مەملەكەت باسشىسى قاسىم-جومارت توقايەۆ ءوز سوزىندە ايەل-انالاردىڭ يىعىنا وتباسىنىڭ عانا ەمەس، بۇكىل ۇلتتىڭ جاۋاپكەرشىلىگى جۇكتەلىپ وتىرعانىن ايتىپ، «ەل باسىنا كۇن تۋعاندا، اسىل انالارىمىز بەن اياۋلى ارۋلارىمىز قيىندىققا مويىماي، ۇلت تاعدىرىنا ارالاستى. ەسەلى ەڭبەگىمەن جانە ەرەن ەرلىگىمەن تانىلعان ايەلدەردىڭ ەسىمدەرى تاريح جىلناماسىنا ماڭگىلىككە جازىلىپ، جادىمىزدا جاتتالادى. بۇگىنگى ەگەمەن ەلىمىزدە دە ايەلدەر قاۋىمى ءۇشىن جاڭا مۇمكىندىكتەرگە جول اشىلدى. وتباسى ينستيتۋتىن، كوپ بالالى انالاردى، كاسىپكەر ايەلدەردى قولداۋ جانە گەندەرلىك تەڭدىكتى قامتاماسىز ەتۋ – مەملەكەتتىك ساياساتتىڭ اسا ماڭىزدى باسىمدىعى»، – دەگەن ەدى.
سونداي ۇلكەن جولدا وزىنە دەگەن سەنىم ۇدەسىنەن شىعىپ كەلە جاتقان ءسابيلا مىرزاش قىزى ءوزى تاڭداعان ماماندىققا ارناپ قانا قويماي، جيعانى مەن تەرگەنىن، كورگەنى مەن تۇيگەنىن جاس ۇرپاققا جالىقپاي ۇيرەتىپ كەلە جاتقان ۇلاعاتتى ۇستاز. سونىمەن قاتار، ءسابيلا مىرزاش قىزى قالامىزداعى پۋشكين اتىنداعى №4 گيمنازيانىڭ بىلىكتى باسشىسى. ۇستازدار وتباسىنان تالىم-تاربيە العان العىر قىز سوناۋ 1982 جىلدان بەرى وسى جولدا ابىرويمەن ەڭبەك ەتىپ كەلەدى. ناعىز ەڭبەك ادامى. جاس كەزىندە وزگە قۇربى-قۇرداستارىنىڭ ءبىرى ەكونوميست، ەندى ءبىرى زاڭگەر ماماندىعىن تاڭداپ جاتقاندا، سابيلا ەش ويلانباستان اتا-اناسىنىڭ جولىن قۋىپ، ۇستازدىق جولدى تاڭدادى. ءقازىر قاراپ وتىرسا، قاتەلەسپەگەن ەكەن. ەگەر باسقا سالانى تاڭداعاندا ءوزى قالاعان ارمان بيىگىنەن كورىنەر مە ەدى، كورىنبەس پە ەدى؟ كىم ءبىلسىن؟ تالاي بالانىڭ قولىنا قالام بەرىپ، قارا تانىتقان اكەسى مىرزاش سول اۋىلداعى ءاربىر ءۇيدىڭ قامقورى بولسا، اناسى قوعامدىق جۇمىستىڭ بەل ورتاسىندا جۇرەتىن ناعىز بەلسەندى ەدى.
بۇگىندە 93 جاسقا كەلگەن اناسى استانادا تۇرىپ جاتىر. وسىنداي ورتادان تاربيە الىپ، ىزگىلىك نۇرىنان ءنار العان ءسابيلانىڭ ءومىر داستانى دا اتا-اناسى سالعان جولمەن ءتۇيىستى. قالانىڭ قىزى بولا تۇرا، وقۋ ورداسىن بىتىرگەن سوڭ، جولدامامەن اۋىلعا باردى. العاشقى ەڭبەك جولىن اۋىل مەكتەبىنەن باستادى. مىنە، سودان بەرى شيرەك عاسىر بويى وسىناۋ ۇستازدىق اتتى ۇلى جولدا يماندىلىق پەن ىزگىلىك، ادالدىق پەن ادىلدىك سىندى اسىل قاسيەتتەردى بويتۇمار ەتىپ كەلەدى. ارادا قانشا جىل وتسە دە، وزىنەن دە، وزگەدەن دە تالاپ ەتەتىن مىنەزى ءالى بار. ۇلاعاتتى ۇستاز وسىناۋ جىلدار ىشىندە ەڭبەك جولىن مەكتەپ ءمۇعالىمى بولىپ باستاپ، بالاباقشادا تاربيەشى، ادىسكەر، مەكتەپ ديرەكتورىنىڭ ورىنباسارى سياقتى بارلىق پەداگوگيكالىق باسپالداقتاردان ءوتتى. ۇزاق جىلعى تىنىمسىز ەڭبەگىنىڭ ارقاسىندا مەكتەپ باسشىسى اتاندى. قاراپ وتىرساڭىز، سابيلا مىرزاش قىزىنىڭ ەڭبەك جولىنىڭ ەرەكشەلىگى دە وسىندا بولسا كەرەك.
بۇگىندە ءوز سالاسىنىڭ بىلگىرى اتانعان ءسابيلا مىرزاش قىزىنىڭ ءوز جولى بار. مىڭداعان شاكىرت تاربيەلەپ، ءوزىنىڭ شەبەرلىك مەكتەبىن قالىپتاستىردى. مەدەۋ اۋدانىنداعى جاس پەداگوگتاردىڭ اقىلشىسىنا اينالدى. جالپى، ايەل ادامنىڭ قىزمەتتە، اسىرەسە باسشى قىزمەتتە ءجۇرۋى ارينە قيىنداۋ. مۇنداي كەزدە كوبىنە وتباسىنىڭ ماسەلەسىن ەمەس، ءوزى باسشىلىق ەتىپ وتىرعان مەكەمە تۋرالى عانا ويلاپ، كوپ وي تۇيۋگە تۋرا كەلەدى ەكەن.
– ۇستاز بولۋدىڭ ءوزى - ۇلكەن قۇرمەت. ۇستاز ەڭبەگىنىڭ قىزىعى مەن قيىندىعى قاتار جۇرەدى. قيىندىعى ۇستازدىڭ الدىندا ۇلكەن جاۋاپكەرشىلىك، قىرۋار مىندەت تۇر. بولاشاق ۇرپاقتىڭ ەلدىڭ كوسەگەسىن كوگەرتەتىن، اسقاق رۋحتى بولۋى دا ۇستازعا بايلانىستى. سوندىقتان ەلىمىزدىڭ وسىپ-وركەندەۋىنە ۇستازدىڭ قوسىپ وتىرعان ۇلەسى مول دەر ەدىم. ال ەندى قىزىعى، ۇستازداردىڭ ماڭگى جاس كەيپىن ساقتاپ، جان جىلۋىن جوعالتپايتىن اسىل قاسيەتى. مەن ءوز ومىرىمدە قازاق ءبىلىمىنىڭ وركەندەۋىنە ولشەۋسىز ۇلەس قوسىپ، ەلىمىزدىڭ تۇڭعىش ەڭبەك ەرى اتانعان اياگۇل ميرازوۆانى ەرەكشە ءپىر تۇتامىن. سول كىسىگە ۇقساعىم كەلەدى. ۇستازداردىڭ ۇستازىنان ۇيرەنگىم كەلەدى. قازىرگى اقپاراتتىق زاماننىڭ جەلى ۇستازدارعا دا وزىندىك اسەرىن تيگىزىپ جاتىر. سوندىقتان بولار، بىزگە قويىلىپ وتىرعان تالاپ تا جوعارى. قازىرگى زامانعى ۇستاز اقپاراتتاندىرىلعان، جاڭا فورماتتى، جان-جاقتى، دۇنيەتانىمى كەڭ، تاربيەلى ءارى سانالى شاكىرت دايىنداۋدا وقىتۋدىڭ ءتيىمدى ادىس-تاسىلدەرىن، زاماناۋي يننوۆاسيالىق تەحنولوگيالاردى تەرەڭ مەڭگەرۋى كەرەك. سوندىقتان دا مەن ءوز ۇجىمىمىزداعى ۇستازدارىمىزدىڭ وسى تالاپقا ساي بولۋىن ءبىرىنشى ورىنعا قويامىن. قازىرگى ۋاقىتتىڭ بىزگە قويار تالابى – ءمۇعالىم دە، مەكتەپ باسشىسى دا ساپالى بىلىمگە جەتۋ جولىندا ايانباي ەڭبەك ەتۋى كەرەك. سوندىقتان مەكتەبىمىزدە قوعامدىق وزگەرىستەرگە تەز يكەمدەلەتىن، جاڭالىققا جانى قۇمار، شىعارماشىل، ياعني دەڭگەيلىك كۋرس باعدارلاماسىن وقىپ-ۇيرەنىپ، تاجىريبەدە قولدانۋ ارقىلى ناتيجەگە جەتىپ جۇرگەن ۇستازدارىمىز وتە كوپ، – دەيدى سابيلا مىرزاش قىزى.
بۇگىنگى ءبىلىم جۇيەسى جاڭاشا دامىعان، وزگەرىستەرگە تولى. جاس ۇرپاق جاڭا بۋىندى وقۋلىقتارمەن، جاڭا تەحنولوگيالارمەن ءبىلىم الۋدا. وركەنيەتتىڭ ءتول تۋىندىلارى تورگە وزدى. وسىناۋ ۇشقىر ۋاقىت زاماناۋي باسشىدان نە تالاپ ەتەدى؟ قازىرگى مەكتەپ باسشىسى قانداي بولۋى كەرەك؟ ەڭ الدىمەن، سەنىمدى جەتەكشى بولۋ، جاۋاپكەرشىلىكتى وزىنە الۋ، ۇيىمداستىرۋشىلىق قابىلەتىن دالەلدەۋ، ءوز جۇمىسىن ۇنەمى ىشتەي باعالاۋ جانە الداعى قاجەتتەلىكتەردى انىقتاۋ، جاڭا يدەيالار مەن ۇردىستەردى زەردەلەپ، قاجەتتىسىن تاڭداۋدا باستاماشىل بولۋ، بەرىلگەن تاپسىرمالاردىڭ ۋاقىتىندا دۇرىس ورىندالۋىن قاداعالاۋ، مەكتەپ ومىرىندە كەزدەسكەن سيتۋاسيالىق جاعدايلاردى شەشە ءبىلۋ. مىنە، وسىنداي ەرەكشەلىكتەر تابيعات بەرگەن سابىرلى مىنەز بەن ۇزاق جىلعى تاجىريبەگە باي سابيلا مىرزاش قىزىنىڭ بويىنان تابىلارى انىق.
ۇلاعاتتى ۇستاز مەكتەپتە بىلىكتى باسشى بولسا، وتباسىندا اسىل جار، ارداقتى انا، سۇيىكتى اجە. جاراسىمدى وتباسىنىڭ وتاعاسى تالعات عىلىم سالاسىندا، پروفەسسور، بالالارى ءنادىر، اسەل، عالىمجان، اقمارال، ارۋجان، قىلىعى بالداي ءتاتتى نەمەرەلەرى ءسابيلا مىرزاشقىزىن اركەز ساعىنا توسىپ وتىرادى. ورتاسىنا دا، وتباسىنا دا ءقادىرلى ءسابيلا مىرزاش قىزى سىندى ايەلدەرمەن الەم دە ادەمى ەكەن.
ازىرلەگەن رايا ەسكەرمەس قىزى.