ۇلى جەڭىستىڭ 80 جىلدىعىنا وراي الماتى قالاسىنىڭ جەتىسۋ اۋدانىنا قاراستى №129 جبب مەكەمەسىنىڭ ۇيىمشىل ۇجىمى جىلداعى قالىپتاسقان ءداستۇر بويىنشا ءبىرقاتار قارت مايدانگەرلەر مەن تىل ارداگەرلەرىن مەكتەپكە شاقىرىپ مەرەكەلىك كونسەرت ۇيىمداستىردى.
ءىس-شارانىڭ ماقساتى – وتانىن قورعاعان باتىر بابالارىمىزدىڭ ەرلىگىن دارىپتەي وتىرىپ، وسكەلەڭ ۇرپاقتى ءوز ەلىن، جەرىن سۇيۋگە قازاق ەلىنىڭ مايداندا جانە تىلدا كورسەتكەن ەرەن ەرلىگىن قۇرمەتتەۋگە، ەلجاندىلىققا تاربيەلەۋ.
مەكتەپ قابىرعاسىندا وتكەن مەرەكەلىك كەش بارىسىندا ساحنا تورىندە پاتريوتتىق اندەر شىرقالىپ، سوعىس جىلدارىنداعى كورىنىستەردى بەينەلەيتىن قويىلىمدار قويىلدى. سونىمەن قاتار، كورمە ۇيىمداستىرىلىپ، كەلۋشىلەر نازارىنا سوعىس ارداگەرلەرىنىڭ ءومىرى، ەرلىگى مەن تىلدا ەڭبەك ەتكەن جانداردىڭ ۇلەسى جايلى تىڭ دەرەكتەر مەن فوتوماتەريالدار ۇسىنىلدى.
ءوز كەزەگىندە سول كۇنى سۇراپىل سوعىستى تەبىرەنە ەسكە العان ارداگەرلەر باتىرلاردىڭ قايتالانباس ەرلىگىن اڭگىمەلەپ، وقۋشىلاردىڭ جىگەرىن جانيتىن جىگەرلى سوزدەرىن تىلگە تيەك ەتتى.
مەكتەپ ديرەكتورى ارحات سوۆەتوۆيچ ۇجىمداعى بارشا ۇستازدار قاۋىمىن جەڭىس مەرەكەسىمەن شىن جۇرەكتەن قۇتتىقتاپ، ءوزىنىڭ جۇرەك جاردى جىلى لەبىزىن ءبىلدىردى. سونداي-اق مەكتەپ باسشىسى سوعىس جىلدارىنداعى ەرلىگى، ەڭبەككە ادالدىعى مەن قاھارماندىعى ءۇشىن العىس ايتىپ، زور دەنساۋلىق، اماندىق پەن ۇزاق عۇمىر تىلەدى.
«ۇلى جەڭىستىڭ 80 جىلدىعىن زور قۇرمەتپەن جانە ريزاشىلىقپەن اتاپ وتۋدەمىز. بۇل جەڭىستى جاقىنداتقان ءاربىر جاننىڭ الدىندا تاعزىم ەتەتىن ەلدىكتىڭ، بىرلىكتىڭ رۋحتىڭ ماڭگىلىك مەرەكەسى. مەملەكەت باسشىسى قاسىم-جومارت توقايەۆ اتاپ وتكەندەي، تاريحي شىندىقتى ساقتاۋ – ءبىزدىڭ ۇلت الدىنداعى پارىزىمىز. باتىر بابالارىمىزدىڭ ەرلىگى تەك وتكەننىڭ شەجىرەسى ەمەس، بۇگىنگى بۋىننىڭ رۋحاني تەمىرقازىعى»، - دەيدى بىزگە بەرگەن سۇقباتىندا.
وسىلايشا بىرنەشە ساعاتقا سوزىلعان يگىلىكتى ءىس-شارا سوڭىندا مەكتەپ وقۋشىلارى مەن قۇرمەتتى قوناقتار جانە ۇستازدار ەستەلىككە سۋرەتكە ءتۇستى.