وندىرىستەگى تەحنيكالىق قۇرال جابدىقتاردى جاڭعىرتۋ مىندەتتەلمەك.
«قازاقمىستاعى» اپاتتان كەيىن وندىرىسپەن اينالىساتىن كومپانيالارعا قويىلاتىن تالاپ قاتاڭدايدى، دەپ حابارلايدى aqshamnews.kz
«قازاقمىستاعى» اپاتتان كەيىن ۇكىمەت ءقاۋىپتى وندىرىسپەن اينالىساتىن كومپانيالارعا تەحنيكالىق جابدىقتارىن جاڭعىرتۋدى مىندەتتەيدى.
«ۇكىمەت پرەزيدەنتتىڭ تاپسىرماسىمەن ونەركاسىپ قاۋىپسىزدىگىن قامتاماسىز ەتۋ بويىنشا تالاپتاردى كۇشەيتەدى»، – دەلىنگەن باسپا ءسوز حابارلاماسىندا.
قانداي شارالار قولعا الىنادى؟
ۇكىمەت ونەركاسىپتە قاۋىپسىزدىكتى قامتاماسىز ەتۋ ءۇشىن مىناداي شارالار قولدانادى:
ءقاۋىپسىز ەڭبەك تۇجىرىمداماسى اياسىندا نىساندار سيفرلاندىرىلادى؛
نورماتيۆتىك-قۇقىقتىق اكتىلەر قايتا قارالادى؛
ونەركاسىپ قاۋىپسىزدىگى مەن عىلىمدى دامىتۋمەن اينالىساتىن نىساندارعا قويىلاتىن تالاپ كۇشەيەدى؛
مەملەكەتتىك ەڭبەك ينسپەكتورىنىڭ كادرلىق الەۋەتى مەن قۇقىقتىق مارتەبەسىن ارتتىرۋ جونىندەگى تالاپتار قاتاڭدايدى.
تالاپتار كۇشەيتىلەدى
سونىمەن بىرگە وندىرىستىك نىسان يەلەرىنە تەحنيكالىق قۇرال جابدىقتارىن جاڭعىرتۋ مىندەتتەلمەك.
«قازىرگى ۋاقىتتا ونەركاسىپ قاۋىپسىزدىگى بويىنشا جەكەلەگەن تالاپتار قايتا قارالىپ جاتىر. وسىلايشا، ازاماتتىق قورعاۋ تۋرالى زاڭ جوباسى شەڭبەرىندە اپاتتىق-قۇتقارۋ قىزمەتتەرىنە قويىلاتىن تالاپتار قاتاڭداتىلادى، وندىرىستىك باقىلاۋ ستاندارتتارى كۇشەيتىلۋدە، ءقاۋىپتى وندىرىستىك نىساندار يەلەرىنە جابدىقتاردى جاڭارتۋ جانە جاڭعىرتۋ بويىنشا جاڭا مىندەتتەر كوزدەلگەن»، – دەلىنگەن باسپا ءسوز حابارلاماسىندا.
ونەركاسىپتىك قاۋىپسىزدىك نىساندارىن پاسپورتتاۋعا باعىتتالعان جانە اپاتتاردى ەسەپكە الۋ پروسەستەرىن اۆتوماتتاندىراتىن «ە-وقك» اقپاراتتىق جۇيەسى ىسكە قوسىلادى.