الماتىدا جەكە سوت ورىنداۋشىسى الەۋمەتتىك ماڭىزدى ساناتتاعى ىستەردىڭ ءوندىرىپ الۋ باعىتى بويىنشا ءبىرقاتار زاڭبۇزۋشىلىقتارعا جول بەرگەن، دەپ حابارلايدى aqshamnews.kz.
قالا پروكۋراتۋراسىنىڭ مالىمەتىنشە، اليمەنت ءوندىرىپ الۋعا بايلانىستى 6 اتقارۋشىلىق ءىس جۇرگىزۋ كەزىندە زاڭبۇزۋشىلىقتار انىقتالدى. سوت ورىنداۋشىسى ءىس جۇرگىزۋلەردى ءبىر وڭىردەن ەكىنشى وڭىرگە نەگىزسىز جولداي وتىرىپ، جاساندى جولمەن سوزبالاڭدىققا سالۋعا جول بەرگەن.
سونداي-اق، بۇعاتتاۋلاردى زاڭسىز الىپ تاستاۋ، بەرەشەكتەردى ءوندىرىپ الۋ بويىنشا شارالاردى ۋاقتىلى قابىلداماۋ جانە ۋاكىلەتتى ورگانداردىڭ تالاپتارىن ەلەمەۋ جاعدايلارى انىقتالدى، – دەلىنگەن پروكۋراتۋرا حابارلاماسىندا.
الاتاۋ اۋدانى پروكۋراتۋراسىنىڭ قاداعالاۋ اكتىسى بويىنشا الماتى قالالىق سوتىنىڭ قاۋلىسىمەن جەكە سوت ورىنداۋشىسى مەملەكەتتىك ليسەنزياسىنان ايىرىلدى.
قاۋلى زاڭدى كۇشىنە ەندى.