3-4 ماۋسىمدا ەلىمىزدىڭ سەيسميكالىق ءقاۋىپتى وڭىرلەرىندە، الماتى، شىمكەنت قالالارى مەن اباي، جەتىسۋ، الماتى، شىعىس قازاقستان، جامبىل، قىزىلوردا جانە تۇركىستان وبلىستارىندا «جەر-2024» رەسپۋبليكالىق كوماندالىق-شتابتىق وقۋ-جاتتىعۋى وتۋدە.
وقۋ-جاتتىعۋدى ۇيلەستىرۋ جونىندەگى رەسپۋبليكالىق شتاب شىعىس قازاقستان وبلىسى وسكەمەن قالاسىندا ورنالاسقان، دەپ حابارلايدى Almaty-akshamy.kz توتەنشە جاعدايلار مينيسترلىگىنە سىلتەمە جاساپ.
3 ماۋسىم ساعات 10:00-دە جويقىن جەر سىلكىنىسىنە ۇشىراۋ مۇمكىندىگى بار اتالعان وڭىرلەردە «بارشانىڭ نازارىنا!» سيرەنا-سويلەۋ قۇرىلعىلارىن ىسكە قوسىلادى. سونداي-اق ادام كوپ جينالاتىن وبەكتىلەردە سەيسميكالىق جاتتىعۋلار وتكىزىلەدى.
وقۋ-جاتتىعۋ ازاماتتىق قورعاۋدىڭ مەملەكەتتىك جۇيەسىنىڭ جويقىن جەر سىلكىنىسى ناتيجەسىندە تۋىنداعان توتەنشە جاعدايدى جويۋعا دايىندىق دەڭگەيىن ارتتىرۋ ماقساتىندا جۇرگىزىلەدى.
اتالمىش ءىس-شاراعا رەسپۋبليكالىق، وڭىرلىك ازاماتتىق قورعاۋ قىزمەتتەرى جانە جەرگىلىكتى اتقارۋشى ورگاندار قاتىسادى، ولار جويقىن جەر سىلكىنىسى جاعدايىندا ءىس-قيمىلداردى پىسىقتايدى.
ونىڭ بارىسىندا اۆاريالىق-قۇتقارۋ جۇمىستارى، زارداپ شەككەن تۇرعىنداردى شۇعىل قابىلداۋ پۋنكتتەرى، ولاردى قابىلداۋ مەن كومەك كورسەتۋگە ارنالعان پالاتكالىق لاگەرلەر مەن دالالىق مەديسينالىق اۋرۋحانالار كورسەتىلەتىن بولادى.