ۇلى وتان سوعىسىنىڭ قان مايدانىن جاياۋ كەشكەن، كەۋدەسىندەگى وردەنمەدالدارى سىڭعىرلاپ، تاياعىنا سۇيەنىپ جۇرەتىن ارداگەر اتالارىمىزدىڭ سانى ازايىپ قالدى بۇگىندە. ال كەيىنگى ۇرپاق تاريحتىڭ تەرەڭىنە كەتىپ بارا جاتقان سول سۇراپىل سوعىستىڭ قاسىرەتىن، قازىرگى بەيبىت زاماننىڭ قالاي كەلگەنىن، ءقادىرىن ءبىلىپ جۇرۋگە ءتيىس.
بيىلعى مامىر ايىندا ۇلى جەڭىسكە 78 جىل تولادى. جەڭىس كۇنى كەۋدەمىزگە سول كۇننىڭ بەلگىسى رەتىندە ءبىرازعا دەيىن گەورگيي لەنتاسىن تاعىپ كەلگەن بولاتىنبىز. ول لەنتا قوعامدا ءبىراز داۋ تۋدىرىپ، قارسى شىققاندار از بولماعان. ناتيجەسىندە سارى، قارا ءتۇستى گەورگيي لەنتاسىنىڭ ورنىن باسقان ءوزىمىزدىڭ وتاندىق، ويۋمەن كومكەرىلگەن «جەڭىس» لەنتاسى جاسالدى. بۇل لەنتا الەۋمەتتىك جەلىلەردە بىردەن قولداۋ تاۋىپ الا جونەلدى. سوسىن بارىپ رەسمي بەكىتىلدى. كوڭىلگە جىپ-جىلى اسەر بەرەتىن لەنتامىز تاۋەلسىز قازاقستاننىڭ تۋىمەن تۇستەس. ءيا، «جەڭىس» لەنتاسى كوك ءتۇستى جىبەك ماتادان دايىندالعان.
ونىڭ ۇزىندىعى – 30، ال ەنى – 3 سم. ۇلتتىق ويۋمەن كومكەرىلگەن لەنتانىڭ ەكى شەتىندە «وتان سوعىسى» وردەنى بەينەلەنگەن. بۇگىندە جىل سايىن ەلىمىزدە مەرەكە قارساڭىندا «جەڭىس» لەنتاسى تۇرعىندارعا تەگىن تاراتىلىپ ءجۇر. بۇل لەنتا جاي شۇبەرەك ەمەس، ونى اتالارىمىزدىڭ قان مايداندا توگىلگەن قانى مەن جەڭىس ءۇشىن دەپ العا ۇمتىلعاندا تامشىلاعان ماڭداي تەرىنىڭ بەلگىسى ءھام جاس ۇرپاقتىڭ تاريحقا قۇرمەتى دەپ تانۋىمىز كەرەك.
وسىناۋ جەڭىستىڭ سيمۆولىن وتانشىلدىقتىڭ جارقىن ۇلگىسى دەسەك تە قاتەلەسپەيمىز. كوگىلدىر لەنتامىز ءار ۇلاننىڭ كەۋدەسىندە جەلبىرەپ، ولاردىڭ پاتريوتتىق سەزىمىن وياتىپ جاتسا، ماقساتىمىزدىڭ ورىندالعانى. بىلتىر الماتىدا جەڭىس كۇنىنە وراي 40-تان استام ءىسشارا ۇيىمداستىرىلدى. سوعىس باتىرلارى بەينەلەنگەن 40 بيلبورد ورناتىلىپ، جەڭىس تاقىرىبىندا قالانىڭ بارلىق مەديابوردىندا جانە مەتروبەكەتتەرىندە روليكتەر ورنالاستىرىلدى. 20 مىڭ «جەڭىس» لەنتاسى دايىندالىپ، قالا تۇرعىندارىنا تاراتىلعان بولاتىن. ارينە، بيىل دا وسى ءىسشارا زاڭدى جالعاسىن تابادى. تاقىرىپقا وراي ايتا كەتسەك، الماتىدا 59 ۇلى وتان سوعىسىنىڭ ارداگەرى جانە 8243 تىل ەڭبەككەرى تۇرادى.