الماتىدا قازاقستان رەسپۋبليكاسىنىڭ تاۋەلسىزدىك كۇنى مەن جەلتوقسان وقيعاسىنىڭ 39 جىلدىعىنا ارنالعان ءىس-شارالار جوسپارى بەكىتىلدى، دەپ حابارلايدى aqshamnews.kz
باعدارلامانىڭ نەگىزگى ماقساتى – جاستار اراسىندا پاتريوتتىق تاربيەنى كۇشەيتۋ، ۇلتتىق تاريح پەن ەلدىڭ ەرلىككە تولى ماڭىزدى كەزەڭدەرىنە دەگەن قۇرمەتتى قالىپتاستىرۋ.
16-17 جەلتوقسان قارساڭىندا مەملەكەتتىك مەكەمەلەردە، قالا كىتاپحانالارى مەن ءبىلىم بەرۋ ۇيىمدارىندا تاقىرىپتىق كەزدەسۋلەر، پاتريوتتىق جانە ادەبي-مۋزىكالىق كەشتەر، دوڭگەلەك ۇستەلدەر، تاريحي-تانىمدىق ساعاتتار، دارىستەر، ادەبي وقۋلار جانە باسقا دا ماڭىزدى داتالارعا ارنالعان ءىس-شارالار وتەدى.
وسى كۇندەرى رەسپۋبليكا الاڭىنداعى تاۋەلسىزدىك مونۋمەنتىنە جانە «تاۋەلسىزدىك تاڭى» ەسكەرتكىشىنە ءداستۇرلى گۇل قويۋ ءراسىمى ۇيىمداستىرىلادى. وعان قالا باسشىلىعى، ءماسليحات دەپۋتاتتارى، قوعامدىق كەڭەس مۇشەلەرى، 1986 جىلعى وقيعاعا قاتىسۋشىلار، ەتنومادەني بىرلەستىكتەر وكىلدەرى جانە جاستار قاتىسادى.
17 جەلتوقساندا قالانىڭ بارلىق سەگىز اۋدانىندا 1986 جىلعى جەلتوقسان وقيعاسىندا قازا بولعانداردى ەسكە الۋعا ارنالعان اس بەرىلەدى.
بۇدان بولەك، قالا اكىمدىگى جەلتوقسان قاھارماندارىنىڭ ازاماتتىق ەرلىگىن دارىپتەۋگە جانە جاستار اراسىندا وتانسۇيگىشتىك سەزىمىن نىعايتۋعا باعىتتالعان ءتورت مەملەكەتتىك الەۋمەتتىك جوبانى جۇزەگە اسىرىپ جاتىر. اتالعان جوبالار اياسىندا قايىرىمدىلىق اكسيالارى، سپورتتىق تۋرنيرلەر، شىعارماشىلىق جانە پاتريوتتىق ءىس-شارالار، تاقىرىپتىق كونفەرەنسيالار مەن بايقاۋلار وتكىزۋ جوسپارلانعان.
بۇل ءىس-شارالار تاريحي جادتى ساقتاۋ، تاۋەلسىزدىك ءۇشىن كۇرەسكەن بۋىننىڭ ەرلىگىنە قۇرمەت كورسەتۋ جانە وسى قۇندىلىقتاردى جاس ۇرپاققا جەتكىزۋگە باعىتتالعان.