سىبايلاس جەمقورلىققا قارسى ءىس-قيمىل اگەنتتىگىنىڭ 1424 Call-ورتالىعىنا 2023 جىلى 27 752 قوڭىراۋ تۇسكەن. ونىڭ 6 708ء-ى عانا سىبايلاس جەمقورلىققا قارسى قىزمەتتىڭ قۇزىرەتىنە جاتادى. اگەنتتىك وسىلاي رەسمي جاۋاپ بەردى.
ال 2024 جىلدىڭ العاشقى ەكى ايىندا 5 274 حابارلاما تۇسسە، سونىڭ 1 039-ى عانا انتيكوردىڭ قۇزىرىنا جاتاتىن بولىپ شىققان. بارلىق ءوتىنىش بويىنشا تۇسىندىرمەلەر بەرىلىپ، ماسەلەنىڭ مانىنە بايلانىستى ءتيىستى شارالار قابىلدانعان.
ازاماتتاردىڭ وتىنىشتەرىنىڭ سيپاتى كوبىنە قۇقىق قورعاۋ ورگاندارىنىڭ ىس-ارەكەتتەرىن قاداعالاۋعا، سونىمەن قاتار، ىشكى ىستەر، ءبىلىم بەرۋ، دەنساۋلىق ساقتاۋ سالالارى قىزمەتكەرلەرىنە، سونداي-اق تۇرعىن ۇي-كوممۋنالدىق شارۋاشىلىعى مەن الەۋمەتتىك قامسىزداندىرۋ ماسەلەلەرىنە قاتىستى، – دەلىنگەن رەسمي جاۋاپتا.
اگەنتتىكتىڭ حابارلاۋىنشا، 1424 Call-ورتالىعىنا تۇسەتىن حالىقتىڭ بارلىق ماسەلەسىن قىزمەتكەرلەر جۇمىس كۇنىنىڭ سوڭىندا وڭدەيدى.
ايتا كەتۋ كەرەك، سىبايلاس جەمقورلىق فاكتىسى تۋرالى حابارلاعان نەمەسە جەمقورلىققا قارسى ءىس-قيمىلعا وزگە دە جولمەن جاردەمدەسەتىن (كورسەتكەن) ادامداردى كوتەرمەلەۋ جاعى اگەنتتىك ءتوراعاسىنىڭ 2023 جىلعى 29 تامىزداعى №270 بۇيرىعىمەن بەكىتىلگەن قاعيدالاردا كوزدەلگەن. ماسەلەن، 2023 جىلى 73 ادامعا 22 416،3 مىڭ تەڭگە سىياقى تولەنسە، بيىل اۋەلگى 2 ايدا 18 ادام 2 786،3 مىڭ تەڭگەمەن ماراپاتتالعان.
سونىمەن قاتار، ەل ازاماتتارى جەمقورلىق قۇقىقبۇزۋشىلىق تۋرالى حابارلامالارىن ە-وtinish ءبىرىڭعاي وڭدەۋ پلاتفورماسى، antikorkz_bot Telegram-ارناسى ارقىلى نەمەسە اۋماقتىق دەپارتامەنتتەرگە جازباشا حابارلاي الادى.