ەلوردا دارىگەرلەرى اسقازانىنا ماگنيت تولعان قىزدى قۇتقاردى
وتكەن اپتادا ەلوردادا ماگنيتتى-رەزونانستى توموگرافيالىق زەرتتەۋ ءۇشىن اۋرۋحاناعا تۇسكەن 7 جاستاعى قىزعا وپەراسيا جاسالدى، دەپ حابارلايدى Almaty-akshamy.kz Almaty.tv-عا سىلتەمە جاساپ.
بالانىڭ مۇرنىن تەكسەرۋ كەزىندە دارىگەرلەر ونىڭ ىشىندە دە ماگنيت بار ەكەنىن انىقتادى. ماگنيت مۇرىننىڭ جاقتاۋىن زاقىمداعان.
«وسىدان كەيىن بالا رەنتگەندىك زەرتتەۋگە جىبەرىلدى، ول جاقتا دا اسقازاندا ماگنيتتەردىڭ جينالعانى انىقتالدى. ناتيجەسىندە ءبىز 100-دەن استام كىشكەنتاي ماگنيتتى شىعاردىق. قازىرگى ۋاقىتتا تەكسەرۋ جانە ەمدەۋ تولىق كولەمدە جۇرگىزىلۋدە»،– دەدى اۋرۋحانانىڭ حيرۋرگيالىق بلوگىنىڭ جەتەكشىسى رينات بايگيرەيەۆ.
دارىگەردىڭ ايتۋىنشا، ەگەر بالا ماگنيتتى جۇتىپ قويسا، ول وڭەشتە تىرەلىپ قالادى نەمەسە اسقازانعا تۇسەدى.
«ەگەر ماگنيتتىڭ وتكىر، ۇشكىر تۇستارى بولسا، وڭەشتىڭ شىرىشتى قاباتى زاقىمدانۋى مۇمكىن. ال، بوگدە زاتتار اسقازاندا بىرنەشە كۇن جاتىپ قالسا، ونىڭ سالدارى اۋىر بولادى. ول نەگىزىنەن تابيعي تۇردە ءوزى شىعادى. ەگەر شىقپاي، اسقازاندا ۇزاق ۋاقىت بولسا جاعداي قيىندايدى. ولار اسقازان-ىشەك جولدارىنىڭ ءارتۇرلى بولىكتەرىنە جابىسىپ قالادى. ءتىپتى پەرەتونيت تۋىنداۋى مۇمكىن»، – دەيدى مامان نۇرجانوۆ.
وتكەن جىلى №2 كوپ بەيىندى قالالىق بالالار اۋرۋحاناسىنا وڭەش، اسقازان، اسقازان-ىشەك جولدارى مەن قولقاعا بوگدە زاتتار ءتۇسىپ كەتكەن 162 بالا كومەككە جۇگىنگەن.
دارىگەرلەردىڭ ايتۋىنشا، 1-5 جاس ارالىعىنداعى بالالار اراسىندا مونشاق، تۇيمە، ءپۋلتتىڭ باتارەيالارى سياقتى ۇساق زاتتاردى جۇتىپ قويۋ ءجيى كەزدەسەدى. دارىگەرلەر تازالاپ شىعاراتىن باسقا زاتتاردىڭ 17 پايىزى - ماگنيتتەر. دارىگەرلەر بالالارلىڭ ۇساق-تۇيەك زاتتاردى جۇتىپ قويۋى كوبىنەسە ولاردىڭ قاراۋسىز جۇرگەن كەزدەرىندە ورىن الاتىنىن ايتادى.