ءماجىلىس "جەر ۋچاسكەلەرىن بەرۋ پروسەسىن سيفرلاندىرۋ تۋرالى" زاڭ جوباسىن ماقۇلدادى
ءماجىلىستىڭ ءبىرىنشى وقىلىمىندا ەلىمىزدەگى جەر ۋچاسكەلەرىن بەرۋ پروسەسىن سيفرلاندىرۋعا قاتىستى زاڭ جوباسى ماقۇلداندى، دەپ حابارلايدى اlmaty-akshamy.kz قازاقپاراتقا سىلتەمە جاساپ.
«بۇگىندە جەر ءۇشىن، ول جەردەگى جىلجىمايتىن مۇلىك ءۇشىن بولەك مەملەكەتتىك اكت بەرىلەدى. ەندىگى ۋاقىتتا ەكەۋى بىرىكتىرىلىپ ءبىر عانا مەملەكەتتىك اكت بولادى. اتالعان جاڭاشىلدىق جۇيەنى، سالانى دامىتۋ ءۇشىن قابىلدانىپ وتىر. ويتكەنى حالىقارالىق تاجىريبە بويىنشا جەر مەن جىلجىمايتىن مۇلىك بىرگە جۇرەدى. مىسالى، نيدەرلاند، وڭتۇستىك كورەيا جانە كوپتەگەن ەلدەردە كاداسترلىق ءتولقۇجات ءاردايىم جەر جانە جىلجىمايتىن مۇلىكپەن بىرگە بولادى. مەنىڭ ويىمشا، كاداسترلاردى بىرىكتىرۋ ءتيىمدى. سونداي-اق ازاماتتار ءۇشىن قۇقىقتىق جانە جەر كاداسترى تۋرالى، قوعامدىق كاداسترلىق كارتاداعى جىلجىمايتىن مۇلىك وبەكتىلەرى تۋرالى اقپاراتتىڭ اشىقتىعى مەن قولجەتىمدىلىگىن قامتاماسىز ەتەدى»، - دەدى ق ر سيفرلىق دامۋ، يننوۆاسيالار جانە اەروعارىش ونەركاسىبى ۆيسە-مينيسترى اسەت تۇرىسوۆ ءماجىلىس وتىرىسىندا.
ۆيسە-مينيستردىڭ مالىمدەۋىنشە، جاڭا مەملەكەتتىك كاداسترلىق كارتا ارقىلى بوس جەر ۋچاسكەلەرى تۋرالى اقپارات الۋعا بولادى.
«كارتا ارقىلى بوس جانە وزىڭىزگە ۇناعان جەر ۋچاسكەسىن تاڭداپ، ونىڭ اۋكسيونعا شىعۋى تۋرالى ءوتىنىش بەرە الاسىز. سودان سوڭ «ەلەكتروندى ۇكىمەتتەگى» جەكە كابينەتىڭىزگە حابارلاما كەلەدى. وسىلايشا بوس جەر ۋچاسكەلەرىن الۋ بويىنشا اشىقتىق پەن قولجەتىمدىلىك ارتا تۇسەدى»، - دەيدى ول.
ءماجىلىس دەپۋتاتى ايقىن قوڭىروۆ اتالعان زاڭ جوباسىنا ءبىرقاتار تۇزەتۋ ەنگىزىلگەنى تۋرالى ايتتى.
«ۇكىمەت جەر بەرۋ ءتارتىبى ەكى جولمەن رەتتەلەدى دەپ بولجادى. ياعني ەلەكتروندى فورماتتا جانە ساۋدا-ساتتىق ارقىلى. الايدا ەل اۋماعى ينتەرنەتپەن تولىق قامتىلماعاندىقتان، جۇمىس توبى ەلوردانىڭ، رەسپۋبليكالىق، وبلىستىق جانە اۋداندىق ماڭىزى بار قالالاردىڭ جەرلەرى ءۇشىن عانا جەر ۋچاسكەلەرىنە قۇقىق بەرۋدىڭ ەلەكتروندى فورماتىن ەنگىزۋ تۋرالى شەشىم قابىلدادى. بۇل «ەلەكتروندى ۇكىمەتتىڭ» ۆەب-پورتالى ارقىلى جاريا كاداسترلىق كارتا ارقىلى جۇزەگە اسىرىلادى»، - دەدى ايقىن قوڭىروۆ.
ونىڭ ايتۋىنشا، جەر ۋچاسكەسىنە قۇقىق بەرۋ پروسەستەرىن اۆتوماتتاندىرۋعا بايلانىستى جەر كوميسسياسىنىڭ ينستيتۋتى، سونداي-اق جوعارىدا اتالعان اۋماقتاردا جەر-كاداسترلىق جوسپارىن ازىرلەۋ جانە بەكىتۋ الىنىپ تاستالادى.
«بۇل ءتيىستى وتىنىشتەردى قاراۋ مەرزىمىن ەداۋىر قىسقارتادى. وسىنداي تەتىك ەلدى مەكەندەردە ورنالاسقان جەر ۋچاسكەلەرىنىڭ نىسانالى ماقساتى وزگەرگەن كەزدە دە قولدانىلادى. سونىمەن قاتار جەر ۋچاسكەسى مەن عيماراتقا قاتىستى قۇجات سانى ازايادى. وسىلايشا جەر اكتىسى مەن تەحپاسپورت جىلجىمايتىن مۇلىك وبەكتىسىنىڭ كاداسترلىق پاسپورتى تۇرىندە ءبىر قۇجاتقا بىرىكتىرىلەدى»، - دەيدى ول.