پرەزيدەنت رەفورمالارى: ايتىلدى – جاسالدى
سيفرلاندىرۋ – بۇل جايلىلىق پەن كەڭ مۇمكىندىكتەر بەرەتىن زاماناۋي الەمنىڭ يگىلىگى بولسا دا، مۇندا دا الاياقتارمەن بەتپە-بەت كەلۋ مۇمكىن ەكەنىن قاپەردە ۇستاعان ءجون. اقپاراتتىق تەحنولوگيالاردى كەڭىنەن ەنگىزۋ كيبەرقىلمىس سانىنىڭ كوبەيۋىنە اكەلدى. ىشكى ىستەر مينيسترلىگىنىڭ مالىمەتىنشە، بيىلعى جىلدىڭ باسىنان بەرى قۇقىق قورعاۋ ورگاندارى وسىنداي 1،5 مىڭ قۇقىق بۇزۋشىلىقتى تىركەگەن.
الاياقتاردىڭ قۇرىعىنا قالاي تۇسپەۋگە بولادى؟
قالاي بولسا دا، كۇماندى سىلتەمەلەرگە جولاماڭىز جانە سىزبەن بايلانىسقان ادام ءوزىن قۇقىق قورعاۋ ورگانىنىڭ قىزمەتكەرى نەمەسە بانك قىزمەتكەرى رەتىندە تانىستىرسا دا، جەكە دەرەكتەرىڭىزدى ەشكىممەن بولىسپەڭىز. سونىمەن قاتار، قازاقستاندا تىركەلمەگەن نەمەسە اۋىستىرىلعان ابونەنتتىك نومىرلەردەن كەلەتىن قوڭىراۋلاردى بۇعاتتايتىن انتيفرود-جۇيە ءقازىردىڭ وزىندە قولدانىلا باستادى. بۇل ىشكى ىستەر جانە سيفرلىق دامۋ مينيسترلىكتەرىنىڭ بىرلەسكەن جۇمىسىنىڭ ارقاسىندا مۇمكىن بولدى.
«انتيفرود» ابونەنتتىك قوڭىراۋلار تۋرالى اقپاراتتى وڭدەۋ ارقىلى الاياقتاردىڭ قوڭىراۋلارىن بۇعاتتايدى. ارنايى ءبىرىڭعاي جۇيەنىڭ كومەگىمەن بايلانىس وپەراتورى ءنومىردىڭ بەلسەندىلىگى تۋرالى دەرەكتەردى سۇرايدى جانە ولاردى اۆتوماتتى رەجيمدە تالدايدى. ەگەر جۇيە قوڭىراۋدىڭ شىنايى ەكەنىن جانە ءنومىردىڭ جالعان ەمەس ەكەنىن راستاسا، ءقاۋىپسىز بايلانىس ورناتىلادى.
بايلانىس وپەراتورلارىنىڭ مالىمەتىنشە، 2022 جىلى جۇيەنى بىرىكتىرگەننەن كەيىن 19 ملن-نان استام الاياقتىق قوڭىراۋلار بۇعاتتالدى، ال بيىلعى ەكى ايدا وسىنداي 8 ميلليون قوڭىراۋعا توسقاۋىل قويىلدى. بۇگىندە ۇيالى بايلانىس وپەراتورلارى مۇنداي جاعدايلاردى تولىعىمەن جويۋ ءۇشىن الگوريتمدەردى جەتىلدىرۋدە.