ماماندار كاحرامانماراش جەراستى دۇمپۋلەرى ءالى دە جارتى جىل بويى جالعاسادى دەگەن بولجام جاسادى. تۇركيادا كۇشتى جەر سىلكىنىسى بولاتىنىن بولجاعان نيدەرلاند زەرتتەۋشىسى فرانك حۋگەربيتس ناۋرىز ايىنىڭ باسىندا جاڭا اپاتتار بولۋى مۇمكىن ەكەنىن ەسكەرتتى.
ەسكە سالا كەتسەك، 6 اقپاندا تۇركيانىڭ كاحرامانماراش پروۆينسياسىندا ماگنيتۋداسى 7 بالدان اساتىن ەكى جەر سىلكىنىسى بولدى. جەر سىلكىنىسى ەلدىڭ 10 پروۆينسياسىندا، سونداي-اق كورشىلەس مەملەكەتتەردە، سونىڭ ىشىندە سيريادا دا سەزىلدى.
7 ناۋرىزدا تۇركيانىڭ حاتاي، كاحرامانماراش جانە كايسەري پروۆينسيالارىندا ءۇش جەر سىلكىنىسى بولدى، دەپ حابارلايدى Almaty-akshamy.kz.Egemen.kz-كە سىلتەمە جاساپ.
تۇركيانىڭ شىعىسىنداعى مالاتيا پروۆينسياسىندا 4،5 بالدىق جەر سىلكىنىسى بولدى.
بۇل تۋرالى تۇركيا ۇكىمەتى جانىنداعى توتەنشە جاعدايلاردىڭ الدىن الۋ جانە زارداپتارىن جويۋ باسقارماسىنىڭ (AFAD) سايتىندا حابارلاندى.
جەر استى دۇمپۋلەرى 05:13 كەزىندە 8 كم تەرەڭدىكتە تىركەلگەن.
بۇعان دەيىن ساعات 04:34-تە ماگنيتۋداسى 4،7 بالدىق 10 كم تەرەڭدىكتەگى جەر سىلكىنىسى تىركەلگەن.
ەكى جاعدايدا دا جەر سىلكىنىسىنىڭ وشاعى پيۋتۋرگە اۋدانىندا بولدى.
بۇعان قوسا تۇركيانىڭ وڭتۇستىگىندەگى حاتاي پروۆينسياسىندا دا ماگنيتۋداسى 4،4 بولاتىن جەر سىلكىنىسى تىركەلدى.
تۇركيا ۇكىمەتى جانىنداعى توتەنشە جاعدايلاردىڭ الدىن الۋ جانە زارداپتارىن جويۋ باسقارماسىنىڭ (AFAD) حابارلاۋىنشا، جەر سىلكىنىسىنىڭ وشاعى حاسسا ايماعىندا بولعان.
اقپان ايىندا بولعان جەر سىلكىنىستەرىنىڭ تۇركياعا كەلتىرگەن شىعىنى 100 ملرد دوللاردان اسۋى مۇمكىن.
تۇرىك پوليسياسى عيماراتتارى جەر سىلكىنىسىنە ءتوزىمدى بولۋى ءتيىس قۇرىلىس مەردىگەرلەرىن تەرگەۋ اياسىندا 269 كۇدىكتىنى ۇستادى.
سوڭعى رەسمي دەرەكتەرگە سايكەس، تابيعي اپات 48 مىڭعا جۋىق ادامنىڭ ءومىرىن قيدى.