بۇل تۋرالى دەنساۋلىق ساقتاۋ ءمينيسترى اجار عينيات مالىمدەدى.
قازاقستاندا "جەدەل جاردەم" قىزمەتىندە ىستەيتىن جۇرگىزۋشىلەردىڭ جالاقىسىن كوتەرۋ ءۇشىن «پارامەديك» ماماندىعى ەنگىزىلەدى، دەپ حابارلايدى Almaty-akshamy.kz
ماجىلىستە وتكەن ۇكىمەت ساعاتىندا دەپۋتات ەدىل جاڭبىرشين جەدەل مەديسينالىق جاردەم قىزمەتكەرلەرىنىڭ جالاقى پروبلەماسىن كوتەردى. ول جۋىردا ماڭعىستاۋ وبلىسىندا "جەدەل جاردەم" قىزمەتكەرلەرى نارازىلىق اكسياسىنا شىعىپ، ەڭبەكاقىنى كوتەرۋدى تالاپ ەتكەنىن ەسكە سالدى.
«ماسەلەن، ماڭعىستاۋ وبلىسىندا ورتاشا جالاقى – 414 مىڭ تەڭگە. ال ورتاشا مەدپەرسونالدىڭ جالاقىسى – 190 مىڭ تەڭگە، جۇرگىزۋشىلەر مەن كىشى مەدپەرسونال بار بولعانى 102 مىڭ تەڭگە الادى. قىسى-جازى كۇنى-تۇنى جۇمىس ىستەيتىن مەديسينا سالاسىنىڭ الدىڭعى قاتارلى جاۋىنگەرلەرىنىڭ وسىنداي جالاقى الۋى ادىلەتسىزدىك دەپ سانايمىن»، - دەدى ماجىلىسمەن.
وسىعان بايلانىستى جاڭبىرشين دەنساۋلىق ساقتاۋ مينيسترىنەن "جەدەل جاردەم" ماماندارىنىڭ جالاقىسىن كوتەرۋ ءۇشىن قانداي شارالار قابىلداناتىنىن سۇرادى.
اجار عينيات "جەدەل جاردەم" جۇرگىزۋشىلەرىنىڭ ايلىعى 100 مىڭ تەڭگەدەن ءسال اساتىنىن راستادى.
ايتۋىنشا، "جەدەل جاردەم" جۇرگىزۋشىلەرىنىڭ ايلىعىن ءوسىرۋ ءۇشىن «پارامەديك» ماماندىعىن ەنگىزۋ جوسپاردا بار.
«جۇرگىزۋشى ەمەس، «پارامەديك» دەگەن ماماندىق ەنگىزۋ كەرەك دەگەن ۇسىنىس بار. "جەدەل جاردەم" كولىگىندە وتىرعان جۇرگىزۋشى دە سول شۇعىل بريگادانىڭ قۇرامىنا كىرەدى عوي. ولار «پارامەديك» دەگەن ماماندىق السا، جالاقىسىن كوتەرە الامىز دەپ جوسپارلاپ وتىرمىز. سوندىقتان زاڭ جۇزىندە ءقازىر وسىنداي ۇعىم ەنگىزىپ جاتىرمىز. پارامەديك دەگەن كىم، ونىڭ جالاقىسى قانشا بولۋى كەرەك، ءبارى پىسىقتالادى. ءسويتىپ، ءبىز جۇرگىزۋشىلەردىڭ جالاقىسىن 20% بىلاي تۇرسىن، ودان دا جوعارى كوتەرۋگە مۇمكىندىك بەرەمىز»، - دەپ ءتۇسىندىردى عينيات.
مينيستر پرەزيدەنتتىڭ تاپسىرماسىمەن دارىگەرلەردىڭ جالاقىسى جىل سايىن 30%-عا، ورتاشا مەديسينا قىزمەتكەرلەرىنىكى 20%-عا، ال بيىلدان باستاپ مەديسينالىق قىزمەتكەر ەمەس، ءبىراق مەديسينالىق ۇيىمداردا ىستەيتىن قىزمەتكەرلەردىڭ ايلىعى 20%-عا ءوسىپ جاتقانىن اتاپ ءوتتى.
بيىل دارىگەرلەردىڭ ورتاشا جالاقىسى – 420 مىڭ، ورتا مەديسينا قىزمەتكەرلەرىنىڭ ايلىعى – 250 مىڭ، ال وسى سالادا ىستەپ جۇرگەن مەديسينا قىزمەتكەرى ەمەس مامانداردىڭ جالاقىسى 120 مىڭ تەڭگەنى قۇرايدى.