جاز جاقىنداعان سايىن ءبارىمىز جۇمىستان بوساپ، ءبىر دەمالىپ الۋدى اڭسايمىز. ءبىراق قالتا تەسپەيتىن ءارى قىزىق ساياحاتتى قالاي جوسپارلاۋعا بولادى؟ بۇل جاعدايدا نەنى ەسكەرۋ كەرەك؟ ءبىز وسى سۇراقپەن اۆتورلىق تۋرلار ۇيىمداستىراتىن اقەركە وڭعارعا جۇگىندىك. ول جازدا ءتيىمدى ساياحاتتاۋعا بولاتىن باعىتتار مەن ونىڭ باعاسىنا اسەر ەتەتىن نەگىزگى فاكتورلاردى اتادى.
قازاقستاندىقتار ءجيى باراتىن ارزان ەلدەر
اقەركە حانىم بۇرىن تەك "باي-باعلانداردىڭ باعىتى" سانالاتىن دۋبايدى قازاقستاندىقتار ءجيى باراتىن ارزان ەلدەر قاتارىنا قوستى. سونداي-اق بۇل تىزىمدە جۇڭگو مەن مىسىر دا بار.
جاڭا باعىت - ازيا ەلدەرى
ماماننىڭ ايتۋىنشا، ءقازىر قازاقستاندىقتار بۇرىنعىدان ءجيى ساياحاتتايدى.
"بۇرىن شەتەل دەسە، تەك تۇركيا، ءباا، جۇڭگو ەسكە تۇسەتىن. بۇل باعىتتار نەگىز بولىپ قالىپتاسىپ قالعان. بۇدان باسقا ەلدەرگە بارۋعا قاۋىپسىزدىك، ءتىل، تاعام ماسەلەسى اسەر ەتەدى. ءبىراق كەيىنگى 2 جىلدا وتانداستار وڭتۇستىك-شىعىس ازيا ەلدەرىنە كوپ ساياحاتتاي باستادى. مىسالى، مالايزيا، يندونەزيا، سينگاپۋر، ۆەتنام سىندى ەلدەرگە باراتىن ادام كوبەيدى. بۇعان الەۋمەتتىك جەلى دە كوپ ىقپال ەتتى. جەلىدە بۇل ەلدەردىڭ قاۋىپسىزدىگى، ادەمىلىگى، اقشا جاعىنان دا تيىمدىلىگى، دامىپ جاتقانى كورسەتىلگەن. ءبىر قىزىعى، ەرەكشە جەرلەرگە بارۋدان تارتىنشاقتايمىز. ءبىر قازاق قايدا بارىپ جارناما جاساسا، سول ەلگە باس سالامىز. ياعني، ماركەتينگتىڭ اسەرى بار. الايدا جاستار ءقازىر ءبارى بارىپ جۇرگەن دۋباي مەن تۇركيادان گورى، قازاقتارعا جات، تروپيكالىق باعىتتارعا كوبىرەك قىزىعۋشىلىق تانىتىپ ءجۇر. بۇل ەلدەرگە شىعىن دا از كەتەدى"، - دەدى ول.
مىسىر. فوتو:pixabay.com
ءبىراق مىنانى ەسكەرىڭىز، ءبىر ەلگە قازاقستاندىقتار كوپ بارا باستاسا، كەلەر جىلى ول باعىتتىڭ باعاسى 3 ەسە ءوسۋى مۇمكىن. مالايزيا – سونىڭ دالەلى.
ساياحاتشىلار ءۇشىن "ارزان" دەگەن ۇعىمدى نەمەن ولشەۋگە بولادى؟
"ادەتتە، شەتەلگە شىعاتىن كەز كەلگەن ساياحاتشى ۇشاق بيلەتى مەن ءقوناقۇيدىڭ باعاسىنا قارايدى. مىسالى، تۋر-پاكەت ارزان بولسا، كوز جۇمىپ سول ەلدى تاڭدايدى. ءبىراق ول ەلدە كەرىسىنشە، قالتا شىعىنى كوپ بولۋى مۇمكىن. ونى ىزدەنىپ، زەرتتەيتىندەر از"، - دەيدى اقەركە حانىم.
ساياحات باعاسىنا اسەر ەتەتىن نەگىزگى فاكتورلار قانداي؟
- ماۋسىمدىق سۇرانىس
- ۇشاق بيلەتتەرىنىڭ قۇنى
- تۋرپاكەت نەمەسە جەكە ساياحات
- قالتا شىعىنى
- ەلدەگى ەكونوميكالىق جاعداي مەن ۆاليۋتا باعامى
- تۋريستىك ترەندتەر مەن الەۋمەتتىك جەلى
- ۆيزا مەن ساقتاندىرۋ شىعىندارى
"ەڭ الدىمەن، ماۋسىمدىق سۇرانىس. مىسالى، ادامدار ەڭ ءجيى ساياحاتتايتىن باعىت ءباا-عا قىستا ساياحاتتاعان قىمبات. جازدا اۋا رايى قاتتى ىستىق، ساياحاتشىلار از بولعان سوڭ ۇشاق بيلەتتەرى دە ءقوناقۇي باعاسى دا ارزاندايدى. ەكىنشى فاكتور - ينفلياسيا. مىسالى، بۇرىن تۇركياعا باراتىن قازاق كوپ بولسا، ءقازىر ازايعان.ليرانىڭ قۇنسىزدانۋى مەن ەلدەگى ەكونوميكالىق تۇراقسىزدىق سالدارىنان تۇركيادا باعا ءوسىپ جاتىر. ءبىراق بىزدە ءالى كۇنگە دەيىن “تۇركيا — ارزان ەل” دەگەن تۇسىنىك قالىپتاسقان"، - دەيدى ول.
تۇركيا. فوتو:pixabay.com
بىلتىرمەن سالىستىرعاندا، بيىل ساياحاتتاۋ ارزان با، قىمبات پا؟
"ساياحاتتاۋ جىل سايىن قىمباتتاپ كەلەدى. بۇرىن حالىق ارزان ءارى ءتيىمدى ساياحاتتاۋدىڭ جولدارىن بىلە بەرمەيتىن. بۇل تۇرعىدا الەۋمەتتىك جەلىلەردىڭ ىقپالى زور — ءقازىر تاجىريبەلى ساياحاتشىلار ۇنەمدى ساياحاتتاۋعا قاتىستى لايفحاكتارىن بولىسەدى"
قازاقتار ءۇشىن قاي ەلدەر قولايلى؟
اقەركە حانىمنىڭ ايتۋىنشا، قازاقتار ءۇشىن ءتىلى، تاعامى، مەنتاليتەتى جاعىنان تۇركيا، گۇرجىستان، ازەربايجان، ءباا ەلدەرىنە ساياحاتتاعان قولايلى.
جاڭا حيت – ازەربايجان، ۆەتنام (دانانگ)
اقەركە حانىم دەمالىستىڭ ەكى ءتۇرىن اجىراتادى:
- پاسسيۆ دەمالىس (جاتامىن، سۋعا تۇسەمىن): دۋباي، كاتار، تايلاند، مىسىر – تۋرپاكەتپەن بارعان ءتيىمدى.
-
بەلسەندى دەمالىس (جاياۋ جۇرەمىن، كورەمىن): مالايزيا، گۇرجىستان، تۇركيا، ەۋروپا – ساياحات جوسپارىن ءوز بەتىڭىزشە ۇيىمداستىرعان دۇرىس.
ۆەتنام. فوتو:depositphotos.com
قالاي ۇنەمدەۋگە بولادى؟ لايفحاكتار
- ماۋسىمنان تىس ۋاقىتتا بارىڭىز. مىسالى، دۋباي جازدا ارزان.
- بيلەتتى ەرتە الىڭىز، كەيدە العاشقى رەيستەر 3 ەسە ارزان بولادى (مىسالى، مالايزيا).
- بلوگەرلەردى وقىڭىز، لايفحاكتاردان ۇنەمدەي الاسىز.
- جاڭا باعىتتاردى اڭدىپ وتىرىڭىز – العاشىندا ءبارى ارزان بولادى.
جولىڭىز بولسىن!