىشىندە ەڭ تومەنگى بازالىق زەينەتاقىنى ەڭ تومەنگى كۇنكورىس دەڭگەيىنىڭ 70%-نا دەيىن، ەڭ جوعارعىسى – 120%-عا دەيىن جىل سايىن كەزەڭ-كەزەڭىمەن ارتتىرۋ جۇزەگە اسىرىلادى. ماسەلەن، 2024 جىلعى 1 قاڭتاردان باستاپ بازالىق زەينەتاقىنىڭ ەڭ تومەنگى مولشەرى ەڭ تومەنگى كۇنكورىس دەڭگەيىنەن 60%-دان 65%-عا دەيىن ءوستى، بۇل 28 215 تەڭگەنى قۇرايدى، ەڭ جوعارى مولشەرى – ەڭ تومەنگى كۇنكورىس دەڭگەيىنەن 100%-دان 105%-عا دەيىن، بۇل 45 578 تەڭگەنى قۇرايدى.

ەڭبەك جانە حالىقتى الەۋمەتتىك قورعاۋ مينيسترلىگى دە وسكەلەڭ ۇرپاقتىڭ بولاشاق زەينەتاقىلارى دەڭگەيىن ارتتىرۋ باعدارلاماسىن جۇزەگە اسىرۋدى جالعاستىردى. 2024 جىلعى 1 قاڭتاردان باستاپ جۇمىس بەرۋشىلەردىڭ مىندەتتى زەينەتاقى جارنالارىن كەزەڭ-كەزەڭىمەن ىسكە اسىرۋ باستالدى، ولار جۇمىس ىستەيتىن 4،3 ملن-نان استام ازاماتتىڭ شوتىنا اۋدارىلدى. 

2024 جىلى زياندى ەڭبەك جاعدايىندا ۇزاق ۋاقىت جۇمىس ىستەيتىن ازاماتتاردى الەۋمەتتىك قولداۋعا ەرەكشە نازار اۋدارىلدى. جاڭا ارنايى الەۋمەتتىك تولەم ەنگىزىلىپ، ول 2024 جىلدىڭ 1 قاڭتارىنان باستاپ 13 مىڭ ادامعا تاعايىندالدى.

جالپى، 2024 جىلى رەسپۋبليكالىق بيۋدجەتتەن الەۋمەتتىك تولەمدەرگە 5،3 ترلن تەڭگە باعىتتالدى، بۇل ەلىمىزدىڭ بيۋدجەت شىعىستارى جالپى كولەمىنىڭ 22%-ىن قۇرادى. بۇل قاراجات زەينەتاقى مەن جاردەماقى الاتىن 4،5 ملن ازاماتقا، ونىڭ ىشىندە 2،4 ملن زەينەتكەر مەن 2،1 ملن ءتۇرلى الەۋمەتتىك تولەم الۋشىلارعا ءبولىندى. ناتيجەسىندە، مەملەكەتتىڭ بارلىق الەۋمەتتىك مىندەتتەمەسى مەرزىمىندە ءارى تولىق كولەمدە ورىندالدى.

جۇمىسپەن قامتۋعا جاردەمدەسۋ جانە كاسىپتىك باعدار بەرۋ شارالارى

جۇمىسپەن قامتۋ سالاسىندا مينيسترلىك جۇمىسسىزدىقتى ازايتۋعا جانە جۇمىسپەن قامتۋ پروسەسىنىڭ اشىقتىعىن قامتاماسىز ەتۋگە باعىتتالعان شارالاردى ىسكە اسىرۋدى جالعاستىردى. ازاماتتاردى جۇمىسقا ورنالاستىرۋدى جوسپارلاۋعا جانە ەڭبەك نارىعىنىڭ قاجەتتىلىكتەرىن انىقتاۋعا مۇمكىندىك بەرەتىن وڭىرلىك جۇمىسپەن قامتۋ كارتالارىنىڭ بەكىتىلۋى – ماڭىزدى قادامداردىڭ ءبىرى.

2024 جىلى 948 مىڭ قازاقستاندىقتى جۇمىسقا ورنالاستىرۋ جوسپارلانعان بولاتىن، جەلتوقسان ايىنىڭ باسىندا 845 مىڭنان استام ادام جۇمىسپەن قامتىلعانى ءمالىم بولدى، بۇل جىلدىق جوسپاردىڭ 89%-ىن قۇرادى.

• ەڭبەك مينيسترلىگى جۇمىسپەن قامتۋعا جاردەمدەسۋ شارالارى كەشەنىن ىسكە اسىرۋدا، ونىڭ اراسىندا قىزمەتكەرلەردى كاسىپكە وقىتۋ مەن قايتا دايارلاۋ ماڭىزدى ءرول اتقارادى. بيىل جۇمىس بەرۋشىلەردىڭ قاجەتتىلىكتەرىن ەسكەرە وتىرىپ، 9،6 مىڭ جۇمىسسىز ازامات ءۇشىن قىسقا مەرزىمدى كۋرستار ۇيىمداستىرىلدى. سونىمەن قاتار skills.enbek.kz پلاتفورماسىندا 50 مىڭنان استام ادام ونلاين وقىتۋدان ءوتتى، بۇل ولاردىڭ بىلىكتىلىگىن ارتتىرۋعا جانە ەڭبەك نارىعىندا باسەكەگە قابىلەتتى بولۋعا مۇمكىندىك بەردى.

• بۇدان باسقا، جالاقىنى سۋبسيديالاۋ باعدارلامالارى بەلسەندى جۇزەگە اسىرىلۋدا. وعان قوعامدىق جۇمىستار، الەۋمەتتىك جۇمىس ورىندارى، جاستار تاجىريبەسى جانە «العاشقى جۇمىس ورنى»، «ۇرپاقتار كەلىسىمشارتى» جانە «كۇمىس جاس» جوبالارى كىرەدى. وسى باعدارلامالار اياسىندا 180 مىڭنان استام ادام سۋبسيديالاناتىن جۇمىس ورىندارىنا ورنالاستىرىلدى. 

• كاسىپكەرلىكتى قولداۋ جانە جاڭا جۇمىس ورىندارىن قۇرۋ ءۇشىن «باستاۋ بيزنەس» جوباسى جالعاستىرىلدى، ونىڭ شەڭبەرىندە كاسىپكەرلىككە وقىتۋدان وتكەن ازاماتتار وزدەرىنىڭ ميكروبيزنەسىن اشۋعا وتەۋسىز گرانتتار الا الادى. 2024 جىلى مۇنداي كومەككە 8،9 مىڭ ادام قول جەتكىزدى. 

جۇمىسپەن قامتۋ سالاسىنداعى جاڭا جەتىستىكتەردىڭ ءبىرى ازاماتتار ءۇشىن جاڭا مۇمكىندىكتەر اشقان سيفرلىق شەشىمدەردى ەنگىزۋ بولدى. اتاپ ايتقاندا، «Mansap Compasy» پلاتفورماسى ىسكە قوسىلدى، ول ماماندىق تاڭداۋ جانە مانساپ جولىن جوسپارلاۋ قۇرالىنا اينالدى. پلاتفورما سۇرانىسقا يە ماماندىقتار، وقىتۋ تالاپتارى، گرانتتار مەن تاعىلىمدامالارعا قول جەتكىزۋ مۇمكىندىكتەرى تۋرالى وزەكتى اقپاراتتى ۇسىنادى. بۇل مەكتەپ تۇلەكتەرى مەن ستۋدەنتتەرگە بولاشاقتى باعدارلاۋعا كومەكتەسەدى ءارى جاستاردىڭ جۇمىسسىزدىق دەڭگەيىن تومەندەتۋگە ىقپال ەتەدى.

ستۋدەنتتەر پراكتيكالىق داعدىلاردى يگەرۋ ءۇشىن ەلەكتروندى ەڭبەك بيرجاسىندا وندىرىستىك پراكتيكادان ءوتۋ ورنىن تابۋعا كومەكتەسەتىن فۋنكسيونال ىسكە قوسىلدى. ناتيجەسىندە ستۋدەنتتەر ناقتى داعدىلارعا يە بولادى جانە باسەكەگە قابىلەتتىلىگى ارتادى.

مەملەكەتتىك ينۆەستيسيالاردىڭ تيىمدىلىگىن ارتتىرۋ ءۇشىن ساپالى جوسپارلاۋ ماڭىزدى اسپەكت بولىپ سانالادى. وسى ماقساتتا جوبالاردىڭ يننوۆاسيالىق ناۆيگاتورى ازىرلەندى. بۇگىنگى تاڭدا جۇيەدە جوسپار بويىنشا 150 مىڭ جۇمىس ورنى اشىلاتىن 755 ينۆەستيسيالىق جوباعا مونيتورينگ جۇرگىزىلۋدە. كەيىننەن وسى پلاتفورما ارقىلى مەملەكەتتىك باستامالار شەڭبەرىندە ىسكە اسىرىلاتىن بارلىق جوبالارعا مونيتورينگ جۇرگىزۋ جوسپارلانىپ وتىر. بۇدان باسقا، مينيسترلىك وڭىرلەر مەن سالالار بولىنىسىندە «ساپالى جۇمىس ورىندارىن» مونيتورينگتەۋدىڭ اقپاراتتىق جۇيەسىن پايدالانىپ جاتىر.

«ساپالى جۇمىس ورنى» تۇراقتى جۇمىسپەن قامتىلعان، ءقاۋىپسىز ەڭبەك جاعدايلارى، كاسىبي دامۋ جانە مانساپتىق ءوسۋ مۇمكىندىكتەرى بار، ەڭبەك قۇقىقتارى مەن الەۋمەتتىك قورعالۋى قامتاماسىز ەتىلگەن جۇمىسپەن قامتۋدى بىلدىرەدى. وتكەن جىلى قازاقستاندا وسىنداي 2،27 ملن جۇمىس ورنى بولعان. الداعى 3 جىلدا بۇل كورسەتكىشتى 824 مىڭعا ارتتىرۋ جوسپارلانىپ وتىر. 

ەڭبەك قۇقىعىن قورعاۋ جانە وندىرىستە جاراقات الۋدى ازايتۋ

2024 جىلى مينيسترلىك ەڭبەك جاعدايلارىن جاقسارتۋ جانە جۇمىسشىلاردىڭ قۇقىعىن قورعاۋ ءۇشىن ايتارلىقتاي قادامدار جاسادى. ماڭىزدى جەتىستىكتەردىڭ ءبىرى ەڭبەك ينسپەكسياسىن جەرگىلىكتى اتقارۋشى ورگانداردان مينيسترلىكتىڭ قاراماعىنا الۋ بولدى. مەملەكەتتىك ەڭبەك ينسپەكسياسى كوميتەتى اۋماقتىق بولىمشەلەرىمەن بىرگە قۇرىلدى. بۇل ەڭبەك زاڭناماسىنىڭ ساقتالۋىن باقىلاۋدىڭ تاۋەلسىز ۆەرتيكالىن قۇرۋعا مۇمكىندىك بەردى.

زاڭ جانە كادر قىزمەتىن ورتالىقتاندىرۋ ەسەبىنەن اۋماقتىق ينسپەكسيالار دەڭگەيىندە تىكەلەي ەڭبەك ينسپەكتورلارىنىڭ سانى ۇلعايدى. بۇل ءوز كەزەگىندە قىزمەتكەرلەردىڭ قۇقىعىى مەن مۇددەسىن قورعاۋدى، ەلىمىزدىڭ كاسىپورىندارىنداعى ءقاۋىپسىز ەڭبەك جاعدايلارىن قامتاماسىز ەتۋگە، سونداي-اق ەڭبەك داۋلارى مەن جانجالداردىڭ تۋىنداۋ تاۋەكەلدەرىن ازايتۋعا ىقپال ەتەتىن بولادى.

ناتيجەسىندە، قىزمەتكەرلەردىڭ ەڭبەك قۇقىعىنىڭ ساقتالۋىن، ونىڭ ىشىندە جالاقىنىڭ كەشىگۋىنە قاتىستى تەكسەرۋ كۇشەيتىلدى. ماسەلەن، 2024 جىلدىڭ 11 ايىندا 277 كاسىپورىندا 4،4 ملرد تەڭگە سوماسىنا جالاقى بويىنشا بەرەشەك انىقتالىپ، 17،5 مىڭ قىزمەتكەر ءوز جالاقىسىن الدى.

سونىمەن قاتار جۇرگىزىلگەن تەكسەرۋلەر بارىسىندا 7 583، اتاپ ايتقاندا، ەڭبەك سالاسىندا – 5 723؛ ەڭبەك قاۋىپسىزدىگى جانە ەڭبەكتى قورعاۋ بويىنشا – 1 793؛ حالىقتى جۇمىسپەن قامتۋ بويىنشا – 67 قۇقىق بۇزۋشىلىق انىقتالدى. جۇمىس بەرۋشىلەرگە 2 998 ۇيعارىم بەرىلىپ، 371 ملن تەڭگەگە 3 359 اكىمشىلىك ايىپپۇل سالىندى. قابىلدانعان شارالاردىڭ ناتيجەسىندە 33 مىڭنان استام قىزمەتكەردىڭ ەڭبەك قۇقىعى قورعالدى.

بيىلعى 11 ايدا رەسپۋبليكاداعى كاسىپورىنداردا 1 211 ادام زارداپ شەكتى. زارداپتىڭ كەسىرىنەن قايتىس بولعاندار سانى 178 ادامدى قۇرادى.

ەڭبەك جاعدايلارىن جاقسارتۋداعى ماڭىزدى قادامداردىڭ ءبىرى ناقتى ۋاقىت رەجيمىندە ءارتۇرلى كاسىپورىندارداعى ەڭبەك جاعدايلارى مەن كاسىبي تاۋەكەلدەردى باقىلاۋعا مۇمكىندىك بەرەتىن كاسىپورىنداردىڭ سيفرلىق كارتاسىن ەنگىزۋ. كاسىبي تاۋەكەلدەردى باعالاۋ جۇيەسى وندىرىستە جاراقات الۋ دەڭگەيىن تومەندەتۋدىڭ ماڭىزدى قۇرالىنا اينالدى. قابىلدانعان شارالار ناتيجەسىندە قازاقستاندا وندىرىستە جاراقاتتانۋ دەڭگەيى 2023 جىلدىڭ سايكەس كەزەڭىمەن سالىستىرعاندا 2،4%-عا تومەندەدى، بۇل ەڭبەك قاۋىپسىزدىگى سالاسىنداعى وڭ وزگەرىستەردى كورسەتەدى.

2024 جىلى پلاتفورمالىق جۇمىسپەن قامتۋ سالاسىنداعى ەڭبەك جاعدايلارىن جاقسارتۋعا باعىتتالعان بىرنەشە زاڭنامالىق باستامالار ەنگىزىلدى. اتاپ ايتقاندا، تاكسي جۇرگىزۋشىلەرى مەن پلاتفورمالىق قىزمەتتەرگە تارتىلعان باسقا جۇمىسشىلار ءۇشىن الەۋمەتتىك كەپىلدىكتەر ازىرلەندى، بۇل ولاردىڭ الەۋمەتتىك قورعالۋىن ەداۋىر جاقسارتتى.

مۇگەدەكتىگى بار ادامداردى قولداۋ

ەڭبەك جانە الەۋمەتتىك قورعاۋ مينيسترلىگىنىڭ 2024 جىلعى ماڭىزدى باسىمدىقتارىنىڭ ءبىرى مۇگەدەكتىگى بار ادامداردىڭ تۇرمىس ساپاسىن جاقسارتۋ بولدى. ناۋرىزدا قازاقستان بۇۇ-عا مۇگەدەكتەردىڭ قۇقىقتارى تۋرالى كونۆەنسيانىڭ ەرەجەلەرىن ورىنداۋ تۋرالى العاشقى بايانداماسىن ۇسىندى. 2024 جىلى مۇگەدەكتىگى بار ادامداردىڭ قۇقىعىن قامتاماسىز ەتۋ جانە تۇرمىس ساپاسىن جاقسارتۋ جونىندەگى ۇلتتىق جوسپاردى ىسكە اسىرۋ اياقتالدى. 2019 جىلى باستالعان جوسپار ەرەكشە قاجەتتىلىكتەرى بار ادامداردىڭ تۇرمىس جاعدايىن جاقسارتۋعا باعىتتالعان 95 ءىس-شارانى قامتىدى جانە 2024 جىلى وسى ءىس-شارالاردىڭ ەداۋىر بولىگى اياقتالدى.

الەۋمەتتىك قىزمەت كورسەتۋ جۇيەسىن ترانسفورماسيالاۋ شەڭبەرىندە «وڭالتۋدىڭ تەحنيكالىق قۇرالدارىنىڭ يننوۆاسيالىق فابريكاسى» پيلوتتىق جوباسى ىسكە قوسىلدى، ونىڭ شەڭبەرىندە ءتورت پيلوتتىق ءوڭىردىڭ بالالارى وڭالتۋدىڭ قىمبات تەحنيكالىق قۇرالدارىنا قول جەتكىزدى. بۇدان باسقا، مۇگەدەكتىگى بار ادامدار ءۇشىن ەلىمىزدىڭ ءارتۇرلى وڭىرلەرىندە 22 مىڭنان استام نىسان بەيىمدەلدى، بۇل ينفراقۇرىلىمعا قول جەتكىزۋدى ايتارلىقتاي جاقسارتتى.

سونداي-اق 2024 جىلى 2030 جىلعا دەيىن جۇمىس ىستەيتىن ينكليۋزيۆتى ساياسات تۇجىرىمداماسىنىڭ جوباسى ازىرلەندى. تۇجىرىمداما مۇگەدەكتىكتىڭ مەديسينالىق-الەۋمەتتىك مودەلىنەن الەۋمەتتىك-قۇقىق قورعاۋ مودەلىنە كوشۋ ءۇشىن جاعداي جاساۋعا باعىتتالعان.

ينكليۋزيۆتى ساياساتتى ىسكە اسىرۋدىڭ جاڭا تاسىلدەرى مۇگەدەكتىگى بار ادامداردىڭ قۇقىعىن قولداۋعا جانە مۇمكىندىكتەرىن كەڭەيتۋگە باعىتتالعان پارمەندى شارالار كەشەنىن قابىلداۋدى كوزدەيدى. وسىلايشا، مۇگەدەكتىگى بار ادامداردىڭ تۇرمىس ساپاسىن جاقسارتۋ جانە قوعامعا تولىققاندى ينتەگراسيالاۋ ءۇشىن قاجەتتى جاعداي جاساۋ جونىندەگى جۇمىس ينكليۋزيۆتى ساياسات تۇجىرىمداماسى شەڭبەرىندە جالعاسادى.

كوشى-قون ساياساتى جانە قونىس اۋدارۋشىلاردى قولداۋ

بيىل FSM Social ءموبيلدى قوسىمشاسى ارقىلى قونىس اۋدارۋشىلار مەن قانداستاردى جەرگىلىكتى قوعامداستىققا بەيىمدەۋ جانە ينتەگراسيالاۋ بويىنشا قىزمەتتەر كەڭەيتىلدى. قوسىمشا 25 قىزمەت كورسەتۋدى كوزدەيتىن قانداستار مەن قونىس اۋدارۋشىلار ءۇشىن بەيىمدەۋ مەن ينتەگراسيالاۋدىڭ جەكە جوسپارلارىن بەكىتۋگە جاردەمدەسەدى. جەكە جوسپاردا قامتىلعان مالىمەتتەر كورسەتىلگەن قىزمەتتەردىڭ ناتيجەسىن مونيتورينگتەۋ مۇمكىندىگىمەن وتباسىنىڭ سيفرلىق كارتاسىندا كورسەتىلەدى. بەيىمدەلۋ جانە ينتەگراسيالىق قىزمەتتەرمەن 12 مىڭعا جۋىق قانداس پەن قونىس اۋدارۋشىلار قامتىلدى.

بيىلعى قازان ايىنان باستاپ التى وڭىردە پيلوتتىق رەجيمدە migration.enbek.kz پورتالىنىڭ ءموبيلدى قوسىمشاسى ارقىلى «قانداس» مارتەبەسىن بەرۋ جانە «اتا جولى» كارتاسىن رەسىمدەۋ قىزمەتى ىسكە قوسىلدى.

زاڭنامالىق باستامالار شەڭبەرىندە قونىس اۋدارۋشىلاردىڭ كونكۋرستان تىس تارتىپپەن بەس جىلعا دەيىنگى مەرزىمگە اۋىل شارۋاشىلىعى ماقساتىنداعى جەر ۋچاسكەلەرىن الۋ قۇقىعىن، سونداي-اق ماتەريالدىق كومەكتى ەسەپكە الۋ ءۇشىن شوتتاردان اقشا ءوندىرىپ الۋعا تىيىم سالۋدى كوزدەيتىن تۇزەتۋلەر قابىلداندى.

سونداي-اق تۇرعىن ءۇي ساتىپ الۋ ءۇشىن ەكونوميكالىق ۇتقىرلىق سەرتيفيكاتىن بەرۋدىڭ قولدانىستاعى تەتىگىن جانە قالا تۇرعىندارىنىڭ اۋىلدىق ەلدى مەكەندەرگە كوشۋىن ىنتالاندىرۋ بولىگىندە وبلىسىشىلىك قونىس اۋدارۋ تەتىگىن قايتا قاراۋعا باعىتتالعان تۇزەتۋلەر ازىرلەندى.

وسى جىلى قازاقستاندىق قىزمەتكەرلەردىڭ ءبىلىمىن ترانسفەرتتەۋ جانە بىلىكتىلىگىن ارتتىرۋ ماقساتىندا شەتەلدىك ماماندار ءۇشىن تالاپ ەتىلەتىن كاسىپتەردىڭ تىزبەسى كەڭەيتىلدى. سونداي-اق قازاقستاندىق قىزمەتكەرلەرگە تالىمگەرلىكتى ۇيىمداستىرۋ قاعيدالارى جانە شەتەلدىك جۇمىس كۇشىن تارتاتىن جۇمىس بەرۋشىلەرگە قويىلاتىن تالاپتار بەكىتىلدى.

شەتەلدە جۇمىس ىستەيتىن قازاقستاندىقتاردىڭ قۇقىعىن قورعاۋ ءۇشىن قاتارمەن راتيفيكاسيالاۋ ساتىسىندا تۇرعان ەكىجاقتى كەلىسىمگە قول قويىلدى. قازاقستاننىڭ كورەيا رەسپۋبليكاسىمەن جۇمىسقا ورنالاسۋعا رۇقسات بەرۋ جۇيەسىنە (Employment Permit System) قوسىلۋى جونىندەگى كەلىسىم بەلسەندى پىسىقتالۋ كەزەڭىندە تۇر.

بۇدان باسقا، ۇلىبريتانيامەن ەڭبەك كوشى-قونى سالاسىنداعى ىنتىماقتاستىق تۋرالى مەموراندۋمعا قول قويۋ ماسەلەسى قاراستىرلۋدا.