الماتىدا اباتتاندىرىلماعان اۋمۆق جاڭا سەرۋەندەۋ ايماعىنا اينالادى، دەپ حابارلايدى aqshamnews.kz
الماتىنىڭ جەتىسۋ اۋدانىنىڭ تۇرعىندارىنىڭ وتىنىشىمەن «حالىق قاتىساتىن بيۋدجەت» جوباسى اياسىندا جۇمىسشى كەنتىندە جاڭارتىلعان سەرۋەندەۋ ايماعى پايدا بولادى. 500 مەترگە سوزىلاتىن اباتتاندىرۋ جۇمىستارى كرىلوۆ كوشەسى بويىمەن كۋدەرين كوشەسىنەن ساحالينسكايا كوشەسىنە دەيىنگى اۋماقتا جۇرگىزىلەدى.
جاڭارتىلعان سكۆەردە جاسىل جەلەكتى سۋارۋدىڭ اۆتوماتتاندىرىلعان جۇيەسى، جاڭا بالالار ويىن مەن سپورت الاڭدارى ورناتىلادى. سونداي-اق جاياۋ جۇرگىنشىلەر ايماعىندا شاعىن فۋتبول الاڭى تولىعىمەن جوندەۋدەن وتكىزىلىپ، ورىندىقتار مەن قوقىس جاشىكتەرى قويىلادى. قوسىمشا ساندىك قورشاۋلار مەن گابيون قۇرىلىمدارى ورناتىلادى.
اۋدان تۇرعىندارىنىڭ قاۋىپسىزدىگى ءۇشىن ورتالىق زيرات پەن قوسىمشا جولدىڭ اينالاسىنداعى قورشاۋلار تولىعىمەن قالپىنا كەلتىرىلدى. بۇرىن زيراتتاعى قورشاۋلار اپاتتى جاعدايدا ەدى، تۇنگى ۋاقىتتا ۆانداليزم جانە شويىن قورشاۋدى ۇرلاۋ فاكتىسى تىركەلگەن. ەندى مۇندا ۇزىندىعى 2 كم بولاتىن قورشاۋلار ورناتىلىپ، بيىكتىگى 3 مەترلىك دۋال سالىندى. زيرات اينالاسىنداعى 4 مىڭنان استام اپاتتى جانە قۋراعان اعاشتار سانيتارلىق ماقساتتا كەسىلدى.
جاڭا وقۋ جىلىنىڭ باسىنا قاراي سەرۋەندەۋ ايماعى جاقىن ماڭداعى تۇرعىن ءۇي ماسسيۆتەرى تۇرعىندارىنىڭ دەمالۋىنا قولايلى جاعداي جاسايدى: بالالار مەن سپورت الاڭدارى بار جاڭا قوعامدىق كەڭىستىك قۇرىلادى، سكۆەر بويىندا اۆتوتۇراق ورىندارى، جاياۋ جۇرگىنشىلەر جولدارى سالىنادى.
جالپى، «حالىق قاتىساتىن بيۋدجەت» جوباسى اياسىندا بيىل جەتىسۋ اۋدانىندا 34 جوبا جۇزەگە اسىرىلىپ جاتىر، ونىڭ 24ء-ى اۋلالىق اۋماقتى اعىمداعى جوندەۋ، 2 جاياۋ جۇرگىنشىلەر ايماعى، 1 ساياباق، 4 قورشاۋ، 3 سكۆەر جانە 3 اۆتوماتتى سۋارۋ جۇيەسى. وسى جوبالاردى جۇزەگە اسىرۋ ءۇشىن الماتى قالاسىنىڭ اكىمى ەربولات دوسايەۆتىڭ تاپسىرماسىمەن بيىل اۋدانعا وسى باعدارلاما بويىنشا قارجىلاندىرۋ 2 ميلليارد تەڭگەگە دەيىن ۇلعايتىلدى.