«جەكە تۇلعالاردىڭ بانكروتتىعى» تۋرالى زاڭدى اسىعا كۇتىپ وتىرعاندار كوپ. ءبىراق بۇل مۇمكىندىكتى جاۋاپكەرشىلىكتەن جالتارۋ دەپ تۇسىنبەۋ كەرەك.
قازاقستان قارجىگەرلەرى قاۋىمداستىعىنىڭ كەڭەس ءتوراعاسى ەلەنا باحمۋتوۆا ءبىرقاتار تاۋەكەلدى جىكتەپ بەردى. ەلدە جىلدان-جىلعا تۇتىنۋشىلىق نەسيەلەۋ ۇلەسى ارتىپ كەلەدى. بەس جىل بۇرىن بۇل كورسەتكىش 19 پروسەنتكە تەڭ بولسا، بىلتىر 33 پروسەنتتەن اسقان، دەپ حابارلايدى اlmaty-akshamy.kz
ەلەنا باحمۋتوۆانىڭ سوزىنشە، ەلدەگى بورىشكەرلەردىڭ 20 پروسەنتكە جۋىعى نەسيە وتەۋ ۋاقىتىن 3 ايدان اسىرىپ جىبەرگەن. اسىرەسە، 300 مىڭ تەڭگەگە دەيىنگى قارىزى بارلار تىعىرىققا تىرەلىپتى. ياعني وسىنداي نەسيە العانداردىڭ تەڭ جارتىسى بۇل. دەگەنمەن، ەكونوميست حالىقارالىق ستاندارتپەن ساباقتاساق، بىزدەگى جاعدايدىڭ ايتارلىقتاي كۇردەلى ەمەستىگىن ەسكەرتتى. ءبىراق شەشىم قابىلداردا ورتاشا ەسەپتى ەمەس، ناقتى احۋالدى باعامداۋ ماڭىزدى دەيدى.
بۇل ءۇشىن نەسيەلەۋگە مونيتورينگ جۇرگىزۋ قاجەت. ەلەنا باحمۋتوۆانىڭ ايتۋىنشا، زاڭدى ازىرلەۋدە "زاڭدى تۇلعالاردىڭ بانكروتتىعى" تۋرالى قۇجاتتى قاپەرگە العان ءجون. ال بانكروتتىقتى سوت شەشۋى كەرەك. ويتكەنى زاڭ تالابىنا ىلىككەن ازامات مەملەكەتتىك قىزمەتپەن اينالىسا المايدى، كاسىپ باستاۋ مۇمكىندىگى دە جوق. سول سەبەپتى "جەكە تۇلعالاردىڭ بانكروتتىعى" تۋرالى زاڭ ارقىلى نەسيەسىن تولەۋگە مۇلدە جاعدايى كەلمەيتىن ازاماتتارعا عانا جاردەمدەسۋ كەرەك. ايتپەسە، تۇتىنۋشىلىق قارىز مولشەرلەمەسى بارلىق ازامات ءۇشىن قىمباتقا تۇسەدى.
- ادامدار شىعىندارىن نەسيە ارقىلى وتەۋدى ادەتكە اينالدىردى. ءبىراق مۇنىڭ ارتى جاقسىلىققا اپارمايدى. مەملەكەتتىڭ سول قارىزدى كەشىرۋى، بانكروتتىق جاريالاۋى وڭ شەشىم ەمەس. ەڭ الدىمەن، ازاماتتارعا كىرىسىن ارتتىرۋعا جاردەمدەسۋ كەرەك. بۇل ءۇشىن كەشەندى جوسپار قۇرۋ قاجەت سياقتى. جۇمىسسىزدىقتى ازايتۋ ماڭىزدى، - دەيدى قازاقستان قارجىگەرلەرى قاۋىمداستىعىنىڭ كەڭەس ءتوراعاسى ەلەنا باحمۋتوۆا.