جەتىسۋ وبلىسى ءوزىنىڭ وڭىرلىك ءتولتاڭباسىن قابىلدادى

جالپى 17 ۇمىتكەردەن 55 ەسكيز تۇسكەن

جەتىسۋ وبلىسىنىڭ وڭىرلىك گەربى كونكۋرس ناتيجەسىندە ىرىكتەپ انىقتالدى. كونكۋرسقا سۋرەتشىلەر، فوتوگرافتار، ديزاينەرلەر، ارحيتەكتورلار جانە قاراپايىم قالا تۇرعىندارى دا قاتىستى، دەپ حابارلايدى Almaty-akshamy.kz.

وبلىستىق قوعامدىق دامۋ باسقارماسىنىڭ مالىمەتىنشە، ولكەنىڭ تاريحي-مادەني جانە گەوگرافيالىق ەرەكشەلىكتەرىنىڭ كورسەتىلۋى، جوعارى كوركەمدىك دەڭگەيى، بىرەگەي ديزايندىق شەشىم، تۇستەردىڭ ۇيلەسىمدىگى مەن گەرالديكا تالاپتارىنىڭ ساقتالۋى باعالاندى.

كونكۋرستىق كوميسسيا مۇشەلەرىنىڭ شەشىمىمەن جەتىسۋ وبلىسى تالدىقورعان قالاسىنىڭ قورعانىس ىستەرى جونىندەگى باسقارما باستىعىنىڭ اسكەري پاتريوتتىق جۇمىس جانە قارۋلى كۇشتەر ارداگەرلەرىمەن جۇمىس جونىندەگى كومەكشىسى، سونىمەن بىرگە، ق ر سۋرەتشىلەر وداعىنىڭ مۇشەسى، ق ر كوركەم اكادەمياسىنىڭ كوررەسپونتەنت مۇشەسى، ۆيسە پرەزيدەنتى داۋرەنبەكوۆ ەسەت جەڭىس ۇلىنىڭ ەسكيز جوباسى ءبىراۋىزدان تاڭداپ الىندى.

وڭىرلىك ءتولتاڭبا قازاقستان رەسپۋبليكاسى مادەنيەت جانە سپورت مينيسترلىگى مەملەكەتتىك رامىزدەر جانە گەرالديكالىق بەلگىلەر ماسەلەلەرى جونىندەگى ساراپتاما كەڭەسىندە ساراپتامادان ءوتىپ، وبلىستىق ءماسليحاتتا كەلىسىلدى.

جەر جانناتى جەتىسۋ وبلىسىنىڭ گەربى شەڭبەر ىشىندە ورنالاسقان، مەملەكەتتىك تۋدىڭ كوك جانە التىن تۇسىنە نەگىزدەلگەن.
نەگiزگى نىشانداردىڭ ءبىرى – شاڭىراق، جەتىسۋ جەرىنىڭ اسقارلى، بيىك تاۋلارى، تالدىقورعان قالاسىنىڭ سيمۆولى «جەتىسۋ مونۋمەنتى»، ۇلى جىبەك جولىنىڭ نىشانى – كەرۋەن كوشى، جەتى وزەن، بالقاش، الاكول كولدەرىنىڭ ايدىنى بەينەلەنگەن.