جازدا 11 مىڭنان اسا مەكتەپ جانىنداعى ءارى قالا سىرتىنداعى ساۋىقتىرۋ لاگەرى جۇمىس ىستەيدى
بعم بالالار قۇقىقتارىن قورعاۋ كوميتەتى ءتوراعاسىنىڭ ورىنباسارى ەلينا پاۋلي بالالارعا جازعى لاگەرگە تەگىن جولدامانى قالاي الۋعا بولاتىنىن ءتۇسىندىردى، دەپ حابارلايدى Almaty-akshamy.kz inbusiness.kz-كە سىلتەمە جاساپ.
ونىڭ ايتۋىنشا، جازعى ساۋىقتىرۋ لاگەرىنە تەگىن جولداما الدىمەن جەتىم، از قامتىلعان، كوپبالالى، تولىق ەمەس وتباسىلاردان شىققان بالالار، مۇگەدەك بالالار الادى.
"بالالاردىڭ جازعى دەمالىسىنا تەگىن جولداما الۋ ءۇشىن ءبىلىم بەرۋ ۇيىمى باسشىسىنىڭ اتىنا ءوتىنىم جازۋ كەرەك. تەگىن جولدامانى الاتىنداردىڭ تىزىمىندە مەملەكەتتىك اتاۋلى الەۋمەتتىك كومەك الۋعا قۇقىعى بار وتباسىلاردان شىققان بالالار، جان باسىنا شاققانداعى تابىسى ەڭ تومەنگى كۇنكورىس دەڭگەيىنىڭ شاماسىنان تومەن وتباسىلاردان شىققان بالالار، جەتىم بالالار، اتا-اناسىنىڭ قامقورلىعىنسىز قالعان بالالار، توتەنشە جاعدايلار سالدارىنان شۇعىل جاردەمدى تالاپ ەتەتىن وتباسىلاردان شىققان بالالار، مەكتەپتىڭ قامقورشىلىق كەڭەسى انىقتايتىن وزگە دە ساناتتاعى ءبىلىم الۋشىلار، تاربيەلەنۋشىلەر بار"، - دەدى ەلينا پاۋلي.
كوميتەت ءتوراعاسى ورىنباسارى بالالاردىڭ جازعى دەمالىسىن ۇيىمداستىرۋ ءارى جولداما بەرۋ جەرگىلىكتى اتقارۋشى ورگاندار قۇزىرەتىندە جانە ولاردىڭ قاراجاتىنا بايلانىستى ۇلەستىرىلەتىنىن ءتۇسىندىردى.
"جازدا 11 مىڭنان اسا مەكتەپ جانىنداعى ءارى قالا سىرتىنداعى ساۋىقتىرۋ لاگەرى جۇمىس ىستەيدى. بيىل وتكەن جىلمەن سالىستىرعاندا 500 مىڭعا ارتىق بالا لاگەردە دەمالادى، ال جازعى ساۋىقتىرۋ دەمالىسىمەن قامتىلاتىن بالالاردىڭ جالپى سانى 2 ملن 300 مىڭنان اسادى"، - دەدى باسشى.