«قازگيدرومەت» رمك 30 تامىز – 1 قىركۇيەك ارالىعىنداعى اۋا رايى بولجامىن ۇسىندى، دەپ حابارلايدى Almaty-akshamy.kz Inform.kz-كە سىلتەمە جاساپ.
«اۋقىمدى سولتۇستىك-باتىس انتيسيكلونىنىڭ ىقپالىنان الداعى ءۇش تاۋلىكتە ەلىمىزدىڭ باسىم بولىگىندە جاۋىن-شاشىن بولمايدى. تەك رەسپۋبليكانىڭ وڭتۇستىك-شىعىسىندا جانە تاۋلى اۋداندارىندا، 31 تامىز - 1 قىركۇيەكتە سولتۇستىكتە، باتىس قازاقستان وبلىسىنىڭ باتىسىندا، 1 قىركۇيەكتە قوستاناي، سولتۇستىك قازاقستان وبلىستارىندا جاڭبىر كۇتىلەدى، نايزاعاي وينايدى، جەل كۇشەيەدى. اۋا تەمپەراتۋراسى ودان ءارى كوتەرىلۋى ىقتيمال، كۇندىز تەرمومەتر باعانى ەلىمىزدىڭ باسىم بولىگىندە 25-35، باتىستا جانە وڭتۇستىكتە 30-38 گرادۋسقا جەتەدى»، - دەلىنگەن سينوپتيكتەر حابارلاماسىندا.