«قايىرىمدى ىستەر مارافونى»: 600 ملن.تەڭگەگە كومەك كورسەتىلدى.
الماتى وبلىسىندا جىل باسىنان بەرى 3000-نان استام قايىرىمدىلىق اكسياسى ۇيىمداستىرىلدى. ناتيجەسىندە 16 000-نان استام كوپ بالالى وتباسىنا كومەك كورسەتىلدى. بۇنىڭ بارلىعى «قايىرىمدى ىستەر مارافونى» جالپىۇلتتىق جوبانىڭ اياسىندا جۇزەگە اسىرىلدى، دەپ حابارلايدى Almaty-akshamy.kz.
2020 جىلدىڭ سوڭى، ەل پرەزيدەنتى قاسىم-جومارت توقايەۆ قازاقستان تاۋەلسىزدىگىنىڭ 30 جىلدىعى اياسىندا جالپىۇلتتىق دەڭگەيدە «قايىرىمدى ىستەر مارافونى» جوباسىنىڭ ۇيىمداستىرىلاتىنىن ايتقان ەدى. سودان بەرى جەتىسۋ جەرىندە ۇلتتىق جوبا جولعا قويىلدى.
«Jetisy Media» مالىمەتىنشە، وسى ۋاقىتقا دەيىن، وبلىستا مۇقتاج وتباسىلاردى الەۋمەتتىك قولداۋ بويىنشا 1652 ناۋقان، 1272 ەكولوگيالىق اكسيا، 76 جانۋارلارعا كورسەتىلگەن كومەك جانە قورعاۋعا باعىتتالعان شارالار وتكىزىلدى.
قازاق، «ساۋساق بىرىكپەي، ينە ىلىكپەيدى» دەگەن. ۇلتتىق ماڭىزعا اينالعان «قايىرىمدى ىستەر مارافونى» جوباسىن جەرگىلىكتى مەسەناتتار، 2 جوو، 52 كوللەدج، مەملەكەتتىك مەكەمەلەر، قايىرىمدىلىق قورلارى، اۆتوۆولونتەرلەر جانە ەرىكتىلەر ۇيىمدارى قولدادى.
ناتيجەسىندە از قامتىلعان وتباسىلارعا جانە جالعىزباستى قارتتارعا كومەك كورسەتىلدى، الەۋمەتتىك جاعدايى تومەن 89 وتباسى باسپانالى بولدى.
سولاردىڭ ءبىرى - بالقاش اۋدانىنىڭ تۇرعىنى مۇحتار دۇمشەبايەۆ.
«ءوڭىرىمىزدىڭ ءمارت ازاماتتارىنىڭ ارقاسىندا ءۇيلى بولدىق. قانشا جىلعى ارمانىمىز ەدى. ءبىر شارۋاشىلىقتا 20 جىل ەڭبەك ەتتىم. قاراپايىم شارۋا ادامىمىن. وسى كەزگە دەيىنگى ەڭبەك اقتالدى. قايىرىمدىلىقتىڭ قايىرى بىزگەدە ءتيدى. قۋانىشتىمىز. بارشا قول ۇشىن سوزعان ازاماتتارعا العىسىمدى بىلدىرەمىن»، - دەيدى مۇحتار دۇمشەبايەۆ.
الماتى وبلىسىنىڭ جومارت جاندارى تەك ءوڭىر حالقىنا كومەك كورسەتىپ قانا قويماي، ماڭعىستاۋ وبلىسىندا قۋاڭشىلىقتان ءشوپ شىقپاي مالداردىڭ قىرىلۋىنا بايلانىستى قول ۇشىن سوزدى. ولار، ايماق اتىنان گۋمانيتارلىق كومەك رەتىندە 60 000-نان استام تۇك ءشوپ جىبەردى. جالپى العاندا «قايىرىمدى ىستەر مارافونى» جالپىۇلتتىق جوباسى اياسىندا مەسەناتتار مەن ۆولونتەرلەر بارلىعى 600 ملن. تەڭگەگە جۋىق كومەك كورسەتتى.
«17 اۋدان مەن 3 قالادا وڭىرلىك فرونت-كەڭسەلەردىڭ قىزمەتكەرلەرى ۆولونتەرلەردى كوبىرەك تارتۋ ءۇشىن بەلسەندى ۇگىت-ناسيحات قىزمەتىن نۇسقاۋشىلار ۇيىمداستىرادى. الداعى ۋاقىتتا اتالعان جالپىۇلتتىق جوبانى جۇزەگە اسىرۋ جالعاسىن تاباتىن بولادى»، - دەيدى الماتى وبلىسى جاستار ساياساتى ماسەلەلەرى باسقارماسىنىڭ باسشىسى ەلدار ساپاروۆ.