بۇل ساۋال ءالى دە وزەكتى. سەبەبى، جەدەل جاردەم شاقىراتىندار ءالى دە ەكى توپقا بولىنەدى: ءبىرىنشىسى – مەديسينا مامانى ۇيگە اياق كيىمىمەن كىردى مە، الدە شەشىپ كىردى مە، ول ماڭىزدى ەمەس، شۇعىل تۇردە العاشقى كومەك السا بولدى؛ ال ەكىنشى توپتاعىلار – جەدەل جاردەم قىزمەتكەرلەرى بولسا دا ولاردىڭ ۇيگە سىرتقى اياق كيىمىمەن كىرمەگەنىن قالايتىندار، تازالىقتىڭ ساقتالعانىن دۇرىس كورەتىندەر. سونىمەن، قايسىسى دۇرىس؟ باحيلا كيە مە، كيمەي مە؟
كيۋگە مىندەتتى ەمەس ەكەن. ناقتىراق ايتار بولساق، ق ر دەنساۋلىق ساقتاۋ مينيسترلىگى «قازاقستان رەسپۋبليكاسىندا مەديسينالىق كومەك كورسەتۋ ەرەجەسىن بەكىتۋ تۋرالى» 2020 جىلعى № ق ر دسم-225/2020 بۇيرىعىن شىعاردى. وندا باحيلالار قاجەتتى مەديسينالىق ماقساتتاعى بۇيىمدار تىزبەسىنە كىرمەيدى جانە مەديسينالىق جەدەل جاردەم قىزمەتكەرلەرىن باحيلا كيۋگە مىندەتتەمەيدى دەپ جازىلعان. ەندى تولىق تارقاتىپ كورەيىك.
ءيا، پاتەرگە كىرە بەرىستە ناۋقاستىڭ تۋىسى اگرەسسيۆتى تۇردە باحيلا كيۋدى تالاپ ەتەتىن جاعدايلار كەزدەسەدى. ال كەلگەن فەلدشەر ەڭكەيىپ اياق كيىمىنىڭ باۋىن شەشىپ، قايتا كيىپ جۇرگەندە، ناۋقاس ادامنان ايىرىلىپ قالۋىمىز دا عاجاپ ەمەس. ياعني ناۋقاستى جەدەل اۋرۋحاناعا جەتكىزۋ كەزىندە باحيلانى كيىپ-شەشۋ ارتىق ۋاقىت الادى. سونداي-اق، توتەنشە جاعداي كەزىندە دارىگەر عيماراتتان جىلدام شىعۋى كەرەك، ال باحيلا تايعاق بولعاندىقتان، ودان جاراقات الىپ قالۋى ابدەن كادىك.
جەدەل جاردەم بريگاداسىنىڭ جۇمىسى، اتى ايتىپ تۇرعانداي – ادامعا شۇعىل مەديسينالىق كومەك كورسەتۋ. ال جج قىزمەتكەرىنىڭ اياق كيىمى سانيتارلىق نورمالارعا اسا زارداپ تيگىزبەيدى جانە ول قىزمەت ساپاسىنا اسەر ەتپەيدى دەيدى سالا ماماندارى.
دەمەك، بىزگە جەدەل جاردەم قىزمەتكەرلەرىنىڭ تاۋلىك بويى جۇمىس ىستەيتىنىن ۇمىتپاۋ ماڭىزدى. ءبىر كۇندە ولار قوڭىراۋ تۇسكەن ونداعان ءۇي، پاتەرگە بارىپ قىزمەت كورسەتەدى. سوندىقتان قاۋىپسىزدىك تەحنيكاسى ەرەجەلەرىنە جانە جىلجىمالى بريگادالاردىڭ رەگلامەنتىنە سايكەس، مەديسينالىق جەدەل جاردەم قىزمەتكەرلەرىنىڭ شۇعىل ارەكەت ەتۋ بارىسىندا جاراقات الىپ نەمەسە مەرتىگىپ قالماۋى ءۇشىن اياق كيىمىن شەشۋگە جانە باحيلا نەمەسە سەللوفان قاپتاردى كيۋگە تىيىم سالىنادى. سونداي-اق، ديسپەچەر بۇيرىققا سايكەس قوڭىراۋ شالۋشىعا بريگادا اياق كيىمىن شەشپەيتىنىن، باحيلا كيمەيتىنىن، پاتەرگە كىرە بەرىستە ەدەنگە شۇبەرەك توسەۋ كەرەكتىگىن ەسكەرتەدى. دابىل پاراعىنىڭ ارتقى جاعىندا مەديسينالىق جەدەل جاردەم شاقىرۋ ەرەجەلەرى تۋرالى مەملەكەتتىك جانە رەسمي تىلدەردە اقپارات بار، وندا جەدەل جاردەم بريگاداسىنىڭ نەگىزدەمەسىمەن باحيلا، پوليەتيلەن پاكەتتەرىن كيمەيتىنى كورسەتىلگەن. بريگادا كەلگەننەن كەيىن دارىگەر پاسيەنتكە دابىل قاعازىن بەرەدى.
ايتپاقشى، مەديسينالىق جەدەل جاردەم شاقىرىلعان ساتتەن باستاپ مىنا قاعيدالارعا ەرەكشە نازار اۋدارۋ قاجەت: مەكەن-جايدى ناقتى كورسەتۋ؛ ديسپەچەردىڭ نەگىزگى جانە قوسىمشا سۇراقتارىنا ناقتى جاۋاپ بەرۋ؛ ناۋقاسقا كەدەرگىسىز قول جەتكىزۋگە مۇمكىندىك بەرۋ.
پاۆەل بۋردا، الماتى قالاسى «مەديسينالىق جەدەل جاردەم قىزمەتى» ديرەكتورىنىڭ ستراتەگيالىق دامۋ جونىندەگى ورىنباسارى:
– كۇزدە كوشەلەر، جولدار جاۋىن-شاشىننىڭ سالدارىنان ىلعالدى، ال قىسقى ماۋسىمدا كوكتايعاق بولادى. بۇل «مەديسينالىق جەدەل جاردەم قىزمەتى» ءۇشىن دە اسا كۇردەلى كەزەڭ سانالادى. جولداعى كولىك كەپتەلىستەرى دە جاعدايدى قيىنداتادى. ءتىپتى، جول ۇستىندە «جەدەل جاردەم» كولىگىنە جول بەرمەيتىن جۇرگىزۋشىلەر دە جوق ەمەس. ال بۇل جاعدايلاردىڭ ءبارى ءوز كەزەگىندە جەدەل جاردەم كولىگىنىڭ ۋاقىتىلى جەتۋىنە كەدەرگى كەلتىرەدى. قانداي ءسات بولماسىن، شاقىرتۋ العان بريگادا قالايدا شۇعىل ءارى بىلىكتى قىزمەت كورسەتە بىلۋگە ءتيىس. سوندىقتان دارىگەرلەر تۇرعىن جايعا اياق كيىمدەرىن شەشپەي كىرە بەرەدى. وسى رەتتە مەديسينا قىزمەتكەرىنىڭ كاسىبي قىزمەتىنە كەدەرگى كەلتىرگەنى ءۇشىن اكىمشىلىك جانە قىلمىستىق جاۋاپكەرشىلىك كوزدەلگەنىن دە ايتا كەتەيىك. ەگەر پاتەر يەسى ناۋقاستىڭ دەنساۋلىعىنا عانا ەمەس، ۇيدەگى تازالىققا دا الاڭداسا، وندا دارىگەردىڭ كەلۋىنە الدىن الا دايىندالۋعا بولادى. مىسالى، دارىگەر اياق كيىمىن سۇرتە الۋى ءۇشىن كىرەبەرىسكە ىلعالدى شۇبەرەك توسەپ قويعانى دۇرىس. ايتپەسە كىلەمنىڭ ءبىر بۇرىشىن ادام ءجۇرىپ وتۋگە ىڭعايلى بولاتىنداي قايىرىپ قويۋعا نەمەسە ەدەنگە قاعاز توسەگەن ابزال. نە بولماسا دارىگەرگە ناۋقاستى توسەنىشى جوق بولمەدە قاراۋعا جاعداي جاساعان ابزال. ءۇي اۋلاسىندا بايلاۋسىز يت جۇرمەگەنى دە دۇرىس. مۇنىڭ ءبارىنىڭ جەدەل دە ساپالى قىزمەت كورسەتۋگە سەپتىگىن تيگىزەتىنى ءسوزسىز.