جەتىسۋ وبلىسىندا الماتى وبلىسىنىڭ اتىنان توپقا تۇسكەن ابزال تۇرعانبەك مىنگەن جۇيرىك 50 سايگۇلىكتىڭ ىشىنەن وق بويى وزا شاۋىپ، مارە سىزىعىن ءبىرىنشى كەستى. جەڭىمپاز «لادا گرانتا» كولىگىنە يە بولدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
بۇگىن تالدىقورعان قالاسىنىڭ يپپودرومىندا كونستيتۋسيا كۇنىنە وراي 41 شاقىرىم قاشىقتىققا الامان بايگە جانە قازاق كۇرەسىنەن تۇيە پالۋاندار اراسىندا اشىق تۋرنير ءوتتى.
قازاق كۇرەسىنەن وتكەن جارىستا كۇش سىناۋعا ەلىمىزدىڭ تۇكپىر-تۇكپىرىنەن 25 پالۋان جينالدى.
جارىستىڭ سالتاناتتى اشىلۋىنا وبلىس اكىمى بەيبىت يسابايەۆ، تۇڭعىش «قازاقستان بارىسى» ۇلان رىسقۇلوۆ، قازاقستان بارىسىنىڭ ءۇش دۇركىن چەمپيونى بەيبىت ىستىباي قاتىسىپ، جينالعان كوپشىلىكتى مەرەكەمەن قۇتتىقتاپ، جارىسقا قاتىسۋشىلارعا ساتتىلىك تىلەدى.
جارىستىڭ ناتيجەسىنە كەلەر بولساق، الامان بايگەدە الماتى وبلىسىنىڭ اتىنان توپقا تۇسكەن ابزال تۇرعانبەكتىڭ سايگۇلىگى 50 شاباندوزدىڭ ىشىنەن وق بويى وزا شاۋىپ، مارە سىزىعىن ءبىرىنشى كەستى.
جەڭىمپاز «لادا گرانتا» اۆتوكولىگىنە يە بولدى.
2 ورىن: قابىل ايتقابىل (بقو)؛
3 ورىن: جورابەك بەكنۇر (جامبىل وبلىسى)؛
4 ورىن: ءابىلجان دۋمان (الماتى وبلىسى)؛
5 ورىن: سەرىك بەكنۇر (جامبىل وبلىسى)؛
6 ورىن: اسىلبەكوۆ اسەت (جەتىسۋ وبلىسى)؛
7 ورىن: جولدىباي ءمادي (الماتى وبلىسى).
قازاق كۇرەسىنەن قىزىلوردا وبلىسىنان كەلگەن پالۋان ماقسات يساعابىلوۆ بەلدەسكەن قارسىلاستارىنىڭ ءبارىن جەڭىپ، 1-ورىنعا يە بولدى.
جەڭىمپازعا 2 ملن تەڭگەنىڭ سەرتيفيكاتى تابىستالدى.
سولتۇستىك قازاقستان وبلىسىنىڭ اتىنان كۇرەسكەن پالۋان مۇحيت تۇرسىنوۆ جەڭىس تۇعىرىنىڭ ەكىنشى ساتىسىنان كورىندى. وعان 1 ملن تگ جۇلدە بۇيىردى.
3-ورىنعا الماتى وبلىسىنىڭ اتىنان بەلدەسكە ءمادي ەدىلبايەۆ كوتەرىلدى. جۇلدەگەرگە 500 مىڭ تەڭگەنىڭ سەرتيفيكاتى بەرىلدى.