كەلەسى اپتادان باستاپ 4 پايىزدىق اۆتونەسيە بويىنشا ەلەكتروندى كەزەك ەنگىزىلەدى.
وسىعان بايلانىستى Almaty-akshamy.kz جەڭىلدەتىلگەن اۆتونەسيەگە قاتىستى 10 ماڭىزدى سۇراقتىڭ جاۋابىن ۇسىنادى.
كەزەككە ىلىنگەن ادام سالونعا بارىپ، كولىك تاڭداي بەرەدى. ودان كەيىن بانككە قۇجات اپارۋ قاجەت. ءدال وسىنداي تارتىپپەن الداعى 30 جىل بويى باعدارلامانىڭ قارجىسى اينالىپ، 70 مىڭنان استام ادامعا اۆتوكرەديت بەرىلەدى.
ەلەكتروندى كەزەك قاشان جانە قاي جەردە اشىلادى؟
ەلەكتروندى كەزەككە ارنالعان autonesie.kz سايتى جاسالدى. پورتال ءوتىنىم قابىلداۋ ءۇشىن 6 اقپان كۇنى ساعات 10:00-دە اشىلادى. وعان كومپيۋتەر ارقىلى كىرۋ كەرەك. ءاربىر ادام ءوزىنىڭ ەلەكتروندى سيفرلىق قولتاڭباسىن قولدانادى. سوندىقتان كومپيۋتەردە NCALayer باعدارلاماسى بولۋى قاجەت.
ءوتىنىمنىڭ جاۋابىن ۇزاق كۇتەمىز بە؟
جاۋابى تەز كەلۋى كەرەك. Cايتقا كىرگەننەن كەيىن «ءوتىنىم بەرۋ» باتىرماسىن باسىپ، ەلەكتروندى سيفرلىق قولتاڭبانى قولداناسىز. سول كەزدە ادامنىڭ ءاتى-جونى مەن جەكە سايكەستەندىرۋ ءنومىرى اۆتوماتتى تۇردە شىعادى. ودان كەيىن تەك تەلەفون ءنومىرى مەن ءاۆتووندىرۋشىنى عانا ەنگىزۋ كەرەك. سوڭىندا ءوتىنىمدى سيفرلىق قولتاڭبامەن راسىمدەپ، جىبەرە سالاسىز. سايتتا ءوتىنىمنىڭ ماقۇلدانعانى دا كورسەتىلەدى. «ءسىز ءساتتى تىركەلدىڭىز» دەگەن جازۋ شىعادى. جەكە كابينەتكە حابارلاما كەلەدى.
وتىنىمدە كولىكتىڭ مودەلىن كورسەتۋگە بولا ما؟
وتىنىمدە تەك ءاۆتووندىرۋشىنى عانا كورسەتۋ كەرەك. ول جەردە ەكى كاسىپورىن بولادى. ءبىرىنشىسى – «سارىارقااۆتوپروم» ج ش س، ەكىنشىسى - Hyundai Auto Trans. وزىڭىزگە ۇنايتىن كولىكتى شىعاراتىن كاسىپورىندى بەلگىلەيسىز. ال سالونعا بارعاسىن مودەلدى تاڭدايسىز. ايتا كەتەرلىك جايت، ءاۆتووندىرۋشىنى بەلگىلەپ، ءوتىنىمدى جىبەرگەننەن كەيىن ونى اۋىستىرۋعا بولمايدى.
سالونعا قاي كەزدە بارۋ كەرەك؟
ءوتىنىم ماقۇلدانعاننان كەيىن سالونعا بارىپ، كولىكتىڭ مودەلىن تاڭداۋعا بولادى. ساتىلىمدا بولسا، تولەم ەسەپشوتى بەرىلەدى. ونىمەن بانككە باراسىز. سول جەردە تولەم قابىلەتتىلىگى تەكسەرىلەدى. ءبارى راستالسا، كەپىلحات بەرىلەدى. ونى اۆتوسالونعا اپارۋ كەرەك. كولىكتى راسىمدەۋ شارالارىن 6 كۇننىڭ ىشىندە اياقتاۋ كەرەك.
6 كۇننىڭ ىشىندە كولىكتى سالوننان شىعارىپ الۋ كەرەك پە؟
جوق، 6 كۇن قۇجات راسىمدەۋگە بەرىلەدى. سالوندا ءسىز تاڭداعان مودەل بار بولسا، بىردەن ساتىپ الۋعا بولادى. بولماعان جاعدايدا، كولىكتەردى جەتكىزۋ جوسپارىن سۇراۋ كەرەك. ەگەر قاجەتتى كولىك الداعى ەكى ايلىق جوسپاردا تۇرسا، ءاۆتووندىرۋشى ونى 60 كۇننىڭ ىشىندە جەتكىزىپ بەرۋگە مىندەتتى. جوسپاردا بولماسا، باسقا مودەلدى تاڭداۋعا تۋرا كەلەدى.
ءوتىنىمدى قابىلداۋ ءليميتى بار ما؟
ءيا، كەلەسى ايدا تەك 761 ءوتىنىم عانا قابىلدانادى. سەبەبى ريەۆولۆەرلىك اينالىممەن، ياعني، بۇعان دەيىن بەرىلگەن اۆتونەسيەلەردەن 7،6 ميلليارد تەڭگە ءتۇستى. بۇنىڭ بارلىعى - بانكتەرگە اي سايىن اۋدارىلاتىن تولەمدەر. ال باعدارلاما شارتىنا سايكەس، اۆتوكرەديتتەن تۇسكەن قارجى قايتادان جەڭىلدەتىلگەن نەسيەگە جۇمسالۋى قاجەت. 4 پايىزدىق كرەديتتىڭ شەكتى سوماسى – 10 ميلليون تەڭگە. دەمەك، كەلەسى ايدا 7،6 ميلليارد تەڭگە 761 ادامعا اۆتوكرەديت بەرۋگە جەتەدى. ءوتىنىم سانى وسى كورسەتكىشكە جەتكەن بويدا پورتال جابىلادى.
كەلەسى ايدا دا ءوتىنىم بەرۋگە بولا ما؟
ناۋرىز ايىندا تاعى ءوتىنىم قابىلدانادى. ءبىراق ول كەزدە 100 ادام عانا ءوتىنىش جىبەرە الادى. سەبەبى ءبىر ايدىڭ ىشىندە اينالىم قاراجاتتىڭ كولەمى كوپ بولمايدى. جالپى، ءدال وسىنداي تارتىپپەن الداعى 30 جىل بويى باعدارلامانىڭ قارجىسى اينالىپ تۇرادى دەگەن جوسپار بار. وسى ۋاقىتتىڭ ىشىندە 70 مىڭنان استام ادامعا جەڭىلدەتىلگەن اۆتونەسيە بەرىلەدى.
اقپاندا تولەم قابىلەتتىلىگىنەن راستاي الماعانداردىڭ ورنى قاي كەزدە بوسايدى؟
اقپان ايىندا بىرەۋدىڭ ءوتىنىمى ماقۇلدانىپ، ارتىنان بانكتەن وتە الماسا، ونىڭ ورنى تەك ءبىر ايدان كەيىن عانا بوسايدى. سەبەبى 761 ادامنان تۇراتىن پۋل جاساقتالادى، ال پورتال كەلەسى ايعا دەيىن جابىق تۇرادى. سوندىقتان ماماندار ءوتىنىم بەرەردىڭ الدىندا اۆتوكرەديتتى تولەۋگە شاماڭىز جەتە مە، جوق پا، وسى ماسەلەنى الدىن الا پىسىقتاپ الۋعا كەڭەس بەرىپ وتىر. ايتپەسە، بىرەۋدىڭ كەزەگىن ۇستاپ تۇراسىز.
پورتال ءوتىنىمدى قابىلداماۋى مۇمكىن بە؟
پورتالدىڭ ءوزى ءوتىنىمدى كەرى قايتارۋى مۇمكىن. بىرىنشىدەن، ادام وسى باعدارلاما بويىنشا بۇرىن كولىك السا، ءوتىنىم قابىلدانبايدى. ءبىر ادام ءوتىنىمدى ەكىنشى رەت جىبەرسە، سونداي-اق، ءبىر ايلىق پۋل تولىپ كەتكەن جاعدايدا ءوتىنىم كەرى قايتارىلادى. ەلەكتروندى كەزەككە تەك كەلەسى ايدا عانا تۇرۋعا مۇمكىندىك بولادى.
اۆتوسالونداردا جاسالعان بۇرىنعى كەزەك سانالا ما؟
جوق. بارلىعى جاڭا پورتال ارقىلى جاسالادى. ال اۆتوسالوندار دا، بانكتەر دە كەلگەن ادامنىڭ autonesie.kz سايتىندا تىركەلگەن-تىركەلمەگەنىن تەكسەرىپ وتىرادى.
باعدارلاما شارتتارى بۇرىنعىداي. شەكتى سوما – 10 ميلليون تەڭگە. ەگەر كولىكتىڭ باعاسى ودان قىمبات بولسا، نەسيە الۋشى ءوز قالتاسىنان قوسادى. اۆتوكرەديتتىڭ مەرزىمى – 7 جىل، العاشقى جارناسىز.