ادام قۇقىقتارى جونىندە بۇۇ جوعارى كوميسسارى قازاقستاندا «ادام قۇقىقتارى جونىندە ۋاكىل» تۋرالى زاڭنىڭ قابىلدانۋىنان حاباردار.
بۇل ادام قۇقىقتارىن قامتاماسىز ەتۋ جانە قورعاۋ سالاسىندا ەلىمىز العان مىندەتتەمەلەردى ورىنداۋعا سەپتىگىن تيگىزەدى. بۇل تۋرالى جەنيەۆادا قازاقستاندىق ومبۋدسمەن ەلۆيرا ازىموۆامەن وتكەن كەزدەسۋدە بەلگىلى بولدى، دەپ حابارلايدى Almaty-akshamy.kz 24.kz-كە سىلتەمە جاساپ.
«ادام قۇقىقتارى جونىندە بۇۇ جوعارى كوميسسارى ميشەل باچەلەتپەن كەزدەسۋ بارىسىندا قازاقستان پرەزيدەنتى بيىل 16 ناۋرىزدا جاريالاعان باستامالارىن جۇزەگە اسىرۋ ماسەلەلەرى مەن مۇمكىندىكتەرىن ۇزاق تالقىلادىق. باچەلەت حانىم باستامالارعا قولداۋىن ءبىلدىردى، ءبىراق وسى باستامالاردىڭ ناتيجەلەرىن بارىنشا كەڭ ۇسىنۋدىڭ ماڭىزىن اتاپ كەتتى. قاڭتار وقيعالارى بويىنشا تەرگەۋ قالاي ءوتىپ جاتقانىن تالقىلادىق. ارينە ازاماتتارىمىزدىڭ پروسەسۋالدىق قۇقىقتارىنىڭ ساقتالۋى بويىنشا الاڭداۋشىلىق ءبىلدىردى. سونداي-اق تەرگەۋ ناتيجەلەرى بۇقارالىق اقپارات قۇرالدارىندا كەڭ جاريالانۋى كەرەكتىگى ايتىلعان»، - دەيدى ق ر ادام قۇقىقتارى جونىندە ۋاكىل ەلۆيرا ءازىموۆا.
ادام قۇقىقتارىن قورعاۋشى بەلدى حالىقارالىق ۇيىمدارمەن كەزدەسۋ بارىسىندا قازاقستان دەلەگاسياسىنىڭ مۇشەلەرى ولاردى سىندارلى ىنتىماقتاستىققا جانە ەلىمىزدىڭ قۇقىق قورعاۋ ورىندارىنىڭ جۇمىسىن جەتىلدىرۋ بويىنشا بىرلەسىپ ەڭبەك اتقارۋعا شاقىردى.
«ۇنەمى حالىقارالىق تەرگەۋ قاجەت دەگەن اڭگىمە قوزعالعاندا، مەن بىردەن بۇلاي بولمايدى، ويتكەنى بۇل حالىقارالىق ۇيىمداردىڭ، وزگە مەملەكەتتىڭ ىشكى ىستەرىنە ارالاسۋى دەپ ايتامىن. ال ساراپتاۋ جۇمىسىنا، ماسەلەن، قۇقىق قورعاۋ ورىندارى مەن كۇشتىك قۇرىلىمداردىڭ جۇمىسىن تالداۋعا كومەكتەسە الادى. ءبىزدىڭ مەملەكەتىمىز دە بۇعان كەلىسەدى دەپ ويلايمىن. ءبىراق تاعى دا قايتالاپ ايتامىن، ەشقانداي حالىقارالىق تەرگەۋ بولمايدى، ناقتى باعا بەرە الاتىن ءوز ماماندارىمىز بەن ساراپشىلارىمىز جەتكىلىكتى»، - دەيدى ادام قۇقىقتارى ءۇشىن حارتيا» قق اتقارۋشى ديرەكتورى جەمىس تۇرماگامبەتوۆا.