13 تامىزدا، قاراعاندى وبلىسىنىڭ پروكۋراتۋراسى الەۋمەتتىك جەلىلەردە ۇلتارالىق ارازدىقتىڭ ءورشۋى تۋرالى ماڭىزدى مالىمدەمە جاسادى، - دەپ حابارلايدى اqshamnews.kz ءتىلشىسى.
"قازاقستان رەسپۋبليكاسىنىڭ كونستيتۋسياسى، ۇلتارالىق كەلىسىمدى بۇزۋعا اكەپ سوعۋى مۇمكىن كەز كەلگەن ارەكەتكە تىيىم سالادى"، - دەلىنگەن حابارلامادا.
ۇلتارالىق ارازدىق – قوعامدىق تۇراقتىلىق پەن بىرلىككە تونەتىن ەڭ قاتەرلى قاۋىپتەردىڭ ءبىرى.
مۇنداي ارەكەتتەردىڭ سالدارى – جاپپاي تارتىپسىزدىكتەرگە، الەۋمەتتىك قۇرىلىمنىڭ بۇزىلۋىنا، سونداي-اق ەتنوستار مەن مادەني توپتار اراسىنداعى تەرەڭ قايشىلىقتارعا الىپ كەلۋى مۇمكىن.
اتالعان قۇقىقبۇزۋشىلىقتاردىڭ جاسالۋ الاڭى رەتىندە «Instagram»، «TikTok»، «Threads» سياقتى الەۋمەتتىك جەلىلەر تانىلىپ وتىر. بۇل پلاتفورمالاردا ءاربىر قولدانۋشىعا پىكىر ءبىلدىرۋ بوستاندىعى بەرىلگەن.
الايدا ۇلتارالىق ارازدىقتى قوزدىراتىن پىكىرلەر قازاقستان رەسپۋبليكاسىنىڭ قىلمىستىق كودەكسىنىڭ 174-بابىنا سايكەس قىلمىستىق جاۋاپكەرشىلىككە اكەپ سوعادى. اتاپ ايتقاندا، بۇل باپ بويىنشا 2 جىلدان 7 جىلعا دەيىن باس بوستاندىعىنان ايىرۋ، ال اۋىر زارداپتارعا اكەلگەن جاعدايدا – 12 جىلدان 20 جىلعا دەيىن باس بوستاندىعىنان ايىرۋ جازاسى قاراستىرىلعان. بۇل ارەكەتتەر ەكسترەميستىك قىلمىستار ساناتىنا جاتادى.
مۇنداي قۇقىقبۇزۋشىلىقتار ءۇشىن كىنالى تۇلعالار بەلسەندى وكىنىش بىلدىرۋىنە، جابىرلەنۋشى تاراپپەن تاتۋلاسۋىنا، قىلمىستىق ارەكەتتىڭ ەسكىرۋ مەرزىمىنىڭ وتۋىنە نەمەسە راقىمشىلىق اكتىسىنە بايلانىستى قىلمىستىق جاۋاپكەرشىلىكتەن جانە جازادان بوساتىلمايدى.
تاجىريبە كورسەتكەندەي، قۇقىق قورعاۋ ورگاندارى تاراپىنان تۇلعاسى انىقتالعاننان كەيىن، كىنالى ازاماتتار ءوز ىس-ارەكەتىنە وكىنىپ، كوپشىلىك الدىندا كەشىرىم سۇرايدى. الايدا بۇل ولاردىڭ جاۋاپكەرشىلىگىن جويۋعا نەگىز بولىپ تابىلمايدى.
وسىعان بايلانىستى بارلىق ازاماتتى زاڭ تالاپتارىن ساقتاۋعا، ءاربىر حابارلاماعا جانە ايتىلعان سوزدەرگە جاۋاپكەرشىلىكپەن قاراۋعا شاقىرامىز.
قوعامداعى بەيبىتشىلىك، تۇراقتىلىق پەن سەنىمدى تەك ورتاق قۇقىقتىق مادەنيەت پەن ءوزارا قۇرمەت ارقىلى عانا ساقتاپ قالۋعا بولادى.