بۇل جولى ءبىزدىڭ باستى مەملەكەتتىك نىشانىمىزدى جەر شارىنىڭ ەڭ سۋىق نۇكتەسىنە وزبەكستاندىق بلوگەر ابدۋراحمون فازيلوۆ الىپ شىقتى. ول انتاركتيداعا توعىز كۇندىك ساپار جاساپ، "پورت لە كلارك" ايلاعىنا بارىپ، ورتالىق ازيا ەلدەرىنىڭ دوستىعى مەن بىرلىگىن نىعايتۋ ماقساتىندا بەس تۋىن قاتار قوندىردى، دەپ حابارلايدى aqshamnews.kz.
فازيلوۆتىڭ بۇل ەرەكشە ساپارى ءبىر جىل بويى جوسپارلاندى. مۇز جاراتىن الىپ كەمەلەرمەن انتاركتيداعا اتتانعان بلوگەر، جولدىڭ ۇزاق ءارى ءقاۋىپتى بولارىن الدىن الا ءتۇسىنىپ، ەرتە قامدانعان. ول وزبەكستان استاناسىنان تۇركياعا ۇشىپ، ودان كەيىن برازيليانى باسىپ ءوتىپ، ارگەنتيناعا جەتكەن. بۇل ساپاردىڭ باستى ماقساتى – ورتالىق ازيا ەلدەرىنىڭ بايراعىن انتاركتيداعا ورناتۋ ەدى. الەۋمەتتىك جەلىدە 1،6 ميلليون وقىرمانى بار بلوگەر ءوزىنىڭ اسەرىمەن ءالى دە ءبولىسىپ ءجۇر.
ساپار بارىسىندا ابدۋراحمون قاتتى داۋىل مەن قولايسىز اۋا رايىنىڭ كۋاسى بولدى. تۋريستەر كومانداسى "پورت لە كلارك" ايلاعىنا جەتكەندە داۋىلدان كەيىن عانا تۋ تىگۋ ميسسياسىن ورىندادى.
ول ءوز سوزىندە: "وسى ساپارعا شىعار الدىندا بارلىق 5 ەلدىڭ دە تۋىن الىپ بارۋ يدەياسى ويعا كەلدى. بۇل ءبىر باۋىرلاس ۇلتتار رەتىندە ءبىزدىڭ بىرلىگىمىزدى كورسەتەتىن ەرەكشە كورىنىس بولدى"، – دەدى.
تۋ ورناتۋ ميسسياسى كەيدە اۋا رايىنىڭ قولايسىزدىعىنا بايلانىستى كەشىككەنىمەن، ابدۋراحمون فازيلوۆتىڭ ساپارى ورتالىق ازيا ەلدەرىنىڭ بىرلىگىن، دوستىعىن جانە ورتاق تاريحىن ەرەكشە كورسەتەدى. الەۋمەتتىك جەلى قولدانۋشىلارى ونىڭ بۇل ارەكەتىن جوعارى باعالاپ، قازاقستاننان دا قوڭىراۋ شالىپ، العىستارىن بىلدىرۋدە.
ابدۋراحموننىڭ بۇل ءىسى ورتالىق ازيا ەلدەرى اراسىنداعى بەكەم بىرلىكتىڭ تاعى ءبىر مىسالى بولىپ تابىلادى.
قازاق اقىنى التىنبەك يسمايلوۆ: "بۇل ءىس ورتالىق ازيا ەلدەرىنىڭ اراسىنداعى بىرلىكتى نىعايتۋعا، حالىقتار اراسىنداعى ءوزارا قۇرمەتتى ارتتىرۋعا ۇلكەن ۇلەس قوسىپ وتىر. ءبىز وسى ارقىلى بولاشاقتا دا ءبىر-بىرىمىزدى قولداپ، دوستىقتى ءارى قاراي جالعاستىرۋىمىز قاجەت"، – دەپ پىكىر ءبىلدىردى.
وسىلايشا، ابدۋراحمون فازيلوۆ ءوزىنىڭ تۋىن انتاركتيدادا تىگۋ ارقىلى تەك ساياحات ەمەس، ۇلكەن ءمانى بار سيمۆوليكالىق قادام جاسادى، ول ەلدەرىمىز اراسىنداعى دوستىقتى نىعايتۋعا ەرەكشە ۇلەس قوسىپ وتىر.