ۇوس ارداگەرلەرى مەن قاتىسۋشىلارىنا 1،5 ملن تەڭگەدەن تولەنەدى
بيىل جەتىسۋ وبلىسىندا ۇلى وتان سوعىسىنداعى جەڭىستىڭ 78 جىلدىعىن مەرەكەلەۋ قارساڭىندا 2309 ازامات جالپى سوماسى 156،7 ملن تەڭگە كولەمىندەگى ءبىرجولعى ماتەريالدىق كومەك الادى. ونىڭ ىشىندە مەملەكەت باسشىسىنىڭ تاپسىرماسىن ورىنداۋ اياسىندا وبلىسىمىزدا تۇراتىن ۇوس ارداگەرلەرى مەن قاتىسۋشىلارىنا 1،5 ملن تەڭگەدەن تولەنەدى، دەپ حابارلايدى Almaty-akshamy.kz جەتىسۋ وبلىسى اكىمىنىڭ باسپا ءسوز قىزمەتىنە سىلتەمە جاساپ.
وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ مالىمەتىنشە، بۇگىندە وڭىردە ۇلى وتان سوعىسىنىڭ 8 ارداگەرى تۇرادى. ولاردىڭ بارلىعى 9 مامىرعا دەيىن ءارقايسىسى 1،5 ملن. تەڭگەدەن الادى. سونداي-اق جىل باسىنان بەرى ارداگەرلەرگە كوممۋنالدىق قىزمەتتەر ءۇشىن تولەم رەتىندە 250 مىڭ تەڭگە تولەندى. وسى ماقساتقا قاراجات جىل سوڭىنا دەيىن دە قاراستىرىلعان. تولەمدەر اي سايىن 3 ايلىق ەسەپتىك كورسەتكىش مولشەرىندە جۇرگىزىلەدى.
ۇوس قاتىسۋشىلارى مەن مۇگەدەكتەرى قاجەتتىلىكتەرىنە قاراي ەستۋ اپپاراتتارى، پروتەزدىك-ورتوپەديالىق بۇيىمدار سياقتى ءارتۇرلى تەحنيكالىق كومەكشى، گيگيەنالىق قۇرالدارمەن، سونداي-اق ساناتوريالىق-كۋرورتتىق جولدامالارمەن ءبىرىنشى كەزەكتە قامتاماسىز ەتىلەدى.
سونداي-اق كسرو-نى قورعاۋدىڭ باسقا كەزەڭدەرىندە مايدان شەبىندە اسكەري قىزمەتتىڭ وزگە دە مىندەتتەرىن اتقارۋ كەزىندە جارالانعان، كونتۋزيا العان، مەرتىگىپ قالعان، مۇگەدەك دەپ تانىلعان 90 اسكەري قىزمەتشىگە ءبىرجولعى ماتەريالدىق كومەك رەتىندە 100 مىڭ تەڭگەدەن جالپى سوماسى 9،0 ملن تەڭگە تولەنەدى.
سونداي-اق ەكىنشى دۇنيەجۇزىلىك سوعىس كەزىندە فاشيستەر مەن ولاردىڭ وداقتاستارى قۇرعان كونسلاگەرلەردە، گەتتولاردا جانە باسقا دا ءماجبۇرلى ۇستاۋ ورىندارىندا قامالعان كەزدە كامەلەتتىك جاسقا تولماعان ازاماتتارعا 100 مىڭ تەڭگەدەن بەرىلەدى. وبلىسىمىزدا بۇل ساناتقا كىرەتىن 1 ادام تۇرادى.
ۇلى وتان سوعىسى كەزىندە قازا تاپقان (قايتىس بولعان، حابار-وشارسىز كەتكەن) جاۋىنگەرلەردىڭ ەكىنشى رەت نەكەگە تۇرماعان اتا-اناسى مەن جەسىرىنە (بۇل ساناتقا جاتاتىن وڭىرىمىزدە 19 ادام بار) 60 مىڭ تەڭگەدەن تولەم جاسالادى. تولەمدەردىڭ جالپى سوماسى 1،1 ملن.تەڭگەدەن اسادى.
وسىنداي قاراجات سوماسى قايتىس بولعان ۇلى وتان سوعىسىنىڭ مۇگەدەكتەرىنىڭ نەمەسە مەملەكەت تاراپىنان قاراستىرىلعان جەڭىلدىكتەرى بويىنشا ۇلى وتان سوعىسىنىڭ مۇگەدەكتەرىنە تەڭەستىرىلگەن ازاماتتاردىڭ ەكىنشى رەت نەكەگە تۇرماعان جۇبايلارىنا دا قاراستىرىلعان (بۇل ساناتقا جاتاتىن وڭىرىمىزدە 32 ادام بار). بۇل ساناتتاعى ازاماتتارعا بارلىعى 1،9 ملن تەڭگەدەن استام قاراجات كوزدەلگەن.
ۇلى وتان سوعىسى جىلدارىندا تىلداعى قاجىرلى ەڭبەگى مەن ءمىنسىز قىزمەتى ءۇشىن بۇرىنعى كسرو وردەندەرىمەن جانە مەدالدارىمەن ناگرادتالعان ادامدارعا، سونداي-اق 1941 جىلعى 22 ماۋسىمنان 1945 جىلعى 9 مامىرعا دەيىنگى ارالىقتا ۇلى وتان سوعىسى جىلدارىندا كەمىندە التى اي جۇمىس ىستەگەن (قىزمەت ەتكەن) جانە تىلداعى قاجىرلى ەڭبەگى مەن ءمىنسىز اسكەري قىزمەتى ءۇشىن بۇرىنعى كسرو وردەندەرىمەن ناگرادتالعان ادامدارعا، سونداي-اق وسى كەزەڭدە مەدالدارمەن ماراپاتتالماعان ادامدارعا دا 60 مىڭ تەڭگەدەن تولەنەدى. وسى ساناتتاعى 2159 ادامعا جالپى سوماسى 129،5 ملن تەڭگەدەن استام قاراجات قاراستىرىلعان.
سونىمەن قاتار وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ حابارلاۋىنشا، 2013 جىلدىڭ سوڭىنا دەيىن 6 جەكەلەگەن سانات بويىنشا ارداگەرلەرگە 150 مىڭ تەڭگە مولشەرىندەگى الەۋمەتتىك تولەم تولەنەدى. ولاردىڭ قاتارىندا اۋعانستانداعى ۇرىس قيمىلدارىنا قاتىسۋشىلار، سەمەي يادرولىق پوليگونىنداعى سىناقتاردان زارداپ شەككەندەر مەن چەرنوبىل اەس اپاتتىڭ سالدارىن جويۋعا قاتىسۋشىلار دا بار.