بۇل 7 ايدىڭ مالىمەتى.
سىبايلاس جەمقورلىققا قارسى اگەنتتىك بيىل 876 قىلمىستىق قۇقىق بۇزۋشىلىقتى تىركەگەن، دەپ حابارلايدى Almaty-akshamy.kz
ونىڭ ىشىندە پاراقورلىق، جىمقىرۋ جانە لاۋازىمدىق وكىلەتتىكتى تەرىس پايدالانۋ بار.
اكىمدىكتەردىڭ، كۆازيمەملەكەتتىك سەكتوردىڭ جانە قۇقىق قورعاۋ ورگاندارىنىڭ قىزمەتكەرلەرى جەمقورلىققا بارىنشا بەيىم. جەمقورلىق تاۋەكەلدەرى جوعارى سالالارعا ءبىلىم بەرۋ، اۋىل شارۋاشىلىعى، دەنساۋلىق ساقتاۋ جانە الەۋمەتتىك قامسىزداندىرۋ جاتادى.
ۆەدومستۆو باسشىسى ا. جۇماعالي اتاپ وتكەندەي، اگەنتتىك جوعارى لاۋازىمدى تۇلعالاردىڭ قاتىسى بار قىلمىستىق سحەمالاردى اشكەرەلەۋگە بايلانىستى ساندىق ەمەس، ساپالىق كورسەتكىشتەرگە باعدارلانعان.
«انىقتالعان قىلمىستاردى جاساۋدا 592 ادام اشكەرەلەندى، ونىڭ ىشىندە 107 باسشى. ولاردىڭ ىشىندە بۇرىنعى مينيسترلەر، ۆيسە-مينيسترلەر، كوميتەت ءتوراعالارى، وبلىستىق باسشىلار بار. سىبايلاس جەمقورلىققا قارسى قىزمەت ادىلەت ەكس-مينيسترىنە جانە باسقا دا ادامدارعا قاتىستى سوتقا دەيىنگى تەرگەپ-تەكسەرۋدى اياقتادى»، - دەلىنگەن اگەنتتىك تاراتقان اقپاراتتا.
ول جەكە كومپانيانىڭ باسشىلىعىمەن بىرگە بيۋدجەت قاراجاتىن اسا ءىرى مولشەردە جىمقىردى، الاياقتىق جاسادى جانە كاسىپكەرلىك قىزمەتكە زاڭسىز قاتىستى دەگەن كۇدىككە ىلىنگەن.
سونداي-اق، اگەنتتىك بۇرىنعى مادەنيەت جانە سپورت ۆيسە-مينيسترى مەن مەردىگەر ۇيىمنىڭ باسشىلىعىنا قاتىستى لاۋازىمدىق وكىلەتتىكتەرىن اسىرا پايدالاندى جانە بيۋدجەت قاراجاتىن جىمقىردى دەگەن كۇدىك بويىنشا قىلمىستىق ءىستى تەرگەۋدى اياقتادى.
اتالعان ىستەردىڭ ءارقايسىسى بويىنشا زالال 1 ملرد تەڭگەدەن اسادى.